L’Angolo de la Wanda – Giugno 2003 – “Vint’ani fa s’à smorsà el ciaro grando”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Vint’ani fa s’à smorsà el ciaro grando

 

In ricordo de Gianni Faè, Diretor de Redassion de “Vita veronese”, indimenticabile Presidente del nostro Cenacolo “Berto Barbarani”, apassionado stòrico de la civiltà cimbra e sensìbile poeta, scomparso el 20 giugno 1983.

El vinti giugno del 1993, a dies’ani da la morte, el Curatorium Cimbricum, in colaborassiòn co ‘l Comune de Badia Calavena, con ‘na cerimonia comovente restà fissa ne la memoria de ci era presente, l’à dedicà ‘na strada a Gianni Faè, el poeta de la Lessinia, apassionado stòrico e ricercador, impegnà fin a la fine ne la divulgassion de la storia, de la lingua e de l’arte de la tera cimbra. In quela memoràbile giomada de fogo, cucià soto la massa de ‘n sol rabioso, dopo i vari interventi de i oratori ciamà a ricordarlo, la festa in onor del nostro Gianni la s’à conclusa con l’esibission in piassa de l’Ass. “I pistoleri de l’Abassia” e del celebre “Grupo dei trombini de san Bartolomeo dele montagne de san Bortolo”, tra ‘l spaentà scapa-scapa de i usèi da i àlbari e ‘na premadura piova de foie da i plàtani de i dintorni. Gianni Faè l’è stà, tra l’altro, el fondador de la rivista Ljetzan Giazza de la qual l’à po’ curà l’edission ne l’arco de la so evolussion fin a “Tera Cimbra”. Intensa e instancàbile l’è stà l’atività de Faè in sen al Curatorium Cimbricum Veronese e vasta l’è la bibliografia ligada a la Lessinia che de Gianni la porta la firma; importanti edissioni che le va dal 1951 al 1981. Insieme a altri studiosi l’à pura curà l’alestimento, a Giazza, del “Museo dei Cimbri”, inaugurà el 2 giugno del 1959. Gianni Faè l’à amà la so tera con un amor da poeta e da poeta autèntico l’à savù cantarla e parlàrghene.
La bibliografia de ‘sto grande veronese la conta più de ‘na vintina de volumi, tra poesie, sagi, biografie ecc…
Pòstumò è stà po’ stampado nel 1991 a cura del Curatorium e de ‘n altro nostro grande poeta, storico e sagista, Piero Piazzola, un volume che ‘l porta el titolo de quela clie l’è de çerto la più bela e conossuda poesìa del nostro: “El ciaro grando”.
Mi, Gianni, l’ò conossù ne l’imedià dopoguera, quando me son iscrita al Cenacolo che ‘l g’aveva alora la sede ai “Torcolotì”, in via Zambelli. Nel 1976, po’, quando el nostro Sodalissio l’a riverto i batenti in via Amanti, Gianni l’è stado eleto presidente e mi segretaria. Insieme co’ i altri del Diretivo de alora, emo fato un bon laoro e de quela longa vera amicissia g’o tanti bei ricordi, specialmente quel ligado a la presentàssion del me libro “Dedicado à l’amor”. Gianni Fàè, Comendatòr a l’ordine de la Republica, l’èra stà combatente col grado de sototenente in Jugoslavia ne l’ultima guera e l’avea conossù anca la dura prigionia ne i campi nazisti. Tornà in Patria el s ‘à dedicà con passion a l’insegnamento ne le scole del so Sant’Andrea, dove, primo in Italia, l’à messo in òpara novi interessanti metodi didatici. Valido poeta e scritor, apressà giornalista, tra le tante importanti cariche che ‘l g’à ‘vù, gh’è stà, par tri mandati, quela de Sìndaco de Badia Calavena, Presidente de la Pro-Loco de VaI d’Illasi, Vice-Presidente de la Comunità de la Lessinia e membro del Diretivo del Bacino Imbrifero. Editore par la “Corev”, l’à, tra l’altro, stampà du de i me libri de poesìe: “Pena e scoa” e “Vanesa del cor”.
Nato a Sant’Andrea nel 1921 el s’era diplomà a la Farnesina de Roma nel 1940.
Ciapà ne la rede da ‘n mal incuràbile, el s’à ritirà da la sèna del mondo el 20 giugno 1983, lassando tra quei che l’avea conossù e stimà, un gran udo. E, dopo ‘sto ciaro grando… un gran scurol

EI ciaro grando

Limpida sera d’istà,
che te slusi su la sima de i monti
co’ na gran dressa de stéle
che fa pi strovi i boschi e ciare
le case e i progni,
par mi tardiga el sono
e no riesso a catar ben.

Da i alti muci del fen segà
ne i pré carghi de tristessa,
çento profumi se alsa
e canta i grij,
ma el rossignol el tase
spetando la luna tendra su la vale.

EI cor a mi me dise su
la solita filagna e ruma
sempre pi fonda la malinconia
de la me pora vita che se ingruma;
a forsa de tajare e de limare
co’ la prea anca el fero se consuma.

Vorìa, ma no son bon a sera
corgandome desmentegare tuto,
come che fa i malghesi
su i bàiti de Malera:
drento me ròsega,
cofà un castigo o’ na maledission,
el ciaro grando che-infoga el célo
ladò distante, sora la çità.

Gianni Faè

***

Wanda Girardi Castellani