L’Angolo de la Wanda – Ottobre 2003 – “VERONA MARTIRE”

…a cura di Graziano M. Cobelli

gcobelli05@gmail.com
Wanda Girardi Castellani

Quatro Ciàcoe: da Verona

VERONA MARTIRE

Dala note del 21 ottobre 1940 ala sera del 20 april 1945, con 1079 alarmi, 29 i è stadi i gravi bonbardamenti aerei su Verona, più vari spessonamenti e picole incursioni da parte del famigerato “Pippo”. Intieri quartieri, cese, monumenti e impianti distrutti.
Imprecisado el numaro dei morti ma valutà su l’ordine de diverse meiàra.

Del primo bonbardamento g’ò un particolare, ciaro, teribile ricordo. L’alarme el n’avèa sveià nel pién dela note tra el 21, 22 otobre del 1940 ma, tratandose de ‘n’esperiensa nóva, s’èrimo poco spaentà, almanco fin al scopio del graspo de bonbe cascado quasi subito tra via Nicola Mazza, Canpofiór e via XX Setenbre, a dú passi da casa mia. Diversi i è stadi i morti e, tra i feridi, ‘na me amigheta; Giovanna Deiana, restà orba par averghe fato scudo al fradelìn e par ‘stó ato de eroismo, po’, decorà con medaia d’oro al valor civile. In quela prima incursión aerea è restà ferì anca el futuro Presidente dele vitime civili de guera, dr. Arcaroli.
La seconda, in ordine de gravità, la gh’è stà’ al 25 setenbre del 1943 e a quela ghe n’è seguì altre 28, una più distrutiva de l’altra, fin a l’ultima del 20 april 1945.
Le sirene le dava prima el prealarme; tri sóni de 15 secondi l’uno ai quai se zontava quei de alarme; 6 reciami de 15 secondi l’uno. Dal genàr 1945 i reciami i è passà a 10. La fine de l’alarme l’era inveçe de’n solo lóngo reciamo tirà dai scanpadi col fià!
Tute le case le portava scrito su la porta dele cantine “R.C.”(rifugio casalingo) ma la magioransa i scapava verso rifugi ritegnù più sicuri, come, par esenpio, par noialtri de Veroneta, le grote de San Nazàr.
Nei rifugi le done le tacava a dir el rosario e le seitàva fin al segnàl de fine alarme nel mentre noialtri buteleti, incossienti, zugàimo a dàrsela o a le cucùce.
Tra i bonbardamenti peso, ricordemo:
Quel del vènardi 28 genàr 1944 fato dale fortesse volanti americane B.17 U.S.A.A.F. Le bonbe le à ciapà la stassión de Porta Nova, la cartiera Fedrigoni, i Tabachi e diverse case. I morti i è stà circa 200. Al quarto alarme dela giornada la RAF (inglese) l’à bonbardà Isola De La Scala fasendo ancora diverse vitime tra la popolassión.
L’8 febràr 1944 è stà’ centrado anca el Seminario, la stassión de Porta Vescovo e diverse case de borgo Venessia. In via Santa Marta dove che stavo de casa, è piovù in corte quintài de tòchi de rotaie e de vagoni.
Ala sesta incursión (28 marso 1944), le fortesse volanti B.17 e i Liberator B.24 (americani) in dó tremende ondade le à desfà, tra le altre, Santa Lussia, Borgo Trento, la Valdonega, Porta Vescovo, el Porto e vari stabilimenti tra i quai quel de Galtarossa.
El dopodisnàr del 17 magio dei cacia americani i à mitralià anca Vilafranca e le vitime i è stà diverse.
Al 30 giugno del 1944 el numaro dei alarmi su Verona l’è rivà a 149 e el bonbardamento del 13 lùio de quel’ano l’è stà forsi el pèso de tuti, par via de vitime! La luce, el gas, l’aqua e i mèsi publici i è mancà par diverse ore.
Tra el 16 e el 20 de lùio i atachi i è stà rivolti anca ala provincia con gravissimi dani e tanti morti.
Tra un bonbardamento e l’altro seguitava a tormentàrne, con mitraliamenti, bonbe e bonbete, un arioplàn batesà “Pippo”. La nostra antiaerea (logà a Montorio), par la só scarsa eficacia, l’è stà ciamà dai veronesi che i avea conservà qualche frègola del proverbiàl umorismo montebaldìn, “la Tosca” (parchè, come la Tosca pucciniana, “non fece mai male ad anima viva”).
