L’Angolo de la Wanda – Ottobre 2016 – “Carlotta Aschieri”

…a cura di Graziano M. Cobelli

gcobelli05@gmail.com
Wanda Girardi Castellani


Quatro Ciàcoe: da Verona

Carlotta Aschieri

L’ultima casa de via Mazzini a Verona, dove na volta se trovava el storico Caffè Zampi, e dove xe stà copà Carlotta Aschieri
La lapide  che ricorda la morte de la pora dona Carlotta Aschieri

A Verona, sul muro de ‘na casa che fa angolo dove via Mazzini la finisse in piassa Bra, ghè da çentoçinquant’ani ’na lapide. Pochi tra i turisti che riva de fronte a l’Arena i nota anca ’sta piera bianca… ma quei che le fa i pol lèsarghe sora de le parole: “IN QUESTA CASA CARLOTTA ASCHIERI, VENTICINQUENNE E INCINTA, CADDE TRUCIDATA DAGLI AUSTRIACI. ULTIMO SFOGO DI MORIBONDA TIRANNIDE. 6 OTTOBRE 1866.” Ma ci èrela Carlotta Aschieri?
No l’era ’na patriota… in un’epoca piena de patrioti l’era solo ’na pora dona che la s’à trovà nel posto sbalià nel momento sbalià. Ma vedemo mèjo cos’è sucesso. El 6 Otobre 1866 era ’pena stà publicà la notissia che la guera l’era finì… In più, el tratato de paçe (firmà a Vienna tri giorni prima) el prevedéa che el Veneto el passasse par un po’ a la Francia (tanto par canbiar) par vegner finalmente a far parte de l’Italia dopo un referendum popolare. Così Verona l’era in festa! Come par magia quel giorno la s’avéa impenì de bandiere tricolori e fin da matina ne le strade ghera gente che balava e cantava. El centro de i festegiamenti l’era Piassa Erbe, soto la Tor Lamberti dove el Rengo el sonava a martel par la prima òlta da i tenpi de le “Pasque Veronesi”.
I austriaci invesse i s’avéa riunì in Piassa Bra par èssar più vissini a la Gran Guardia e a l’Arsenal. I “cruchi” i era in tension… Dopo èssar stà i paroni assoluti de Verona par quasi setant’ani adesso i gavéa paura e, avéndoghe paura, i era anca più pericolosi. Da la létara scrita qualche giorno dopo da ’na çerta Maria De Stefani a so nona, se pol çercar de ricostruir come i sia ’ndà i fati. Verso sera da Piassa Erbe è partì un corteo (autorizà) che, tra canti e bandiere, l’à percorso tuta via Mazzini (che alora la se ciamava Via Nòva) rivando in Bra. ’Na òlta rivà in piassa, finché i veronesi i stava tacando bandiere a le finestre e volantini a i muri (con scrito: vota Italia!) un uficial austriaco, un istrian, l’à scominçià co’ la spada a sbregar via tuto. Quando i à proà a fermarlo l’à çercà anca de colpir la gente… a sto punto qualchedun el ga roto ’na carega su la testa, lassàndolo morto sul colpo. L’è stà la sdinsa che à fato scadenar la reassion: i austriaci i s’à lancià sul corteo con le spade sguainà e la gente l’à scominçià a scapar da tute le parte. Qualchedun intanto el çercava de fermarli a colpi de sassade (e de caregade), faséndoli infuriar ancora de più. Ne la casa dove adesso ghè la lapide, alora ghera un bar… o un “caffè”, come i le ciamava ne l’800: el Caffè Zampi. Li dentro s’avéa rifugià de le persone… Visto che fora era stà tacà ’na bandiera, de i soldà de la Wimpfen i è entrà dentro, menando siabolade a tuti quei che capitava a tiro. A la fine de la baraonda, quando i animi i s’à calmà, tra i austriaci s’à contà tri morti e 15 feriti. Tra i veronesi i feriti i è stà ’na vintina. L’unica vera vitima però l’è stà ’na dona al sètimo mese de gravidansa: Carlotta Aschieri, ferì da un colpo de spada come so marì Giuseppe (che l’avéa çercà de difèndarla) e morta schissà ne la calca dentro al Caffè Zampi.

L’altra lapide che ricorda Luigi Lenotti

Ne l’Otoçento par i òmeni l’era normale coparse uno con l’altro… ma le done le ’ndava rispetà, specialmente se giovani e incinte! Così ’sta assurda morte l’à lassà el segno ne la memoria de i veronesi… deventando un po’ el simbolo de tute le persone inocenti coinvolte ne le guere. Diese giorni dopo, el 16 Otobre, da Porta Vescovo entrava l’esercito italian e i ultimi austriaci i se ne tornava al de là de le Alpi… lassando ’na çità piena de fortificassioni mai usà, de caserme ude, e tanti bruti ricordi. Tacà a un canton de la stessa casa ghè anca n’altra lapide: la ricorda Luigi Lenotti, fusilà a 18 ani el 29 setembre del 1860 par aver senplicemente sinpatizà par Garibaldi.

 

Wanda Girardi Castellani
Mirco Castellani

↓