L’Angolo de la Wanda – Marzo 2017 – “El Tempio Votivo de Verona”

…a cura di Graziano M. Cobelli

gcobelli05@gmail.com
Wanda Girardi Castellani


Quatro Ciàcoe: da Verona

El Tempio Votivo de Verona

Tempio Votivo de Verona – La faciata

Quando rivè a Verona col treno, se vegnendo fora da la stassion de Porta Nòva no gavì massa pressia de çercar l’autobus, podì far caso che da l’altra parte del piassal ghè ’na cesa moderna. La fassada l’è de marmo bianco (o almanco “l’èra”… parché el marmo el tira ormai al gialin) con al centro el bassorilievo de ’na Madona “in mandorla” e da le parte ’na fila de contraforti rampanti che i te fa pensar a ’na version moderna de Notre Dame. No l’è çerto tra le cese più antiche de Verona… e no l’è gnanca tra le più famose… però la so storia la mèrita de èssar contà.
Scominçiemo alora da l’8 Diçembre 1943: data de l’armistissio. Qua a Verona con tuti i tedeschi che gavéimo in giro l’èra ciaro che la guera no l’èra par gnente finì… ansi: che la parte “pèso” la stava proprio par scominçiar. L’era ciaro anca par l’alora vescovo Girolamo Cardinale, che proprio el stesso giorno de l’armistissio, in domo e insieme a i veronesi, l’à fato voto solene a la Madona de costruirghe ’na grande cesa se la guera l’avesse risparmià la çità. Purtropo par tuto el ’44 e el ’45 i raid aerei aleati i à sgancià su Verona ’na tal valanga de bonbe da demolìrghene quasi metà. Passà la guera s’à scominçià a ricostruir, scominçiando da i ponti. Però l’Arena l’era in pié… le Arche scaligere anca… San Zen anca… ben o mal el patrimonio artistico de la çità el s’avéa salvà, e anca bona parte de la gente. Così, visto che “la podéa andar pèso” s’à deciso fin da subito de onorar el voto a la Madona e costruir la cesa.
Da lì el nome conossù da tuti: “Tempio Votivo”… anca se uficialmente la sarìa dedicà al “Cuore Immacolato di Maria”. Nel 1950 el progeto el vien afidà a l’architeto Paolo Rossi De Paoli (quel che nel stesso periodo el sta seguendo la riconversion del forte San Leonardo, su le Toresele, in santuario dedicà a la Madona de Lourdes). El Comune el mete a disposission la zona davanti a la stassion de Porta Nòva e l’architeto, par contegner i costi, l’usa in abondansa i sassi che el scavo del Canal Cammuzzoni (a fine ’800) l’avéa lassà lì vissin.

Tempio Votivo de Verona – veduta de l’interno

Così la cesa la vien sù con strati de matoni alternà a strati de sassi. La pianta l’è a croçe latina, a navada unica ma con de i curiosi “matronèi” da le parte. L’idea de l’architeto Rossi De Paoli l’è quela de crear ’n ambiente grande, senogràfico… così, oltre a la navada unica, el decide de sopraelevar l’altar e inserirlo tra ’na serie de “quinte” sporgenti a scalar da i fianchi de l’abside. Sia le “quinte” che l’abside po’ i vien querti da afreschi. El pitor incaricà del laoro l’è Pino Casarini (Verona 1892-1972) e l’opera che el crea l’è un capolavoro. El stile usà l’è ’a fusion tra moderno e antico… tanto che a ’na prima ociada te vien in mente i mosaici bizantini. La sèna la mostra papa Pio XII quando el proclama, giusto nel 1950, el Dogma de l’Assunzione de Maria. La scalinada che porta a l’altar la continua idealmente ne l’afresco fin a rivar al Papa, in trono tra “dignitari e flabelli”, drio lèsar la “Munificentissimus Deus”. A destra e sinistra, sul rosso vivo de le “quinte”, i papi precedenti i sta vardando verso Pio XII con aprovassion. Sora, in alto, se vede la Madona con atorno un volo de angeli. El tuto inondà da la calda luce che vien zo da le vetrate. El Dogma de l’Assunsion l’era stà proclamà nel 1950, giusto l’ano de fondassion de la cesa, (finì nel 1952 e consacrà nel 1958) e l’evento l’èra massa inportante par no’ èssar quel rapresentà in ’na cesa dedicà proprio a la Madona.
El Tempio Votivo l’è anca ligà a ’n’inportante tradission veronese: la “Madonna Pellegrina”. L’imàgine de la Madona “in mandorla” che se vede scolpì nel marmo (quasi) bianco de la fassada la ricalca quela de ’n bassorilievo in legno, opera de ’n artigian de Ortisei (Marcello Vigni), che el Sovrano Ordine di Malta l’à regalà a la diocesi de Verona el 15 setembre 1949.

La statua de la “Madonna Pellegrina”


Par nove mesi l’imàgine sacra l’è stà tegnù par un po’ de tenpo in ogni parochia de la çità fin a rivar, in testa a ’na procession imensa come se usava alora, nel punto esato dove sarìa stà costruì la cesa. Dopo ’na comovente cerimonia de ringrassiamento l’imàgine de la Madona l’à ricominçià el so peregrinar de cesa in cesa, spetando la fine de i laori. Dal 1958 l’è ospità nel Tempio Votivo (che, apunto, l’è ciamà anca “Madonna Pellegrina”) e ogni tanto, come da tradission, la riscominçia el so peregrinar da ’na parochia a l’altra.
Cusì quando vegnì a Verona in treno, e no’ gavì massa pressia de çercar ’n autobus, fasì pure un salto dentro al Tempio Votivo: se l’è ’na bela giornada de sol el mèrita… e se no trovè la Madona Pelegrina l’è solo parché l’è in giro, magari l’è proprio ne la vostra cesa!

Wanda Girardi Castellani
Mirco Castellani

↓