L’Angolo de la Wanda – Maggio bis 2002 – “L’ATRONAUTA UMBERTO GUIDONI l’è aterà a la Gran Guardia”

…a cura di Graziano M. Cobelli

gcobelli05@gmail.com
Wanda Girardi Castellani


Quatro Ciàcoe: da Verona

L’ATRONAUTA UMBERTO GUIDONI l’è aterà a la Gran Guardia”

La matina de mèrcoli 20 febràr gh’è stà’ un incontro tra L’Ing. Umberto Guidoni; primo astronauta europeo a entràr nela Stassión Spassiàl Internassionàl (Iss) e i studenti dele scóle superiori dela çità. L’inissiativa ciamada “2002, Verona nel spassio” l’à visto tra i promotori i Istituti Salesiani San Zen e Don Bosco, insieme a quei del Marconi, Ferraris, Giorgi e Fermi.

Quando, da picolo, a me fiol Flavio i ghe domandava cosa l’avarìa volú far da grande, el rispondeva deciso: “l’astronauta”. Ma se l’omo propone, l’è la vita po’ che dispone e cusì Flavio, inveçe che in ‘na naveta spassiàl, l’è finì drio al sportèl de ‘na banca. “Adio, sogni de gloria…!” diséa el ritornèl de ‘na cansón dei me tenpi! In conpenso, però, Flavio l’à aprofondì l’hobby de l’astronomia, tanto che ancó l’è uno tra i astrofili più apressà e conossù del Veneto, autór de tanti e interessantissimi articoli su varie riviste, italiane e estere e relatór in altretanto interessanti conferense su la materia.
Qualchedùno però a deventàr anca astronauta el ghe l’à fata; l’Ing. Umberto Guidoni, nato a Roma nel 1954; siensiato e astrofisico, oltre che astronauta e ilustre ospite de la me çità, mèrcoledì 20 febràr nei rinovadi, splendidi saloni dela Gran Guardia.
Dopo la conferensa stampa, l’Ingegnér l’à parlà, descrivendo anca un film de mez’ora par pò’ consegnarse con passiensa e gentilessa a un sbaro de dimande, prima da parte dei giornalisti e po’ dele çentenara de studenti frasà nel salón soteraneo, ininterotamente, dale nove a mezogiorno.
Tema principàl: “La casa fra le stele”, overo la costruenda Stassion Spassiàl Internassionàl; el più grande progeto mai tentà da l’umanità.
La Stassión, overo la ISS (International Space Station) l’è un programa che inpegna 16 paesi nela costrussión de ‘na base permanente abitada, in orbita a circa 400 km sóra la tera. I laori i è scominçià nel 1998. ‘Dèsso zà a bon punto, a partìr dal 2000 l’à ospità equipagi misti formà da tri atronauti russo-americani ma quando l’assemblagio el sarà conpletà, l’equipagio el podarà èssar conposto da 7 siensiati che i se darà el canbio ogni 5/6 mesi. Da là inçima se podarà studiàr el nostro pianeta. Ma la stassión la sarà anca in grado de far esperimenti sientifici e sondàr, da ‘na posissión ideàl, i limiti de l’universo osservabile.
Ne l’aprìl del 2001 l’Ing. Guidoni l’à partecipà con altri 6 menbri de l’equipagio del Shuttle “Endeavour” a una dele missioni de assemblagio de ‘sta Stassión internassionàl; oltre a lú, gh’èra quatro americani, un canadese e un russo. Guidoni però in ‘stó caso l’è stà el primo europeo a métar pié sula fantasientifica strutura.
‘Na parte de l’aparechiadura za instalà; el modulo logistico pressurisado “Raffaello”, l’è stà’ costruì da l’Agensia Spassiale Italiana che nel progeto la partecipa in triplice veste: 1° – a l’interno de l’Agenzia Spaziale Europea, 2°- diretamente, con la fornitura de moduli logistici e 3° – co’ ‘n acordo Italia-Stati Uniti par la costrussión de altre parti dela Stassión.
“El nostro volo; el 104° da l’inissio de l’atività del “Space Shuttle” (à dito Guidoni), l’à rapresentà ‘na piera miliare nela storia dela costrussión dela Stassion Spassiale, anca par un particolare evento: 12 ore dopo el distaco dela lss è atracà una Soyuz con a bordo el primo turista spassiàl, pagante, dela storia: Denis Tito.”
Oviamente parché ‘sta roba la se ripeta ghe vorà dei ani parché un viajo del genere el richiede un particolare, lóngo adestramento. In quanto al futuro viajo su Marte (‘na domanda tra le prime rivolte al relatór), bisogna tegnér presente che’l durarìa dú ani solo tra l’andàr e ‘l tornàr e, insoma, par adesso no’ s’è gnancora pronti.
L’Ing. Guidoni l’à descrito con entusiasmanti penelade i 13 giorni passadi in orbita; le passegiade ne l’udo, le incredibili capriole in assensa de peso ma soratuto la visión dela tera da là inçima; balón colorado… gema azura, sospesa nel scuro cosmico.
“N’Astronave che inbarca tuta l’umanità!”. Cusì el l’à ciamada Guidotti; Ulisse del terso millenio.

Wanda Girardi Castellani

↓