L’Angolo de la Wanda – Giugno 2012 – “Végnar veci”

…a cura di Graziano M. Cobelli

gcobelli05@gmail.com
Wanda Girardi Castellani

Quatro Ciàcoe: da Verona

Végnar veci

Lì, da la matina a la sera, senpre a spetar… spetar…

Se usa dir che… “no’ l’è gnente végnar veci… quando che ghè la salute e la voja de vìvar!” Ahimè… rivadi po’ a i “anta” taca za a fiocar le magagne: tute le matine una de nova. El mecanismo l’è, più o manco, quel del moimento de ’na bala su un’asse legermente piegà verso el basso. Da prinçipio la bala la se sposta pian a pian, ma po’, pian a pian, grassie a l’acelerassion che la gravità la che imprime, la aumenta de velocità andando a la fine, in m… a pico!
I primi sintomi i è: el cavel bianco scoperto con teror, petenàndose el ciufo ’na matina o le rughete a ventala sbocià intorno a i labri o soto a i oci in do borse che le someja senpre de più a de i zàini tirolesi. Scominçia cusì el crussio de le tinture e de i çento altri truchi nati par inbrojar el prossimo e ’l lunario. Le done, se da prinçipio le se limita a la coression del so color natural, col tempo fatalmente le deventa rosse, senpre più rosse par po’, viçine oramai a pelarse, deventar bionde! I òmeni, salvo senpre più rare ecessioni, i ga da rassegnarse a andar in piassa bastansa presto! La cèrega, paraltro, no’ se la vede, almanco vardàndote de fronte, cusì i è pochi quei che se arende al paruchin, votando de preferensa par la petenadura a la Yul Brynner.
Altro problema: i denti! Qualchedun fortunado e co’ le scarsele a dopio fondo, de i ani che rùgola via no ’l se tol peso. Quei altri che no’ i ga la barca de milioni che ghe costarìa el dentista, i va in olta co’ un soriso che ’l par stanpà su un muro da castel co i merli a la ghibelina.
Tuti i santi giorni, tivu, radio e giornài i te conta de gajardi vecioti ultrasentenari e te vien da dir che l’è propio vera che el progresso el ga dà ani a la vita: pecà che no ’l gabia dà anca vita a i ani!
Verghe ’na età de ’sto genere vol dir èssar soli come tanti cani in cesa parché, tuti: amiçi, parenti e conossenti, a ’sto punto, i è andà a magnar el radecio da la parte de la soca. El mondo, oramai no’ i lo riconosse più anca se a vardar ben no’ l’è mai stà cusì pien de solitudine e de silensio ne l’esplosion de miliardi de telefonini. La gente par la strada la par serà tuta in ’na gabia inpenetrabile a qualunque recia; telefonin in man (’desso l’aparechio l’è pure invisibile in quanto l’è un botonsin infilà in te ’na recia) el sguardo perso nel gnente i va in olta sensa saver andove col sotofondo de musiche balorde òrfane de pentagrama.
Le case de riposo
Quei de la me età i dise, col tono de ci conta ’na rosaria, che a i so tenpi el vecio nono sentà sul caregoto ’rente al camin co’ la cuerta su i zenoci, la bareta de lana e la pipa in boca, propio un re sul so troneto, l’èra rispetà da tuti come un oracolo de sagessa. La fameja l’èra anca alora “slargà” ma da le nore, da i cugnà e da i neodi. I veci no’ i èra mai soli!
L’è pur vera che ne le case, la stragrande magioransa sensa riscaldamento, da i veri crepà vegnéa drento vento e fioca, piova e tompesta e el vecio el se ciapava prima o po’ ’na polmonite che in quatro e quatr’oto la lo mandava fora da le spese. Ghèra de belo che ’l trapassava nel so leto con la fameja intorno.
Ancó le done che se vota al laoro de casa i è mosche bianche e tute le altre le sta fora, a la parità co i òmeni, da la matina a la sera. Oviamente i buteleti, za a manco de du ani i le sbate a l’asilo nido, salvo quei che i ga la fortuna de averghe qualche nono ancora in salute e disponibile a tenpo pien.
E vien la matonada più grossa quando a star mal i è propio i noni, e alora… “el veceto dove lo meto, dove lo meto?” El primo tentativo de cavàrselo da le scatole l’è l’assunsion de la badante… e qua scominçia la storia dolorosa del va e vien de done de tute le età e tipo. A Verona spòpola le rumene e le moldave, queste generalmente de la Transilvania, tera de Dracula, el celebre vampiro; ’ste ultime tegnù, prudentemente a le larghe con qualche tressa de ajo… che no se sa mai!
Qualcheduna l’à inparà za a parlar in italian (quele che è vegnù in casa mia le parla inveçe veronese) e tute le ga virtù casalinghe. Messe a confronto de le italiane lavoratrici fora de casa, a i oci de i nostri òmeni le brila come stele. Ma vien el momento che a l’orisonte se profila l’estrema solussion: “la casa de riposo” overo “el ricòvaro”. Le ga tanti bei nomi prometenti: “Villa dei tulipani”, “Casa dei fiori”, “Villa del nastro d’argento”, ecc., ma i è fate de camarete a du posti; leti da frati con sponde de fero andó, par conpletar l’opera, i te ghe mete insacà in un pissoto che ’l te riva a le lesene. Ghè un armaron a do ante e, in “prima classe”, un taolin con do careghe. La rèta l’è su i domila euri, ma quei i è solo el scominçio. Te ghè, a parte, da pagar una infermiera: quela che te lava… te taja le onge e a la matina la vien a tirarte zo dal leto. E el conto no ’l finisse mai; méteghe qualche medissina, qualche telefonada e to fiói, che a forsa de “cinghia” i s’à fato sù quatro muri, i ga da véndarli par pagarte el conto! Che belo… dopo ’na vita de sgobo, andar “a i du leoni” compagnà da acidenti e maledissioni!
Ti intanto, spetando che i cata ’na mes’ora par vegnerte a trovar, te meni la to vita col solito tristo tran-tran: a la matina, dopo el cafelate longo come el passio… (ché i veci i ga da star legeri) messo ben streto el fatal panolon, i te piassa su la carossina, e i te parchegia a l’onbra soto ’n àlbaro in assenbramento con i altri “ospiti”. Lì, da la matina a la sera, senpre a spetar… spetar… la minestrina de dado, el meso pomo coto e l’ora de andar a cucia.
Belo vègnar veci? Mi digo de nò… ma d’altronde, par no scapussarghe drento ghè ’na sola maniera… e l’è anca pèso!

Wanda Girardi Castellani

↓