L’Angolo de la Wanda – Febbraio 2015 – “La Signoria Scaligera”

…a cura di Graziano M. Cobelli

gcobelli05@gmail.com
Wanda Girardi Castellani


Quatro Ciàcoe: da Verona

La Signoria Scaligera

El primo “della Scala” del quale se ga notissie el se ciamava Arduino (o Balduino) e l’era un marcante de lana ne la Verona del ’200. De so fiol Jacopino savemo che l’era stà nominà “vicario imperiale” a Ostiglia e più tardi podestà a Cerea. I veronesi a quel tempo i era ’pena vegnù fora da la sanguinosa dominassion de Ezzelino III da Romano e ghera bisogno de qualchedun bon de portarghe serenità e magari anca un po’ de schèi ne le scarsele. Così nel 1260 la “Domus Mercatorum” (l’organo de governo del Comune) l’à selto par Podestà el fiol de Jacopino, Leonardino, che a dispeto del soranome “Mastino” l’èra un omo de indole pacifica e ben visto da tuti. Quei tempi però i era segnadi da le eterne tensioni tra guelfi e ghibelini (fedeli o al Papa o a l’imperatore), tensioni che spesso le se trasformava in odio feroce e guere.
Mastino a l’inissio l’à çercà de governar con diplomassìa, par esempio favorendo come podestà de Mantova so fradel Alberto, ma nel 1262 l’à deciso de farse nominar “Capitano generale perpetuo del popolo”, ciapando così (come Cesare secoli prima) el pieno potere de ’na ditatura a vita. Con ’sta carica però l’è riussì a garantirghe a Verona dies’àni de paçe e l’è incredibile, contando el periodo turbolento, la causa de la so bruta fine!

Lapide a ricordo del logo dove è stà copà Mastino I della Scala.

Nel 1277 un nobile l’à violentà ’na dona e la fameja de ela, oviamente, l’à domandà giustissia. A l’epoca par un stupro se tajava la testa, ma inveçe Mastino el voléa ’na “solussion riparatrice”. I parenti a ’sto punto i à deciso de vendicarse proprio su de lu, spetàndolo soto casa: gnanca a èssar ne la “Cavalleria Rusticana” è saltà fora i cortèi e a la fine è restà in tera sia Mastino che el so amigo Antonio Nogarola che l’avéa çercà de difèndarlo. Ancora adesso, vissin al vólto che da Piassa de i Signori va a Piassa Erbe, ghè ’na làpide che ricorda el punto dove el 26 Otobre de quel’ano Mastino della Scala l’è stà pugnalà. Alberto, ’pena che l’à savù de la morte del fradel, el s’à precipità a Verona e dopo aver ciapà el comando in poco tempo l’è riussì a trovar i colpevoli e farli giustissiar. La carica vacante de “Capitano generale perpetuo” el ghe l’à fata dar a uno de i so tanti fiói, Bartolomeo, fin che lu el se ocupava de le façende de fameja. Fameja numerosa (tra l’altro) parché solo de fiói el ghe n’avéa ben sete.
Alberto l’è passà anca a la storia par aver ordinà el rogo in Arena de quei çentoquaranta eretici patarini (i càtari de casa nostra) che l’avéa prelevà a Sirmion e che so fradel el s’avéa limità a tegner in galera. ’Sta esecussion spetacolare l’è stà el prèsso che la çità l’à dovù pagar al Papa parché el cavasse la scomunica lancià nel 1267, quando Mastino l’avéa ricevù con tuti i onori l’imperatore Corradino di Svevia in visita a Verona. Oltre a questo, da bon politico Alberto l’à fato sposar el fiol Alboino con Caterina Visconti, garanténdose così l’amicissia de i Signori de Milan. Un altro matrimonio “politico” el ghè andà manco ben: quando Obizzo d’Este l’è restà vedovo, el ga mandà in spòsa so fiola Costanza… ma pochi ani dopo, quando Obizzo l’è morto, i fiói i ghe l’à rispedì a casa con la classica pessatà nel dedrìo! Oviamente Alberto el s’à infurià e el ga mosso guera a Ferrara! Par fortuna l’impresa l’è andà ben e par festegiar la vitoria l’à organizà ’na setimana de feste e de tornèi… tornèi durante i quali i veronesi i à podù védar par la prima volta le abilità de cavalier de ’n altro de i so fiói: Cangrande! Nel 1301, a la morte de Alberto, la Signoria l’è passà al fiol Bartolomeo che però grandi robe no l’à podù far, parché l’è morto giovane. Ne i so tri ani de governo el s’à limità a mantegner la paçe, risolvendo qualche rògna con le çità vissine. Morto Bartolomeo la Signoria l’è passà a Alboino (quel che avéa sposà la Visconti), che però anca lu, causa ’na malatìa, l’è durà poco. In ’sto periodo ghè stà solo la solita guera con Ferrara e qualche tension con altre çità. L’è importante però che Alboino fin da subito l’à governà insieme a so fradel Cangrande. Quel che deventarà el più famoso de i Scaligeri a l’epoca el gavéa solo disdoto ani, ma l’èra za el comandante de l’esercito. El nostro Cangrande el gavéa un sogno: quel de far de Verona la çità più potente del Veneto. Così, ’pena che l’à podù l’è partì par le conquiste: i so vint’ani de signoria i è stà tuti una guera drìo l’altra, tanto che adesso sarìa massa longo contàrvele tute. Però l’èra anca un omo colto e un mecenate: famosa l’è l’ospitalità che el ga dà a Dante Alighieri. El “Sommo Poeta” l’èra za stà a Verona a i tempi de Bartolomeo, ma l’è con Cangrande che el s’à fermà ne la nostra çità par ben siè ani. Se pensa che la tragedia de Giulieta e Romeo la se sia consumà proprio alora, parché Dante el nomina i “Montecchi e Cappelletti” tra le disgrassie de l’Italia “di dolore ostello”.