La note del 10 otobre 1944, a l’undicesima incursión, è stà semidistruta anca la bela cesa de San Giovani in Vale.
A tuto 31 dicenbre, i alarmi par la çità e dintorni i è stadi conplesivamente 551.
El più tremendo ataco, però, ghe l’émo avù da la matina a la sera del 4 genàr 1945. Quatro le ondade e l’ultima l’à colpì al cór la me martire Verona. No’ gh’è stà via del centro che la sia stà risparmià: Via Mazzini, corso Cavour, via Leonçin, via Pellicciai, via Quatro Spade, Corso Porta Borsari, Via Capèl, via Stela,via Scala più tuti i lungadige, i ponti, San Zen, Castelvecio e le cese più bele dela çità. G’à vossù più de 30 ore parché tornasse la luce e l’aqua. Par el gas e par i mèsi publici, diversi giorni.
De l’alarme dado a la matina no’ è più stà dà el segnàl de fine alarme. A l’ospedàl dove che l’èra ricoverà, el poeta Berto Barbarani, strassià par ‘sta ultima ofesa a la só tanto amada Verona, el 27, l’à lassà par senpre ‘stó mondo amaro.
Dopo altri bonbardamenti più o manco gravi, teribile l’è stà anca quel del 23 febràr 1945. Oltre a le solite bonbe, la RAF l’à sgancià anca meiàra de quele incendiarie che le à iluminà a giorno la çità, ridota a un mar de macerie. Centrà anca el teatro Filarmonico e la cesa del San Fermo, salvà dal disastro totàl da l’intervento de’n coragioso camiliàn; el capelàn de le carceri, padre Balbinot (vedi Q.C. ano 10, genàr 1992).
In una dele case distrute, moriva anca el me dotór Zani.
In quei giorni, el celebre medium dott. De Boni l’è riussì a portàr in salvo, ricuperandoli da ‘na casa de Veroneta drio croàr, i mèio quadri del futurista Umbero Boccioni.
Quel 23 febràr, un giorno prima del me quatordicesimo conpleano, da via san Fermo, in meso a un mar de fiame ghe són passà anca mi, scapando in bicicleta insieme a me papà che al tenpo el dirigeva la centrale eletrica de Verona più volte, anca quela, bonbardà e spessonà.
Dificile dir quanti i è stà i morti. Ancora ‘na òlta è’ mancà par ore e giorni tuti i servissi: aqua, gas, luce ecc.
Altre disastrose incursioni: al 24, 27, 28 febràr con altri morti che no’ se sà quanti. In quei tristi giorni s’à visto ben i risultati dei famosi bonbardamenti de precisión dele fortesse volanti B.17, vanto dei americani nel confronto có’i coleghi inglesi che i praticava el cosideto “bonbardamento a tapeto”!
Ala vintiquatresema incursión, la note del 2/3 marso 1945, la çità l’è del tuto in genòcio e l’è inpossibile far el conto dei morti.
Altre batoste a l’8 marso, el 9 e l’11, pò’ al 6 de aprìl e al 20; ‘stó ultimo qua, ultimo finalmente in tuti i sensi, fato da la RAF con spessoni incendiari. Intramèso, el famigerato Pippo l’avéa seguità a tègnar sveia Verona co’ le solite bonbete e i mitraliamenti. Quando un par de giorni l’è mancado, ‘na òlta riapàrso i soliti veronesi i à recità: “No’ són Pippo, són Renato, parchè Pippo l’è malato. Co’ ‘na bonba e ‘na mitralia, tegno svèia tuta Italia”.
Çerte òlte, ancora ‘dèsso, passà 57 ani, me càpita de insognarme de quei tremendi giorni e quando vardo el telegiornàl che no’ l’à mai smesso de farme védar guere, morti e distrussión, me inmedesimo in quela pòra gente e me dimando quando sarà che’l Padreterno el se decidarà a molàr-zó el coèrciolo su ‘sta tera cativa piena de odio fin a la miòla.

Wanda Girardi Castellani

↓