L’Angolo de la Wanda – Febbraio ter 2002 – “VERONA EURO: Schèi novi… problemi novi”

…a cura di Graziano M. Cobelli

gcobelli05@gmail.com

Quatro Ciàcoe: da Verona

VERONA EURO: Schèi novi… problemi novi

L’8 genàr, dopo 7 giorni dal scominçio de l’avento de l’euro, me son catà in scarsela:

£. 38,73 in tocheti da 2 cent. de euro.

96,81    ”    “          5   ”

193,63    ”    ”        10    ”

387 ,25   ”    ”        20    ”

968,14   ”    ”        50    ”

più… un euro      (1936,27)

e du euro            (3872,54).

De ‘sto passo, entro la fine del mese l’è prevedìbile che me tocarà, al posto che nel tacuin, portarme drio la moneda co’ la cariola! Ieri, a la cassa del me botegar, çercando de sbolognar un pochi de quei çercoleti che, oltre che pìcoli i è anca legeri come ‘na gàlega, me n’è rugolà ‘na bruscada soto al banco. De çercarli uno par un, gnanca proàrghe a evitar, grassie a la me afessionada siàtica, de restar piegà-zo a novanta gradi dovendo po’, par poderme tirar-sù, ciamar l’aiuto de la squadra rialso de le terovìe. Beh, forsi i finirà nel saco del l’aspirapolvar, quando, un colpo o l’altro, i farà i mestieri! Tra i tanti difeti che i g’à ‘sti “roti” i g’à anca quelo de ‘verghe un rilievo assè poco rilevà, cusì i vecioti come mi i è costreti a metarse i ociài tute le olte che i paga o che i ritira el resto. A le casse de i supermarcà l’è ‘na còmica che la finisse col ciapar i colori de la tragedia quando che ‘l cliente el taca a pescar ne la mucia çercando de far-sù la cifra giusta. Quei de drio i scàlpita come tanti cavài nel mentre quei davanti, finalmente liberà dal dificile còmpito de pagar, i se industria a infilar i aquisti nel sacheto col ris-cio de portarse via roba de i altri o rimetarghene de sua, mi ò tacà l’usansa de vèrserghe la man ‘pena soto el naso de la comessa, disendoghe, fasendo finta de no’ vèdar che la sbufa pèso de ‘n treno a vapor: “La se toga ela quel che va ben!” Intanto la fila de i clienti la deventa sempre più longa e tompestosa, tanto da bàtar quela che se forma ai casèi de l’autostrada de feragosto e, più che i brontola, più el poro Cristo de turno el se fa confusion. Ò visto ‘na veceta metarse adiritura a piànsar, bersalià da ‘na carga de “complimenti” del tipo: “La se sveia! o “La vaga a ricòvaro!” Ò anca pensà de cavarme da i piè qualcheduna de ‘ste antipatiche monedine infilandole, a Messa, ne la borsa de la cesa, ma sicome gnanca le s-cioca, el sagrestan el m’à pura vardà mal. Mi de economìa e de polìtica me ne intendo poco assè… ma che no’ se podesse propio miga catar ‘na qualche maniera par farme tribular de manco? Gh’è da sperar che, morta definitivamente la nostra compianta lira, no’ dovendo far conti in più se riva a imbroiarse de manco. Par intanto, butemola in ridar: la defunta lira (el franco) la bate a la porta del paradiso e san Piero el la acolie con calor: “Avanti, cara… avanti!” riva anca i mile franchi, i çinquemila, i diesemila. “Avanti, cari… avanti!” Ma quando che se presenta i çinquantamila e i çentomila, san Piero el li para a l’inferno. “Zo… zo. Ci v’à mai visto voialtre in cesa?”

Wanda Girardi Castellani