L’arca de Cangrande sora el portal de la ceseta de Santa Maria Antica.

Tornando a Cangrande, se sa che el gaveva un caràtere gioviale, sempre pronto a divertirse e far festa co i amiçi, indole che da sète secoli se pol védarghe stampà su la facia soridente nel celebre monumento che ormai l’è deventà un simbolo de Verona. Savemo anca che ghe piaseva alsar el gombio (e no solo par tirar sù la spada), parché da l’esame che è sta fato sul so corpo (ancora ben conservà) è saltà fora che el sofriva de cirrosi epatica. Però a coparlo no l’è stà el vin, ma l’aqua! Conta la tradission che la matina del 22 Lujo 1329 ne la çità de Treviso (capitale de la “Marca”) el se sia fermà, sudà dopo ’na cavalcada, a rinfrescarse a la fontana del convento de Santi Quaranta. Però fin che el bevéa un dolor lancinante el ga ciapà el stómego: sopravissù a tante batalie l’è morto de congestion! L’esame recente no l’à confermà ne smentì la legenda… de sicuro oltre al fegato malandà el gaveva ’na quantità esagerata de “digitale” nel sangue. La “digitale” l’è un velen, ma a l’epoca l’èra usà anca come medissina e probabilmente a spedirlo al Creator l’è stà un insieme de tante robe.
Morto Cangrande la Signoria l’è passà a Alberto II, fiol de Alboino, e dopo al fradel, Mastino II. Era inissià però un periodo de decadensa: le so conquiste i èra sparide come neve al sol, tanto che nel 1351 i possedimenti scaligeri i rivava gnanca fin a Vicenza. Morto Mastino II è rivà “Can Rabbioso”… in realtà el se ciamava Cangrande II e l’era so fiol, ma l’è stà ciamà così parché l’èra na “pèssa da piè” come da i tempi de Ezzelino no se ghe ne vedéa uno compagno!

L’arca de Cansignorio.

Tanto cativo l’è stà che a coparlo ga pensà ben proprio so fradel Cansignorio (par dir come ormai i èra cascà in basso i Scaligeri!). A Cansignorio però ghe dovemo la ‘Torre del Gardello’ in piassa Erbe (la prima tore con l’orologio de tuta Italia) e Castelvecio con el so bel ponte medioevale. Comunque par rispetar la tradission de fameja, anca Cansignorio prima de morir l’à fato copar so fradel Paolo in modo da garantirghe la sucession a i fiói! Gnanca a èssar in una trageda shakespeariana, de ’sti du fiói uno l’à copà quel’altro par robarghe la signoria! El se ciamava Antonio e par fortuna l’è stà l’ultimo, parché i veronesi ormai stufi agri de ’ste lote fra fradèi (e stufi de averghe fame) nel 1387 i à ciamà in aiuto da Milan Gian Galeazzo Visconti. Vista l’aria che tirava, Antonio l’è scapà via e così con lu finisse par sempre la Signoria Scaligera a Verona. L’è durada solo 125 ani, l’è scominçià con fradèi che se voléa ben e l’è finì con fradèi che se copava l’uno con l’altro! Schèi e potere… che bruta roba!
Quando vegnì a Verona, andè a védar le Arche, i Scaligeri i se trova tuti lì: Cansignorio e Mastino II in quele grande, Mastino I, Alberto e tuti i altri ne i sarcofagi. Cangrande però l’è ne l’arca sora el portal de la ceseta de Santa Maria Antica.

Wanda Girardi Castellani

↓