L’Angolo de la Wanda – Dicembre 2009 – “GENUS INRITABILE VATUM (l’irritabile razza dei poeti – Orazio)”

…a cura di Graziano M. Cobelli

gcobelli05@gmail.com
Wanda Girardi Castellani

Quatro Ciàcoe: da Verona

GENUS INRITABILE VATUM (l’irritabile razza dei poeti – Orazio)

O’ scominsiado a frequentàr (e quindi a conóssar) i poeti nela primavera del 1949 e, fasendo conto che ‘desso semo nel 2009 vol dir che ghe i ò ‘vu da ‘torno par la belessa de 60 ani; più che bastansa par farse n’idea del parché Orazio, amigo de Virgilio, el l’abia definidi “rassa iritabile”.
Prima de tuto me son subito inacorta che anca qua el “potere” l’èra in man ai omeni e… a un certo numero de omeni (generalmente el ghe stà’ in te ‘na man). Noialtre done “poetesse”, magari poche ma gh’èrimo naturalmente nele retrovie, tratà co’ la benevolensa che generalmente i usa i potenti verso i pòricani.
Tanto par capirse; iscrita, come v’ò dito nel 1949, son stà’ ciamada al grande onór de recitàr le me poesie, par la prima volta insieme coi VIP al circolo de la Cassa de risparmio de via Rosa, nel 1962; oramai maridà e con fioi. Gh’è da zontarghe che za dai ani “50” el Cenacolo veronese el s’avea desfado a causa del malcontento che circolava tra i soci che no’i g’aveva mai la possibilità de far sentir le só robe. Pian-pianin, nel brontolamento generàl s’èra destacà questa, quelo e quel’altro, qualchedun ‘bandonando più o manco le só velleità de poeta-dicitore, altri (i soliti; i più conossudi) rinforsando el grupo che, sensa far proseliti, l’à seità indisturbato a “operàr” in nome de’n sodalissio che no’ esisteva più. Par ani, cusì, Verona l’è stà’ convinta che de poeti, tolto quei li, no’ ghe ne fusse altri!
Po’ nel 1976 eco che, metendo fora la càpola sul porton del circolo de via Amanti, el Cenacolo, partorido da un s-ciapo de poeti armà de entusiasmo e soratuto de speransa, l’è rinato co’ la presidensa de Gianni Faè e quela onoraria de Angelin Sartori… e allè, “la storia de san Vincenso” l‘è ripartìda.
El primo erór l’è stado, ne la me opinión, quelo de consideràr (contrariamente al Cenacolo de fine guera) tuti i iscriti “soci efetivi” dàndo a man verte la patente de poeta anca a ci no’l d’èra. Nel primo Cenacolo quei ‘péna iscriti i se dovéa contentàr de la tessera de sinpatisante. L’èra pensabile che a contato dei meio e catando boni incentivi in poco tempo, se gh’èra un minimo de “stofa” se g’avaria podù sostituìr pò’ la tessera dandoghe anca a ‘sti “noissi” la possibilità di andàr a rapresentàr el Cenacolo e par çerti l’è andada cusì. Purtropo però g’avéimo nel masso anca quei altri !
Par çercàr de smorsàr i eterni mugugnamenti e con su la bandiera el motto de la voçe più forte del diretivo “qua no’ esiste poeti e poetini… qua semo tuti precisi!” (salvo… digo mi, qualchedun che l’è un poco più preciso de altri), el Diretivo par far recitàr tuti l’à usà el sistema dei nomi nel capèl cusì, par esempio, a ‘na recita organisà da ‘na banca ghe n’avemo mandà du tra i pèso nel mentre ‘n altro pàr, tra i meio, grassie a la sudeta pesca nel capèl, i avemo spedì a ‘n ricòvaro.
