L’Angolo de la Wanda – Gennaio 2017 – “Na cesa venessiana a Verona“

…a cura di Graziano M. Cobelli

gcobelli05@gmail.com

Quatro Ciàcoe: da Verona

Na cesa venessiana a Verona

A Verona l’Adese dopo la seconda curva, el se trova a passar in un punto dove dó grande cese le se varda da ’na riva a l’altra. Quela a destra, in ponta a la çità storica, l’è el Domo: belo, grande, antico… sede del Vescovo e conossù da tuti. Invesse quela a sinistra del fiume l’è conossù poco parfin da i veronesi… La se presenta de fianco su ’na strada senpre traficà e solo el canpanil basso e largo el fa capir che ’l muro arente, fodrà de finestre, no l’è quel de ’na casa qualunque, ma l’è quel de ’na canonica.

La cesa la se ciama San Giorgio in Braida (da la parola longobarda “breit” che anticamente voléa dir “slargo”, parola che l’è a l’origine anca del nome de la piassa “Bra”) e l’è una de le cese più particolari de tuta Verona. Par scominçiar la ga la cupola. A parte qualche altro raro caso, tute le cese storiche de la çità i è sta fate (o rifate) in epoca scaligera… perciò in stile romanico e senpre sensa cupola. Invesse sora San Giorgio ghè un bel cupolon, alto, a mèsa-sfera, montà su un tamburo circolare e coronà da la classica “lanterna”. Intorno a la cupola ghè anca quatro curiosi pinacoleti a forma de obelisco, par contribuir al slancio verticale. Su i fianchi de la cesa de i contraforti in muratura i scàrica el peso verso la base. Tuto l’insieme el ricorda de sicuro ’na cesa venessiana: San Giorgio Maggiore o el Redentor (par dìrghene un par)… e ghè un parché, che adesso ve conto.
Le origini de San Giorgio in Braida i è antiche: za nel lontan 1046 in quel punto ghera un monastero de i Benedetini, demolì dal teremoto del 1117 e ricostruì subito dopo in forme romaniche. De la prima costrussion ancò no resta altro che ’na parte del chiostro e la base del canpanil. Nel 1442 el monastero l’è stà dà a i Canonici de San Giorgio in Alga, venessiani, che a l’inissio i s’à limità a sgrandarlo un poco. Nel 1536, quando i ga ’vù ’bastansa schèi messi da parte, i à comissionà al grande architeto Michele Sanmicheli la ristruturassion conpleta de cesa e canpanil, racomandàndoghe che el risultato el fusse in stile venessian (forsi parché i gavéa nostalgia de casa). Eco alora che la çesa l’è a navata unica con oto capeline laterali, quatro par parte, e ’n abside insolitamente longo… creà aposta par ospitar tre giganteschi telèri (caso unico a Verona). Entrando ne la cesa l’ocio el casca subito sul quadro centrale, posissionà sora l’altar magior e incornisà da quatro colone (du par parte) e un tìnpano triangolare. El quadro el rafigura el martirio de San Giorgio: così che ’na volta tanto el santo cavalier no ’l sta mia copando el drago, ma i è altri che i sta copando lu. L’opera l’è un capolavoro de Paolo Caliari e oltre che par le so grande dimensioni el colpisse par l’intenso color celeste che el ga el cel, dovù a la profusion de pólvar de lapislazuli che el pitor veronese l’à usà. El “Martirio di San Giorgio” (ricordémose che i paroni de casa i era i canonici de San Giorgio in Alga) el ciapa subito l’atension, ma caminando fin a metà cesa, se vede finalmente anca i du grandi telèri che ghe fa conpagnìa ne l’abside: la “Moltiplicazione dei pani e dei pesci” del Farinati, a sinistra, e la “Manna nel deserto” del Brusasorzi, a destra. Ne i du quadri ghè ’na densità de gente paragonàbile a quela che se pol trovar in via Massini al sabato sera… e oltre a le persone cani, cavài, careti, de tuto e de più. Da notar che nel primo quadro, più o meno al centro, ghè anca un bel cagneto con la coa alsà drio far i so bisogni con aria indifarente. Ma i telèri de l’abside i è solo l’inissio… tanto che Goethe, quando l’è vegnù a Verona, l’à definì San Giorgio “na galerìa d’arte”. Le capeline laterali le ospita tute quadri… ghè ’n altro “Veronese” (el Miracolo di San Barnaba), un Jacopo Tintoretto (el Battesimo di Cristo), ’na Pentecoste de so fiol Domenico, ’na Annunciazione del Caroto e via disendo. Notevole anca la “Madonna della Cintura” de Girolamo dai Libri… ’Sto pitor, come dise el nome, el s’avéa formà come miniaturista e l’à continuà a doparar ne i so quadri la stessa precision inparà nel far le miniature, unì a un stile che el ricorda tanto el Mantegna. Nel quadro se vede la Madona in trono con da ’na parte San Zen, patrono de Verona, e da l’altra Lorenzo Giustiniani, fondador de l’Ordine dei Canonici de San Giorgio in Alga. Quadri a parte però la navata la risulta un po’… fredina: essendo neoclassica se vede tanti marmi e tante colone, ma manca quel senso de calor che te dà i muri de matoni rossi de le cese antiche.
De neoclassico San Giorgio l’à anca la fassada, rifata nel ’700. El resto de l’esterno l’è ’n’incredibile sovraposission de costrussioni. Dovemo pensar che par secoli questo l’è stà un monastero: i canonici i ghe stava de casa e el spassio a disposission l’era senpre poco. Par esenpio el chiostro che adesso vedemo, da la parte de l’Adese, l’è stà par secoli un “brolo” dove i canonici i somenava l’insalata e i fasòi. ’Na roba interessante (ve n’ò za parlà nel nùmaro de Magio 1998 de Q.C.) l’è el “Cristo inpiturà co l’erba”. A mèsa cesa se vèrse ’na portesina che la dà su ’na capelina longa e streta: la prima roba che se nota entrando l’è che la parete de fronte l’è tuta tapessà de ex-voto. L’è raro che in ’na cesa de Verona ghe sia ex-voto… de solito se ’i trova ne i santuari. In fondo, sora l’altar, ghè l’afresco che mostra el Cristo che porta la Croce. El disegno l’è sènplice, ma no l’è mia bruto… el color però l’è tuto sul verde: varie tonalità de verde. La tradission la vol che l’afresco el sia stà fato da un soldà venessian nel periodo scaligero, doparando l’erba catà sù in riva a l’Adese. De sicuro nel corso de i secoli atorno a ’sta imàgine sacra s’à svilupà la devossion popolare, e la serie de ex-voto la dimostra che qualche volta el Cristo porta-Croce el scoltava le preghiere. Tornando a l’esterno, subito de fronte a la cesa ghè una de le “porte” de Verona: Porta San Giorgio (oviamente…). Fin a l’epoca austriaca i bastioni i rivava a tocar l’Adese e par entrar in çità bisognava passar proprio da lì. Adesso i bastioni i è stà tajà e la “porta” l’è restà isolà da ’na parte, come se la fusse un “arco” romano… ma de l’antica funsion militare resta ancora du “ricordi”: ’na serie de conplicate fortificassioni che le riva fin al fiume e la fassada de la canonica tuta buterà de “buseti”… i “buseti” i è stà lassà da le fusilade de i francesi el 18 otobre del 1805 durante el scontro con i austriaci, tentando de entrar in çità. Ghe sarìa ancora tanto da dir su San Giorgio in Braida… ma par conclùdar ve digo solo ’n’ultima roba: la mèrita la visita!

Wanda Girardi Castellani
Mirco Castellani