L’Angolo de la Wanda – Luglio bis 2003 – “Festa de la Castellania de Suavia – I novi Castelane e Cavalieri 2003”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Festa de la Castellania de Suavia
I novi Castelane e Cavalieri 2003

Domìnica 18 magio a incoronar l’anual festa de la Castelania de Suavia che, come senpre, la s’à svolta nel cortil d’onor del bel castel scaligero arocà sul monte Tenda, gh’è stà un ciel seren e, contrariamente a l’afa de i giorni prima, un ventesel sfureghin che l’à contribuì al colorado spetàcolo de i tanti figuranti in costume medieval fasendo balar bandiere e gonfaloni da i pontesèi e da le finestre del mastio soavese. Çinque le Dame intronisade e tri i Cavalieri “Spadarini” eleti a farghe da protession armada. A le 17 l’Imperial Castelana Nenè Lovat, contornada da la Corte de le so Castelane involtolade ne i doradi mantèi adorni da la tracola damascada con la ferea ciave del castel, elargì, dal 1330, da la Principessa Imperatrice D’Antiochia, consorte de Federico Dela Scala, a le più meritevoli tra le so Dame, l’à ciamado a la balconada l’Araldo, mi… (che ricopro ‘sta càrica da oltre 20 ani) che, con el consueto contorno de i tronbetieri ò scominçià la cerimonia.
La prima a ricevar l’anbito “guiderdone” l’è stà Maria Pia Garavaglia ex deputato, ex sotosegretario e, par un ano, Ministro de la Sanità. Comissario straordinario de la Croce Rossa Italiana e po’ Presidente generale. Dal 1997 Vice Presidente de la Federassion internassionale de le società de Croce Rossa e de Mesaluna Rossa. Presidente eletto de l’uficio de coordinamento tra le 15 società de Croce Rossa Europee e le istitussioni de l’Union. L’è stà po’ la volta de Enrica Fava Giovannucci, moier del Prefeto, Presidente de la session feminil de la Croce Rossa Italiana de Vicensa e, tra le altre inportanti càriche, Pres. Prov. de l’Ass. ALICE, l’òpera che se òcupa de la prevension de l’ictus cerebral. Tersa “Madonna” a montar sul palco al sono de le tronbe: Claudia Robiglio, docente de facoltà de letere e filosofia a l’università de Macerata. Autrice de ‘na vintina de studi e ricerche che interessa anca l’atività vitivinìcola del soavese. È tocà po’ a Loredana Martinez, atrice teatral al fianco de Vittorio Gasmann, Ugo Pagliai, Massimo Troisi, Luca De Filippo, ecc… L’à inoltre colaborà, tra i altri, a la regìa, con Federico Fellini, del film “Roma”. Regista, pure, de spetàcoli televisivi, come: “Un prete tra noi”, “Casa Vianello”, ecc… Quinta “Madonna” a ricevar la ciave del castel: Valentina Tessari, laureada in enologìa e inpegnà co’ le sorele ne la gestion de l’ Asienda agrìcola de fameja che la porta el nome de “Suavia”. A ‘sto punto è entrà in canpo i novi “Spadarini”: el Capitano Stefano Comisso del Grupo 313 “Frece tricolori”. Udinese, nato nel 1972, dopo vari alti incàrichi dal 1998 l’è stà assegnà al P.A.N. con l’incàrico de Capo session tècnica e programassion. Dal 2002 l’à pure assunto l’incàrico de Capo efficienza velivoli. El secondo a ricevar el spadin l’è stà Alberto Martelletto de l’Aministrassion Provincial de Verona. Assessor a l’Agricoltura e al Patrimonio. Esperto sommelier, laureà in viticultura e enologìa. Terso e ùltimo (almanco par ‘sto ano) Giancarlo Vason, diplomà in enologìa e Presidente, tra le altre, de la JU.CLA.S., Soc. de i servissi del setor enològico. Un plauso ai sìndaci de Soave e de Monteforte e uno particolare al “Deus ex machina” de tuta la manifestassion, l’Imperial Castellana, Nenè Lovat e al so ativìssimo staff, con special riferimento a la instancàbile segretaria Annalisa Mancini.

Wanda Girardi Castellani
(Araldo della Castellania di Suavia)