L’Angolo de la Wanda – Dicembre 2012 – “Che la sia vera? Mèjo amar sensa sucesso che aver sucesso senza amar”

…a cura di Graziano M. Cobelli

gcobelli05@gmail.com
Wanda Girardi Castellani

Quatro Ciàcoe: da Verona

Che la sia vera? 
“Mèjo amar sensa sucesso che aver sucesso senza amar” 

’Sta frase la usava ripètarla la me amiga Teresa, ’desso nel mondo de i più. Una volta pensavo che la gavesse rason, ma ’desso, rivada a l’età quan’ che se pesa col balansin de l’esperiensa fati, persone e robe, no’ de son più tanto sicura. A vardar ben, se podarìa dimandarse che gusto ghè a ’verghe l’amor, par quanto grande el sia, de ci no ne interessa un figo! El sarìa solo ’na secadura… un tedio e penso proprio che almanco ’na olta lo avemo sperimentà tuti quanti, cambiando strada par non incontrar el sgradido inamorà o infilando adiritura un porton par no’ catàrselo facia a facia.
L’è altretanto vero che l’è un martirio no’ èssar ricambiadi quando semo noialtri a ’ver inpegnado el cor fin a la radisa. Comunque in ’sto caso se pol senpre inpenir la vita anca con el solo fato de poder incontrar l’ogeto de i nostri sogni… védarlo, sia pura da lontan, sentirde la voce, respirar la so stessa aria sensa contar el stìmolo che la ghe ne guadagna la nostra Musa (beninteso… quando ghe n’emo una!).
Sbolognado el preànbolo entremo ne l’argomento “Marco”, cioè el tissio par el qual la me amiga l’à çercà de entrar con largo anticipo al Grand Hotel “Ai du leoni”… ossia al nostro cimitero monumental, guardado da i du leoni indormensadi in cao de la scalinada, òpera del scultor Francesco Pegrassi.
El papà de la Teresa l’èra a capo de n’assienda e ’l gaveva tra i so operai un “pupilo” destinà a sucèdarghe ’na olta andà in pension. El piano de batalia l’èra ben organisà e la butela sburtonà da parenti e amissi oramai l’èra cota a puntin. Nel mese de magio Marco el vegneva a torla, el la portava al “fioreto”. Quando po’ se faseva le festine da balo in casa col fonografo a manovela la Teresa e Marco i faséa copia fissa. Ma el tempo el passava e lu no ’l se dichiarava.

Te me si simpatica, te me dedichi de le bele poesie e te ghè tante bele virtù, ma mi…

L’ultima sera de magio, manovrando par destacarlo dal grupo, col cor che bateva fin a farghe mal, la Teresa la gavéa ’vu el corajo de dirghe: “Ma, insoma, cosa sonti mi, par ti?”  La risposta l’èra stà ’na cortelada: “Te me si simpatica e te me dedichi de le bele poesie. Te canti, te soni la fisarmonica e te ghè tante altre virtù, ma mi voi ’na dona tuta casa e cesa e par la verità l’ò za catada! Sèguita pure a dedicarme le poesie… ghe i ò fate lèsar anca a me morosa.”
Cusì la pora Teresa l’à capì d’èssar deventà anca el so zinbel.
L’èra ’na sera limpida de magio. Soto un cel de veludo trapuntà de stele, le sigale in concerto le faséa a gara co’ le surle! Come ogni altra sera la campanela argentina de le clarisse la ghe dava la bonanote a i fedeli de ritorno dal “fioreto”.
Dal vial sgonfo de “tigli” caressadi dal vento vegnéa un profumo che incantava.
Con i oci pieni de làgrime ’na buteleta de 16 ani nel silensio e nel segreto de la so camareta la se stava invelenando. Par fortuna so mama la se n’èra acorta e subito l’avéa ciamà el dotor de fameja el qual con ’na memorabile lavanda gastrica l’à messo a posto le robe. Fortunatamente la dose massicia de grani de riçin che se usava par far el saon (bastansa par far fora anca un caval) el gaveva fato a la me amiga un efeto revulsivo cusì, alternando par qualche giorno el vomito a la dirèa, la Teresa l’à visto finir un grande amor in maniera par gnente poètica!
Ani dopo tuti du sposadi, Marco e la Teresa i s’à incontrà el du de novembre sul vial del cimitero e alora, co’ la maurassion che vien co’ i ani, in te ’na bruscà de minuti la me amiga la s’à dimandà cosa mai l’avesse visto, un tenpo, in quel’individuo piato come ’na tola e insulso come un ràvano. L’à proà cusì, postuma ma non par questo manco broènta, la rabia par quei lontani giorni che i avarìa podù svòlgiarse felissi nel colorado senario de la primavera de la vita, mentre invesse i avéa ris-cià de èssar falciadi a raso par quel tórsolo che no’ l’avarìa mai podù indovinar, qual richessa d’amor ghe fusse passà vissin, ignorada.
Pensavo a la Teresa, caminando imersa in ’na calinverna da la qual filtrava solo a trati la luce straca de i lampioni e guardando le figure fretolose che le apariva e le spariva come ingiotide da na fissa gabana… cusì simili a serte ilusioni, e co’ le orassioni de la note ò ringrassià nostro Signor par no’ averme contentà, dàdome par conpagno quel sogno fato de gnente… che, peraltro, l’èra riussì par ani a darghe fogo al me lapis.
L’è proprio vera…: mèjo amar sensa sucesso che aver sucesso sensa amar!

Wanda Girardi Castellani

↓