L’Angolo de la Wanda – Settembre 2016 – “El trasporto via fiume”

…a cura di Graziano M. Cobelli

gcobelli05@gmail.com

Quatro Ciàcoe: da Verona

El trasporto via fiume

 

Nel Q.C. de diçembre 2015 v’ò parlà de l’eroe seteçentesco Bartolomeo Rubele, ciapando spunto dal lungàdese che a Verona porta el so nome. Proseguendo longo el fiume, se incontra anca el lungàdese Re Teodorico e el lungàdese Attiraglio. E qua scominçia la nostra storia…
Cosa vol dir “attiraglio”? Tempo fa avéa provà a domandarlo a qualchedun: uno el m’à risposto che vol dir “ammiraglio”, solo che l’è scrito mal. ’N altro el pensava che el fusse un cognome… magari un çerto “Bepi Attiraglio”. Invesse quela parola la ne riporta a un mondo che no esiste più da çentoçinquant’ani, qualcosa de desmentegà e che adesso andèmo a riscoprir!
Quando ciapemo l’autostrada, la trovemo piena de camion: l’è tuta roba che vien spedì da na çità a l’altra. Ma prima che ghe fusse l’autostrada? Beh, se usava el treno. Ma prima che ghe fusse el treno? Le strade fin a metà Otoçento i era pìcole, brute e sterà… bòne al massimo par andar a piè o a caval, no çerto par spedir carichi pesanti. Èco alora che se usava i fiumi. Grossi barconi, piati e larghi, i se spostava par tuta l’Europa su autostrade fate de aqua. Ma come faséveli a móarse, visto che no ghera el motor? In zo bastava lassarse portar da la corente… i barcarói, usando el timon e de le longhe pèrteghe, i doveva solo evitar de ’ndar a sbàtar o arenarse. Controcorente invesse le barche le vegneva tirà (eco cosa vol dir “attiraglio”) da òmeni, cavài o bo (a seconda del peso) ligadi a de le longhe sóghe (singe) che i caminava su marciapiè ricavà a fianco del fiume (le “alzaie”).

L’“attiraglio”, dito anca “alaggio”, l’era ’na fadiga antica e difusa: parfin in Russia se tirava a man le barche par i 3500 km del Volga. La nostra Italia però a sud de i Apenini l’è streta e montuosa, grandi fiumi no ghe n’è… ma a nord se vèrse la Pianura Padana. Nel corso de i secoli era stà creà ’n’incredibile rete de canài par métar in comunicassion le çità col Po, vera spina dorsale del sistema. Bologna, Padova, Brescia e Milan i era piene de “navigli” che, rivando fin in centro, i permetéa de portar (par esenpio a Milan) le pière del Domo fin al so cantier. La Repùblica de Venezia (che de aqua le se ne intendéa) l’avéa fato un lavoro ciclopico par rèndar navigabili i fiumi che finiva in laguna… Oltre che el Po le so “strade” i era l’Adese, el Bacchiglione, el Brenta, el Sil, el Piave, el Livenza, el Lemene e el Tagliamento.
El “TIR” più usà l’era el “burcio” (o burchio). Par capir quanto el fusse antico basta dar n’ociada a la Divina Commedia (Inferno, canto XVII, vv 21-22): “come talvolta stanno a riva i burchi / che parte sono in acqua e parte in terra”, el scrivèa Dante nel ’300. Insieme al pesante “Burchio” se tirava anca la “Padovana” e la “Panciana”, più altri tipi de barche, via via più pìcole, fin a rivar al comodo “Burchiello”… che ancò se podarìa paragonar a un fungonçin: bon par portar cassete de pesse, ma anca par ’ndar a far ’n giro con la fameja la domìnica.

Su l’Adese se tirava i burci da Ciòza fin a Bolzan. Ne la prima parte, fin a Verona, el fiume l’è ’bastansa largo e no ’l traversa grosse çità: Cavarzere e Legnago i era posti dove i cavalanti i faséa sponsar le bestie e i barcaròi i se concedéa ’n goto de vin. Verona però l’era difìcile da passar: ghera i ponti, i mulini, le case che dava su l’aqua, la stretoja de Cerain… comunque passà Verona e inbocà la Valdàdese l’era tuto un drito fin a Bolzan. Ancora adesso su la riva sinistra de l’Adese se pol védar le vece “alzaie” da poco trasformà in piste ciclabili… e con un po’ de fantasia se pol imaginarse, invesse de i ciclisti che pedala, i cavài e i bo che a testa bassa, ligà a le sóghe, i tira i burci in mèso al fiume.

Wanda Girardi Castellani
Mirco Castellani