L’Alpino: “Due Poesie Alpine” – 26
…a cura di Ilario Péraro
Per le tue domande scrivi a: ilarioperaro@yahoo.it
Ti te cantavi, Alpin
Vint’ani: forte come na sengia,
te si partìo de ficheton da casa
parché nessun piansesse.
Là, su l’Ortigara,
un mondo de giasso
e de morte, ma ti,
ti te cantavi, Alpin,
ti te cantavi par no sentir
el rombo dei canoni,
te te cuersevi i oci
par no vedar tuto intorno
un calvario de carne sbindà
andove i vivi i ciamava i morti.
Ti te pregavi, Alpin,
parché quel fogo losco,
che te nebiava i oci,
el diventasse par tuti
un fogolar de pace.
Ti te cantavi, Alpin,
parché to mama, da distante,
la sentisse el to respiro.
Ti te cantavi parché el Signor
el te versesse i brassi…
Po’ un colpo de fogo, un sguisso…
e ti, Alpin, no te Cantavi più! …
Vitorio Pavan
***
‘Na bela bandiera
In fondo de ‘n calto
dentro a ‘n vecio comò,
in mezo ai ninsoi
e a ‘na canotiera
in man m’è vegnudo
‘na vecia bandiera.
Ghe l’avea me pupà
quan’ l’è tornà da la guera,
sbindelada qua e là
ma però tuta intiera.
Dal calto l’ò tolta
e l’ò verta fora
e del colpo ò pensado
a tuti i Alpini
che i’è morti là, in guera,
e come ultimo gesto
i’à basà la bandiera
e con l’ultimo fià
“VIVA L’ITALIA”
i g’à sussurà.
Ricordemoli, alora,
tacandola fora
la nostra bandiera,
che la sventola fiera
e che tuti i le amira
portandoghe onor
e grande rispeto
par la vita intiera.
Danilo Pavan
***
Ilario Péraro
