L’Angolo de la Wanda – Novembre 2003 – “Le grote de i briganti in Valpantena”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Le grote de i briganti in Valpantena

Fora da la Porta del vescovo, dopo Grezzana, a 15 km dal centro çità, sul fianco del monte Dardena gh’è ‘na tore dentro la qual se poI ancora vedar i avansi de ‘na scala “a bogonela” che la portava a de le grote coerte da mureti de quarèi; i era le presoni ando che ‘l brigante Falasco, “bravo” del conte De le Stele, el scondea la gente che ‘l rapiva par conto del so paron fin che ‘sto qua no ‘l ricevea el riscato. A dirla tuta, però, el più de le òlte, riscato o nò, i rapidi no’i tornava più indrìo!
Par rivar a ‘ste grote, che la legenda la dise in comunicassion, traverso misteriose galerìe, con la splèndida Vila Arvedi, se percore un sentier pien de verde e de cascadele, passando davanti a ‘na bela, romàntica ceseta serà da ci sa mai quanti ani.
Ranpegando su par el sentiereto se sente solo el canto de i usèi, la ridarèla de l’aqua e el fis-cio del vento tra le foie. Lì no’ riva i rumori de la strada che pura l’è ‘bastansa viçina e par de tornar indrìo, nel reboiar de tempi assè distanti, a quando era fàcile incontrar da quele parte i briganti armà de trombon e de cortelassi. Par tanti pol anca no’ èssar vero ma l’è però probàbile che el grande Alessandro Manzoni nel scrìvar el so capolaoro el se sia ispirà a la storia, tuta veronese, de l’ Anzolina Lonardi, riportà anca dal nostro Piero Caliari nel libro èdito nel 1884. E l’ Anzolina col brigante Falasco la g’à ‘vù a che dir… ecome.
I personagi, quindi, i è realmente esistidi e la storia l’è autentica. EI teatro de la tragedia l’è Verona, la Valpantena e Santa Maria De le Stele. I protagonisti: EI conte Provolo Giusti De le Stele, l’Anzolina Lonardi, so papà Giovani Giacomo, furlan, comerciante de formài e Paulo Bianchi, deto “Falasco”, capo de i “bravi” del conte Giusti: gran “cao de roba” (o farabuto, che dir se vòia). La data de i avenimenti: istà 1675, quando ancora Verona la se stava tirando-sù dal tremendo frasèl de !a peste.
La storia, ècola qua: l’Anzolina l’era la sola ereditiera del “formaier” Lonardi che durante la peste manzoniana l’avea perso tuti i altri fioi. La butela, de salute pitosto malmessa, l’èra promessa sposa al conte Sagramoso ma el conte Provolo, pien de dèbiti, el l’avea a so volta dimandà in sposa più che altro par giustar la so situassiòn finansiaria, ma papà Lonardi, conossendo la bruta reputassion de ‘sto pretendente, el g’avea dito de girar al largo. Alora el conte Provolo l’à pensà ben de metar el formaier davanti al fato conpiudo, fasendo rapir da Falasco la pora Anzolina, profitando de la momentanea residensa de la butela ne la vila de Poian.
El papà: dopo el rapimento, el s’à rivolto al Consilio de i Diese che par la prima òlta i s’à schierà da la parte de ‘n plebèo contro un nòbile. L’ Anzolina cusì l’è stà ritrovada, ma par el trauma subì l’è morta de lì a poco. A la sepoltura, ne la cesa de Sant’Eufemia, soto l’altar del Cristo, ‘pena drento a sinistra, i ghe l’è portà el 18 genar 1678, su un cataleto, vestì co’ la vesta che l’avarìa dovù indossar par andar a nosse col Sagramoso. EI conte Provolo, caturà da le guardie de la Serenìssima, par la so colpa l’è stà decapità in piassa San Marco a Venessia mentre Falasco el g’à lassà la “sucariera” in piassa Erbe, a Verona. Al conte Provolo, secondo l’uso del tenpo, i g’avea anca demolì “el castel avito” in santa Maria De le Stele. Come avemo dito, Falasco l’usava serar le so vìtime ne le grote sul fianco del monte Dardena, con entrata traverso la toreta che ancora se poI vedar, anca da la provinciale par Stalavena, dopo Grezzana. ‘Ste grote e ‘sta toreta i è un’opera unica nel Veronese e forsi in tuto el Veneto; i è soratuto un monumento a testimoniansa de la presensa de i briganti ne la Valpantena.
Ma, tornando a Falasco, in quei secoli scuri, tra le cese de Verona ghe n’èra solo una che ghe dava sepoltura nel so teren ai condanadi a morte; Santa Maria de la Neve o De la Giustissia, Scola de i Dissiplinati e là l’è facile che sia finì el nostro “don Rodrigo”. Sul teritorio de quela cesa, demolì nel 1941, è stà po’ costruì el vecio cine Vitoria deventà po’ “Capitol”.
In finis, ne la bela ceseta de l’Altaròl (vedi Q.C. otobre 1998) a sinistra su la strada par Grezzana, subito dopo el bivio par Poian, se poI ancora amirar l’ex voto oferto a la Madona dopo el ritrovamento de l’ Anzolina, da papà Lonardi. In sto ex voto se vede la pora butela a la finestra che la siga aiuto mentre i “bravi” de Falasco i sta çercando de entrar in casa.

Wanda Girardi Castellani