L’Angolo de la Wanda – Luglio 2002 – “La prima staion lirica in Arena (1913)”

…a cura di Graziano M. Cobelli
gcobelli05@gmail.com
Wanda Girardi Castellani

Quatro Ciàcoe: da Verona

La prima staion lirica in Arena (1913)

Giulieta e l’ Arena i è i sìnboli de verona.

A Luigi Da Porto, autor de la novela de i du sfortunadi amanti e a William Shakespeare par el so bel poema, ghe dovemo la notorietà mondial de la prima, mentre al tenor Giovanni Zenatello quela de ‘st’altra, da quando nel 1913 el g’à ‘vù l’idea de usarla par metar in sèna spetàcoli lìrici.
EI secondo tra i anfiteatri romani, par dimension dopo el Colosseo, e el primo par la bella conservassion, l’è stà costruì nel primo sècolo d.C. e in quasi domila ani l’è servì par spetàcoli e manifestassioni de tuti i tipi, da i conbatimenti de i gladiatiori (ricordà anca da Plinio el Giovane) e quei de bestie, fin, nel 1890, al circo de Bufalo BilI. Duèi, esecussioni in massa (vedi el rogo de i 200 erètici patarini caturà a Sirmion nel medioevo), santi martirisà (San Fermo e Rustico), coride, gare de baloni aerostatici, baleti, comedie e ci più ghe n’à più ghe ne meta! Ne i arcòvoli è stà po’ ospità de tuto, parfin le cusidete “Spurcil puellis”, in tempo scalìgero.
L’Arena come palcossènico par l’òpera l’è però ‘n’invension del ‘900. Prima gh’èra stà un concerto el 24 novembre 1822, quando Verona l’à ospità el congresso de la restaurassion postnapoleonica e Gioacchino Rossini l’à direto la so “Sacra Aleansa”. Nel’800 èra stà eseguì anca qualche òpera lìrica, ma l’Arena l’à dà el so mèio solo con l’aparission su la sèna del melodrama de Giuseppe Verdi. L’idea de rapresentar in Arena l’Aida el ghe l’à avù el tenor Giàvanni Zenatello, tra un goto e un cafè, ‘na ciàciara e l’altra, sentà a un taolin del “Lowenbrau” sul Liston, insieme al maestro Tullio Serafin e altri amiçi apassionà de mùsica. Nel 1871 la bela òpera verdiana comissionà dal vicerè egissian Ismail Pascià par l’inaugurassion del teatro Kedivale (e non come se dise, anca se le date i è quasi coincidenti, par l’ inaugurassion del canale de Suez; òpera de ‘n italian, I’ing. Negrelli) I’èra stà rapresentà in Egito e a quei tenpi la stanpa la g’avea sonà ben la grancassa.
Altri spetàcoli lìrici i era stà alestì ne le arene minori de Arles e Nimes.
Ma tornando a Verona, propio quel’ano scadea el centenario de la nàssita de Verdi (1813-1901) e g’aveimo voia de far qualcosa par rèndar onor al grande composidor de Busseto. “QueI giorno de giugno (à contà la fiola deI tenor, Nina Zenatello Consolaro) me papà, tuto de ‘n colpo, pontando el deo su I’Arena I’à dito: Eco el teatro che ghe vòl. Lì se podarìa far spetàcoli da far vègnar a Verona tuto el mondo!” EI problema el podea èssar queI de l’acùstica. A queI punto, el grupeto de amiçi, sensa pèrdar altro tenpo i è entrà ne l’anfiteatro e Zenatello l’è montà su i scalini da la parte de I’atual palcossènico, mentre i altri i s’à ranpegà su quei da la parte de l’aIa. EI tenor I’à tacà a cantar “Celeste Aida”e quando I’à finì è scopià un aplauso. L’acùstica I’èra parfeta e quindi l’idea I’èra pronta par la realisassion.
La prima “Aida” la g’à avù 5 rècite straordinarie. EI debuto l’è stà domìnica 10 agosto 1913 a le 20,45. L’orchestra el I’à direta naturalmente Tullio Serafin. 120 i professori d’orchestra, 180 i sonadori de le famose “tronbe egissiane”, 30 i cavài e i bo.
“I è previste facilitassioni feroviarie. In caso de piova el spetàcolo el vegnarà rimandà.” Cusì riportava el manifesto. Ma el debuto l’è stà incoronà da un cel, ndove che sterminade stele, fisse come de rado, parea che le partecipasse a far da sèna e da pùblico. L’alestimento de l’òpera el gh’èra afidà a un giovane architeto, Ettore Fagiuoli, che el g’à avù, oltre a la capacità, I’inteligensa de costruir’ na rafinada e sèmplice senografia dove sul palco, come elementi fissi, spicava do sfingi e dù obelischi ai Iati del boccasèna e in fondo un gran portal, più vari elementi mòbili; 8 enormi colone, ìdoli, ecc… e parfin de le piante fate vegnar aposta da la Costa Azura. Gh’è da dir che ‘sto alestimento I’à sfidà el tenpo, infati l’è stà riproposto anca 70 ani più tardi, ne l’istà del 1982. De quela prima “Aida” (l’ùnica òpera in cartelon ogni ano da alora) tuti i giornài de l’è poca ghe n’à parlà con gran entusiasmo.
Anca el cel l’à fato la so parte restando seren par tute le 8 rèpliche. A una de quele gh’à assistì anca el giovanìssimo Giuseppe Lugo, rivà da la natìa Rosolotti (frassion de Sona Veronese) con so papà, in careto col musso.
A la tersa rapresentassion Verona I’è stà invasa da quasi çinquantamila persone tanto che s’à dovù far intervègnar i bersalieri par mantegner l’ordine. In quel’ocasion i è stà meiara quei che no à podù catar posto ne l’ anfiteatro tanto che qualchedùn, schersando, l’à proposto de “slargarlo!”
Da quel 1913, tantìssime i è stà le òpere rapresentà, ma l’Aida l’è el “piato fisso” al punto che çerti i se dimanda: “Che Aida fai in ‘Rena st’ano?” identificando (come scriveva l’amigo Nino Cenni) Aida con melodrama, òpera lìrica, in ‘na parola “spetàcolo degno de èssar rapresentà in Arena e questo l’è grandioso, popolare nel senso mèio del termine”.

Wanda Girardi Castellani

↓