L’Angolo de la Wanda – Maggio 2017 – “San Giovanni in Valle”

…a cura di Graziano M. Cobelli

gcobelli05@gmail.com

Quatro Ciàcoe: da Verona

San Giovanni in Valle  

El quartier che a Verona ghè su la riva sinistra de l’Àdese, tra l’antico “Isolo” (ormai interà) e la colina da San Piero, el se ciama “Veronetta”. I l’avéa ciamà cusì i francesi a l’inissio de l’800 quando che i vedéa in quele case, vece e poarete, ’na Verona de serie “B”… ’na “Veroneta”! Adesso el quartier l’è deventà ’n posto da siori… ma al contrario del centro co’ le so vie a pianta romana, Veroneta l’è ancora un labirinto de stradine che tuto i è manco che drite. L’è facile infilàrseghe quando che se ga intension de rivar a piè fin al Castel de San Piero (par ci no’ vol caminar, ghè la funicolare).

Seguendo uno de ’sti vicoli, pol sucédar, girando un canton, de trovarse de fronte a qualcosa che te fa restar a boca verta: ’na cesa romanica, de piera, con da ’na parte el chiostro e vissin un campanil basso e largo, anca lu de piera, con le sóghe de le canpane che le riva fin in tera a spetar che te ghe dài un tiron. La cesa l’è de un romanico così puro che no’ ghè bisogno che i te le dìga, par capir che l’è antica… e l’è cusì bela che no’ te pol no’ volerghe ben subito.
La cesa l’è San Giovanni in Valle: una de le più antiche de Verona. La so origine la se perde ne le nebie del VI° secolo, quando qua ancora regnava Teodorico. I goti come lu i era cristiani, ma de rito arian… cusì volendo farse la “so” cesa i se l’à costruì nel “vallo”, ‘rente a le mura del castel e vissin a una de le più antiche sorgenti de la çità: la “Fontana del fero”.
De quela prima costrussion ancò resta poco, essendo stà demolì (insieme a bona parte de Verona) dal devastante teremoto del 1117. Però dopo ’l disastro la prima cesa a èssar ricostruì l’è stà propio San Giovanni in Valle… completà in solo tri ani ne le bele forme romaniche che podemo védar ancora ’desso.

Nel XII° secolo tacà a la cesa è nata la “Collegiata”, in pratica un seminario, che al giorno de ancò l’è la più antica casa abità de tuta Verona. L’interno de la cesa l’è a tre navate, con l’altar sopraelevà e dó scale laterali che le porta zo, a la cripta. L’inpostassion l’è tipicamente romanica e la podemo ritroar quasi stessa anca a San Zen. Ne la cripta ghè dó sarcofagi de marmo che secondo la tradission i contien i resti de San Simone e de Giuda Taddeo. Ne la navata, longa e streta, se pol védar su i muri qualche tòco de afresco. E pensar che ’na òlta l’èra tuta afrescà. Ma quel che no avéa scancelà secoli de teremoti e umidità l’è stà spassà via in un colpo solo el 10 Otobre 1944, quando ’na bonba l’à centrà in pieno la navata. Mile ani de storia i è ’ndà in frégole e de la cesa è restà in piè solo fassada e abside… Un po’ come San Benedetto a Norcia, solo che qua a causar el disastro no’ l’è stà un teremoto, ma la stupidità umana. Comunque par la seconda òlta ne la so storia San Giovanni l’è stà ricostruì e, giusto el 10 Otobre de l’ano dopo, ghè stà l’inaugurassion.

Se un miracolo cusì i è riussì farlo nel ’45, ghè speranse anca par la pora Norcia! Concludo con qualche curiosià: el nome “Valle” el vien da “Vallum”, el slargo ’rente le mura. No ghè nissuna fontana “de fero” o de bronso o de rame… El nome “Ferro” el vien da “Feronia”, ’na divinità pre-romana ligà a l’aqua (parché ’na sorgente la ghè). A le sóghe che péngola ne la base del campanil se ghe taca i campanari quando i fa ’l concerto… e l’è un spetàcolo védarli destacarse da tera quando che la campana la ié tira su. Podarìa parlarve de San Giovanni par ore… ma l’unica maniera par descrìvar la poesia de ’na cesa cusì l’è propio… ’na poesia.

 

A SAN GIOVANNI IN VALLE

Ceseta antica de san Giovani
che piantà su la fronte de Verona
te pari ’na corona…
stasera son tornada ’n’altra òlta
a i sogni che me incioda al to porton.
Son tornada, ma sensa apuntamento
che l’è un bel tòco che no’ spèto più.
Pur un s-ciocar de passi sul saleso
me desmissia nel pèto un eco fonda
e struco i pugni infìn a farme mal.
Ceseta tuta vòlti e colonete
’ndó la campana sona in cortesela
co’ le sóghe infìn tera,
el tempo tute dó n’à sbalotado…
ma se drento son salda come ti
par de fóra me invecio solo mi.

 

Wanda Girardi Castellani
Mirco Castellani