L’Angolo de la Wanda – Febbraio 2016 – “El Santuario de la Madona de Lourdes a Verona”

…a cura di Graziano M. Cobelli

gcobelli05@gmail.com

Quatro Ciàcoe: da Verona

El Santuario de la Madona de Lourdes a Verona

Le colinete a nord de Verona le vien ciamà “Toresele”. El nome el vien da i fortini tondi (le torri) che i austriaci i avéa costruì a l’inissio de l’800 co ’l scopo de trasformar la nostra çità ne l’angolo più inportante del “quadrilatero”.
Passà el Risorgimento i fortini i è andà oviamente in disuso. Durante la prima guera mondiale el fronte l’era distante… ma durante la seconda i tedeschi, visto che ghe interessava la çità par la so posission strategica, no i s’à fato scrupolo de dopararli de nòvo. Uno in particolare l’era inportante: el Forte San Leonardo. L’era stà costruì nel 1838 su ordine del famoso maressial Radetzky (ciamà “radecio” da i veronesi) su la più alta de le coline de Verona, in modo che da lì se podesse dominar tuta la çità.
La forma l’era a mesaluna, con un “corpo” centrale e dó longhe “ale” piene de feritoje. El forte el podéa ospitar quasi 300 persone, più siè canoni de grosso calibro e altra artilierìa più pìcola. I tedeschi nel ’43 oltre a restaurarlo e dopararlo da l’8 setembre fin a la fine de la guera, i ga dà anca la triste funsion de centro operativo e de preson politica. Dio solo sa quanta gente è stà torturà ne i so soteranei e quanti altri i è stà fusilà contro i so muri! Oviamente i Aleati i era a conossensa del forte (e de la so funsion) e i à çercà continuamente de bonbardarlo. Finì la guera, ne i ani ’50, el forte San Leonardo l’era ridoto a un spetàcolo pietoso: da la çità, guardando in diression de le toresele, se le podéa védarle dominà da ’sta spece de bruto dente bianco e carolà. Restaurarlo l’era inutile… demolirlo: cotoso e ancora più inutile. Così nel 1952 s’à trovà ’na solussion geniale: trasformarlo in santuario.

Dovì saver che in piassa Çitadela, in pieno centro e a du passi da la Bra, ghera fin dal 1908 un santuario dedicà a la Madona de Lourdes. L’edificio, costruì in ocasion del çinquantesimo aniversario de l’aparission, e gestì da i Stimatini, l’era andà completamente disintegrà el 6 aprile 1945 soto le bonbe americane (a proposito de i obietivi militari). Incredibilmente de tuto el santuario s’avéa salvà proprio la statua de la Madona, opera del scultor Zanoni, catà miracolosamente integra sora ’na montagna de calçinassi dopo aver fato un volo da quindese metri de altessa.

Così è nata l’idea: i Stimatini i dava l’area in Çitadela al Comune (par farghe case) e in canbio ghe vegnéa dà el forte San Leonardo, par ricostruirse el santuario ne la so bela posission sora le toresele! El progeto l’è stà afidà a l’architeto veronese Paolo Rossi de’ Paoli (autor de altre cese de Verona, una fra tute el Tempio Votivo). El compito ’stavolta no l’era facile: el forte, anca se danegià, l’era pur sempre ’na strutura inponente, con muri de tre metri de spessor, creadi aposta par resìstar a le bonbe… e oviamente bisognava spèndar el manco possibile. Pensa che te pensa el nostro architeto l’à trovà la solussion, sènplice e originale: quela de conservar le fondamenta, el primo piano e le “ale” laterali del forte austriaco, inseréndoghe però in centro ’na grande cupola, così da non scóndar, ma rèndar ciaro come un qualcosa nato par èssar strumento de morte el fusse stà trasformà, con passiensa e amor, in un simbolo de paçe!
I schèi… beh, pian pian se i l’à trovà! I era ani che anca se l’andava mal, la gente la faséa manco fadiga de ’desso a vèrzar el portafojo par ’na bona causa. I lavori i è scominçià nel 1958, a çento ani giusti da l’aparission de la Madona e i è andà avanti veloci fin al 1964, quando, el 13 Giugno, mons. Giuseppe Carraro l’à podù finalmente far l’inaugurassion. La statua de la Madona, sopravissù al bonbardamento e sfolà da quasi vint’ani, l’è stà posissionà a l’esterno in un ìncavo ricavà nel bastion de piera che circonda el forte… restando però visibile da sora l’altar magior atraverso ’na grande vetrata trasparente.

Davanti al santuario, dó grande scale le porta a l’ingresso de la cesa (da dove se vede un panorama de Verona belo da cavar el fià) e ’na porta laterale la dà sul piano tera, che el conserva ancora la parte originale del forte San Leonardo: oltre a varie stanse par i grupi in pelegrinagio o usabili par mostre (memorabile una de icone russe qualche ano fà) ghè anca un museo con tuta la storia del forte e la documentassion fotografica de la so trasformassion in santuario mariano.
Come altri santuari anca questo l’è sempre stà in evolussion: nel 1997 el cardinal Nicora (futuro Vescovo de Verona) l’à consacrà el novo altar. Nel 2000 è sta posissionà le vetrate e parfin qualche statua del primo santuario, recuperade nel ’45 e finalmente restaurà. Nel 2003 padre Flavio Roberto Carraro l’à inaugurà el “Percorso del Rosario” co’ la so fila de capeline.
Tanti veronesi no i sa de averghe a disposission ’sto tesoro: da la çità in màchina rivarghe l’è un àtimo… el posto par parchegiar no ’l manca mia e da lì sora se pol védar un spetàcolo superbo. Vissin al santuario ghè un bar e ’pena fora ghè un ristorante, con la possibilità de magnar qualcosa (dal panin a la pastasuta), godéndose intanto fresco e panorama. E dopo se pol andar a trovar la Madona… ’na Madona che à visto tute e du le guere, che l’è stà bonbardà e sfolà, postà a un muro de piere esagonali austriache pensà più a protession de i canoni che a protession de la Mama de Gesù… un posto però dove “L’amore vince sull’odio”, come recita ’na famosa preghiera.

Wanda Girardi Castellani
Mirco Castellani