L’Angolo de la Wanda – Settembre ter 2002 – “‘Na voçe bela da la bela Sardegna”

…a cura di Graziano M. Cobelli
gcobelli05@gmail.com
Wanda Girardi Castellani

Quatro Ciàcoe: da Verona

‘Na voçe bela da la bela Sardegna

(artisti in soasa)

Tuti, o quasi, g’avemo ‘na qual antipatia o simpatia par gente de altri paesi. Mi, par esempio, de simpatia ghe n’ò tanta par i sardi, tanto che, da almanco vint’ani, me porto in scarsela la tessera de socia onoraria dei “sardi nel Veneto”. Nela sede de Verona, in Campofior, specie ai tempi del mai desmentegà primo Presidente, dotór Maxia, ho recità in compagnia dei poeti isolani (anca se i ò capìdi gran poco) col sotofondo dei famosi, carateristici “tenores” in costume.
Anca se son prevalentemente vegetariana, con lori ò partecipà a memorabili çene a base de porseleti da late coti su le brase, infiladi su longhi spedi e pò’ servì su piati de scorse de albaro, su leti de mirto. ‘Na òlta ò anca gustà dele fetine de pan spenelà de ‘na paradisiaca crema de formaio… almanco fin che no’ m’è vegnù l’ispirassión de infilarme i ociai parchè a ‘sto punto me son inacorta che el “paradisiaco” formaio el caminava de bruto!
I amiçi del club vedendome cambiàr de siera i s’à quasi ofesi; òstrega, par lori “l’autoformaio” l’è el massimo de la bontà! Ghe fusse stà’ me papà; lu si che’l magnava de gusto el formàio verde co’i bai, corèndoghe drio col bocón de polenta!
La Sardegna, splendido “Eden” che g’à dà i nadài a gente come la nuorese Grazia Deledda (1871-1936) premio Nobel 1926 par la leteratura, ‘dèsso la m’à fato conóssar pura un giovane cantante che m’à concilià co’ la musica moderna: Nicola Congiu, ‘na voçe come de raro g’ò ‘vù l’ocasion de sentirde una simile.
L’è aparso qualche mese fa sul primo canàl RAI nel programa “Se catemo in TV” presentà par 6 ani dal bravo Paolo Limiti e, finì el programa, da un pàr de  setimane l’à messo in circolassión un CD dal titolo “Atimi” dove el bravo cantante sardo, parón de ‘na voçe sicuramente destinà a portarlo in alto, oltre a cantàr e sonàr la chitara ne l’orchestra, l’à scrito, de qualche cansoneta, testi e musiche. A dir la verità l’à pura prodoto in proprio el deto CD, dimostrando in tuto e partuto ‘na bela determinassión oltre a n’arte notevole. Insoma, Nicola Congiu oltre a ‘vérghe ‘na voçe tra le più bele che ò sentì, el conosse anca la musica e la poesia!
El presso l’è abordabile: 8 euro; ‘na cifreta che val la pena, ve asicuro, de spendàr anca parché, Diograssia, el contenuto l’è in grado de contentàr anca i non più giovani.
Personalmente, spero che col tempo ghe riva a piàsar la lirica parché l’è la voçe da Arena.
Comunque la vaga, de lu ghe ne sentiremo de sicuro ancora parlàr…  e mi in ‘sto campo raramente me sbalio.

Wanda Girardi Castellani

↓