L’Angolo de la Wanda – Settembre 2017 – “Le colonie”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Le colonie

Quando el me primo fiol l’era intorno a i sié ani, l’era magro inpicà! A védarlo adesso no se dirìa mia, parché l’è grande e grosso… (“grande” parché el va par i 63, e “grosso” parché el sfiora el quintal) ma da pìcolo l’era ’n schiriolin trascurà da i brodi. In realtà i brodi l’era lu a trascurarli parché no ’l magnava. Cusì l’emo portà dal dotor. Al dotor ghè bastà n’ociada par darne la sentensià:
“’Sto bocia el ga proprio bisogno de aria bona. Possibilmente aria de montagna!”

Sì alà… i schèi par ’ndar in montagna no i ghera mia, però ’na solussion la ghera: la colonia. Le “colonie” i era nate durante el “Ventennio” par far in modo che anca le fameje con pochi schèi (che in Italia i era tante) le podesse mandar in vacansa almanco i fiói. Ne i ani ’60 se stava sicuramente mèjo, ma le colonie le ghera ancora… e tante: sia al mar che in montagna. De solito i era tegnù da suore sul model de i colèi (cioè camaroni con i letini e refetorio par magnar) e la cifra che se dovéa tirar fora par ’na vacansa de ’n mese l’era più che onesta. Cusì s’à proà: in agosto con la nostra Fiat ’600 emo portà el fiol a la colonia de Roverè Verosese… al bel frescheto de l’Alta Lessinia.
Gnanca dirlo che paréa che lo portàssimo al massel: muso longo, oci lustri, sguardo perso fora dal finestrin… ma nojaltri duri! “Varda che te fa ben! Tearè che te te godi! Nétete el naso!” Insoma… l’emo deposità in meso a ’na brìgola de altri fiói (tuti poco convinti come lu) e semo tornà a casa.
A l’epoca no gh’era de çerto i celulari e za telefonar a Roverè l’era n’interurbana, cusì par dó setimane no ghe n’emo più savù più gnente. Ovio che la casa la paréa uda… triste e uda… tra mi e me marì se vardàimo ne i oci: emo fato ben? Emo fato mal? A cavarne el pensier è rivà a metà mese ’na telefonada de la suora “capa”: “’Sto fiol no ’l magna gnanca a ingossarlo come ’n pito! Vegnìvelo a tór che no vói più védarlo!” E cusì semo ’ndà a recuperarlo. Po’ è vegnù fora che lì vissin i arlevava i porsèi, e ogni tanto rivava de quele spusse che gavarìa fato passar la fame anca a ’n leon!

Par quel’ano l’è ’ndà cusì… ma l’ano dopo ghemo riproà. La selta staolta l’è cascà su la colonia de Boscocesanova… più cara ma più bela, più vissina e con manco spusse. ’Na setimana dopo semo ’ndà a controlar… Miracolo: el se stava godendo! E l’avèa anca messo sù qualche eto! El n’à contà che i le menava par i boschi a catar sù i ciclamini… la matina i partiva a piè, tuti in fila par i sentieri de la Lessinia, e nel dopodisnà i zugava nel cortil. Senpre fora… te credo che quando l’era ora de magnar el magnava de gusto. El dotor el gavéa ’vù reson! Mirco el s’à troà cusì ben che in “colonia” ghe l’emo spedì anca l’ano dopo, e ancora l’ano dopo fin a quando che no’ s’à scominçià a ’ndar in ferie tuti insieme.
Me ricordo che a nojaltre mame i ne dava ’na strìcola de passamanerìa con sora el nùmaro: te dovéi tajarla a tochetini e cusirli uno par uno su calse, mudande, canotiere ecc. parché quando i lavava le robe dopo i le riconsegnava a i “ospiti” in base al nùmaro… Mai scaucià cusì tanto in vita mia! La domìnica se ’ndava a troarlo, portàndose drio roba da magnar… par lu, e par nojaltri… parché l’era l’epoca che se usava far i picnic e za che s’èrimo al fresco, parché no’ profitàrghene? Taolin, careghe e thermos pien de pastassuta!
Mama mia… quanti ani che è passà! Go domandà recentemente a Mirco se el se ricorda l’esperiensa “colonia”… El se le ricorda ecóme, e el ghe n’à anca un bel ricordo… (almanco de Boscocesanova), d’altronde da che ghè mondo a i fiói ga senpre fato ben star fora e zugar co i altri fiói (magari a balon) invesse che stàrsene tapà in casa a vardar la television. No sò se esiste ancora le colonie… ma sicuramente esiste i canpi scuola, el “grest”, i scout… Mandìgheli, ’sti fiói… tanto adesso che esiste i celulari se fa presto a saver se i sta ben!

Wanda Girardi Castellani
Mirco Castellani