L’Angolo de la Wanda – Ottobre 2009 – “Alegria … EVIVA LA TV!”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Alegria … EVIVA LA TV !

Ancó, dominica 8 agosto 2009, nel mentre stavo scrìvendo l’articolo mensile par “Quatro ciacoe”, da la Tivu inpissada in saloto m’è rivà la triste notissia de la inprovisa morte del più amado, amirà e stimà tra i personagi de la television; el nostro Mike Bongiorno. Anca a lu ghe s’à fermà el motorin tuto de’n colpo a 85 ani.
La TV italiana l’èra nata el 3 de genàr 1954 e mi me lo ricordo ben parché el mese dopo, precisamente el 16 de febràr è vegnù al mondo el me primogenito Mirco.
Le trasmissioni regolari i è partide da Milan, Roma e Torin e i è scominçiade con “Arivi e partense”; el debuto de’l giovane italo-american Mike Bongiorno.
Sentadi davanti al miracoloso scatoloto quel stesso mese emo assistì a la fine del bandito Giuliano e a l’avelenamento de so cusìn Gaspare Pisciotta.
El 30, Gino Latilla e Giorgio Consolini sul palco de san Remo i à portà a la vitoria la cansoneta “Tute le mame”.
Al primo ventesèl de marso dal video emo podù farse n’idea de la moda-primavera de quel’ano: el vitìn de vespa e le còtole a triquarti tegnù sgonfe da ‘na soto-cotola stenca come un bacalà. L’è stà quelo el mese del trionfo de Frank Sinatra e Audrey Hepburn; un Oscar al primo par el film “Da qua a l’eternità” e quel’altro par “Vacanse romane”. El primo colegamento in Eurovisione el gh’è stà sie mesi dopo; el sié de giugno.

Ma un ano dopo, nel 1955… me papà, firmando ‘na brìgola de cambiali l’à portà a casa el primo televisór marca “Geloso”, grosso e pesante come un monumento tanto che emo incaricà me sio Gino (marangon) de costruirghe un sostegno adato. Come nel 1934 semo stadi i primi in tuta Porta Vescovo a ‘vérghe ‘na radio (marca Kennedy) con giradischi, nele case popolari de via Santa Marta dove che aveimo traslocà, el primo televisór ghe l’ emo ‘vu noialtri. Naturalmente el popolino no’ g’à parso vera de far bagolessi: “che i abia vinto al loto? “Che i abia eredità?”
Quel’ano li è scopià la febre de “Lascia o raddoppia”, la trasmissión che gà ‘vu el magior sucesso… un sucesso gnancora superado. El primo eroe l‘è stà Lando Degoli che l’à vinto la favolosa cifra de 1.280.000 lire. Pecà che po’ l’à perso el titolo par no’ èssar stà bon de rispondar a ‘na dimanda che riguardava un strumento musicàl poco conossudo: el controfagoto!
La trasmissión ideà da Mke Bongiorno l’andava in onda el giovedi sera e da quel momento durante le do ore che la durava la çità la paréa spopolà. I cinematografi i ris/ciava el falimento. In conpenso i bar, le ostarie e tuti i locali publici in possesso de ‘na TV i se inpeniva. In casa mia vegnéa zo tuti quei dei piani de sora (mi stavo al pianterén) con sgabéi, cussini e careghe. Ci portava la fogassa, ci el fiasco de vin, ci le frìtole. Me papà el smontava la porta del tinèl par consentìrghe al publico ‘na visuàl più larga e me mama la pareciava su la stua tute le “napoletane” de casa… e alè… “cafè-misto-orzo” par tuti. ‘Pena che el presentadór el saludava con quel’ “alegria” passà a la storia, tuti bateimo le mane!
I argomenti del giorno i èra: Luigi Mariannini, Paola Bolognani, la tabacara Garoppo che, parvia del pontesèl che la natura g’avéa fato davanti (e no’ i avea gnancora inventà la “zonta” de siliconi) l’èra entrà de prepotensa dei sogni più arditi dei omeni italiani. Memorabili le cantonade del nostro Mike, vedi quela rivolta a la signora Longari (“mi è caduta su l’uccello”). Tra i ospiti no’ l’èra raro che se impissasse spinose discussioni, sfide e scomesse. Finìdo el bàito ogni un racimolava le so robe e dopo el “samartìn”, se andava in leto. Naturalmente i buteleti i gh’èra zà da prima de le nove, dopo el “carosello”; un concentrato de tuti i spot publicitari: “Mammut-babbut, figliut” ,”Topo Gigio”, ”Calimero”, “Miguel e Carmensita co’ la Moka”, ecc.
‘Desso, a la notissia de la scomparsa de Mike Bongiorno tuto de’n colpo s’à sveià ne la mente imagini, frasi e mile simpatiche vicende, mai volgari, mai stupide. El bravo Mike no’ l’à mai inpenì i giornai de scandali e parolasse, l’èra un artista, un professionista serio con el rispeto che gh’è dovudo al publico. L’è stado el papà dei quiz e bisogna dirlo sensa paura de sbagliàr che l’è a lu che ghe dovemo quel tipo de spetacolo che à parà avanti tute le televisioni dal prinçipio fin adesso.
Nei ultimi tenpi, in copia con el simpatico Fiorello el n’à dà modo de constatàr ancora ‘na volta la so arte e inteligensa.
De tuti i presentadori che è passà sul picolo schermo in sti 55 ani, sia ne le reti nassionali che in quele comerciali, Mike Bongiorno l’è stà sicuramente tra i primi.
No’ lo sentiremo più augurarne… ”ALEGRIA !” ma la so voçe ghe l’avaremo sempre nel cor.

Wanda Girardi Castellani