Naturalmente, visto che (salvo quei come mi) nessuno g’avea el coraio de dirghe pan al pan guadagnandose ‘na carga de nemissi, i soci lassà da parte, come tuti convinti de èssar inparentà con Dante, i è ritornà a tacàr col brontolamento, vardando i coleghi in cagnesco e toléndosela col direttivo che, a só parér el faséa dele discriminassioni. Musi, acuse e gelosie in cressendo, specialmente da parte de noialtre done che, poetesse o no, semo sempre de vena de cavarse-zó l’una con l’altra i pani da dosso. Eco, a sto punto, che taca a destacarse dal circolo par primi quei che i sa de valer; quei che i è più conossudi e quindi con o sensa Cenacolo, i è sempre de sèna. Se destaca po’ anca quei che avendoghe da le só parte un palco sul quàl poder operàr i organisa recite a drita e a sanca, magari sbandierando l’apartenensa al Cenacolo… e taca la solita storia de san Vincenso… che la dura tanto tempo e che mai la se destriga…!!
Quanto al “giudissio”, su ‘sti poeti… no’l gh’è! I giornai i te dise che el giorno tale recitarà tissio e caio ma no’ sucede mai che dopo ‘na recita vegna fora ‘na critica che magari la podaria èssar anca costrutiva. Parché par la poesia (specialmente par quela dialetàl) no’ la esiste ‘na critica qualificada e alora tuti i pol crédarse i meio de la coada dato che no’ gh’è nessuno che g’abia el coraio o la voia de smentirli. Da drio le spale, magari. si! ma davanti i ghe dise che l’è cota se non altro par no’ inviàr bàgoli e scadenàr polemiche.
El diretivo che’l se dà da far a organisàr serate culturali a alto livèl, quando el se cata in sala i soliti quatro gati i se la tól co’ i soci assenti che “se no’ i pol recitàr lori le so poesie i sta a casa. Qua bisognarìa tegnèr presente: 1° che’l Cenacolo l’è in atività soratuto mei mesi fredi, 2° che i soci (salvo ecessioni) i è tuti vecioti, 3° che miga tuti i g’à la machina, 4° che le serate de solito le va par le longhe. Se po’ el tenpo l’è bruto, gh’è fredo e magari piove o nevega… ci ghe lo fa far a ‘sti pòri Cristi de lassàr la só comoda poltrona al caldin davanti a la TV par andarse a stufàr scoltando argomenti che no ghe interessa ?? Ignoranti… eco cosa che i è: ignoranti! Serto che se inveçe i fusse de sèna lori…! Par far dei sacrifiçi se g’à da ‘vérghe dei incentivi e l’è pur vera che par la magioransa dei nostri iscriti la roba più inportante l’è quela de farse sentìr, overo, usando ‘na frase sentida de spesso “recitarse adosso!”.
Se no bisognaria darghe la tessera solo ai poeti laureati e “automuniti”.
In finis… ghe sarìa da dir qualcosa anca su çerte giurie dei concorsi che premia con un criterio ‘bastansa discutibile! Daltronde par formàr una giuria che funsioni ben no’ se g’à da ciamàr un personaggio de spico, un onorevole o, che so, un ingegnèr idraulico, colto… si ma del qual al massimo no se podarà dir che no’l se ne intende un tubo. Ghe vol gente che, prima de tuto ama la poesia e la sia bituà a lésarde.
Gh’è po’ la storia dei libri generalmente stampadi in proprio cusì ci g’à più schei el stampa de più e el popolino che no’l se ne intende, el se afida a ci el pensa che’l deva intèndarsene, metendo nel conto el numaro alto de le publicassioni che secondo el parér generale g’à solo ci è brao da scrìvar.
Tornando al discorso de le giurie dei premi de poesia, son del parèr inoltre che le deva vegner, almanco de tanto in tanto cambiade. El motivo l’è logico: ognuno g’à el só metro de giudissio e, sóra tuto, i só gusti cusì la tendensa l’è quela de premiàr sempre i stessi.

Wanda Girardi Castellani

↓