L’Angolo de la Wanda – Luglio / Agosto 2015 – “”Bomba day” a Verona”

…a cura di Graziano M. Cobelli

gcobelli05@gmail.com
Wanda Girardi Castellani


Quatro Ciàcoe: da Verona

Bomba day” a Verona

Domìnica 14 Giugno 2015

La bonba da disinescare.

A volte ritornano!” Anca i fantasmi de l’ultima guera… staòlta ne la forma de ’na “suposta” longa più de un metro, pesante treçento chili tra fero e tritolo e catà par sbalio soto el teren de l’Arsenal a Verona, durante el scavo de un parchegio soteraneo!
El model de la bonba l’è “AN-M64”, americana, ma sul quando la sia stà sgancià su la çità se pol solo far de le ipotesi… L’ultimo bonbardamento l’è stà nel genar del ’45 e l’è stà uno tra i più violenti tra tuti. No s’à mai capì parché i “aleati” i è andà a scaricar tonelate de bonbe su ’na çità da dove i tedeschi i stava za scapando… ’na çità, tra l’altro, piena de edifici storici e unici al mondo come l’Arena. Ma no tute le bonbe le scopia (par fortuna)… Bisogna saver che par evitar ’n’esplosion acidentale (magari ne la pansa de l’aereo) de solito le ga un sistema de sicuressa: par esenpio ’n’elica che, girando durante la dissesa, la desguida el “bulon” che normalmente tien blocà el mecanismo che le fa scopiar ne l’urto. Basta però che se ingripa l’elica, o che el sistema el sia tarà mal o ci-sa cosa… e la bonba la finisse soto tera anca par setant’ani.

Un specialista del perìcolo… a le prese co la bomba.

Bruto laoro quel de i artificeri: ’pena finì la guera de bonbe ghe n’è stà trovà e disinescà un fraco; ormai adesso l’è raro e nel caso che suceda se pol farlo anca da distante, doparando un robot! Però el pericolo el resta senpre. No se sa mia a che punto s’à ingripà el mecanismo… pol darsi che te possi far rodolar la bonba zo par ’na strada sensa che suceda gnente, ma pol èssar che basta tocarla perché la decida de saltar par aria: magari i è setant’ani che la spetava proprio “quel” colpeto! Così stavolta s’à ciapà ’na decision sensa precedenti: quela de “svodar” conpletamente el centro storico de Verona!
Via tuti! Extra omnes! Par el ragio de quasi un chilometro da la bonba, no dovéa èssarghe più nessuno! Çirca 13.000 veronesi i à dovù serar casa e trovarse (anca solo par poche ore) ’na sistemassion fora dal centro. Via anca le màchine! Altretanti turisti i à dovù lassar pèrdar le foto a piassa Bra, Arche, Tonba de Giulieta, ecc. e andar da qualche altra parte! Udadi i alberghi! È stà anca cavà aqua, luce e gas a tuto el çentro! Verona da le 9 a le 12 de Domìnica 14 Giugno 2015 la paréa la sèna de un film de fantasiensa. Deserta! O quasi… parché, savendo che i ladri no i se sarìa mia lassà scapar ’n’ocasion così bona, bonba o no bonba, è stà spedì a farghe la guardia a case e boteghe più de 700 persone tra fòrse de l’ordine, polissioti e volontari de la protession civile.
Ciaro che ’n’evaquassion del genere (m’à senpre fato rìdar el termine “evaquassion”) no la podéa mia èssar sensa problemi: a un’ora da l’inissio de le operassioni s’à trovà ’na comitiva de giaponesi che, tranquili e beati, i stava fotografando la çità deserta! Parà via i giaponesi è sta trovà i ortodossi ancora a messa ne la so çesa… (forsi no era stà preparà le spiegassioni in giaponese e in russo…) Ga volù altre du ore par trovar anca i ultimi curiosi e i vari veceti che no voléa andar via da casa. Comunque a le ore óndese el robot teleguidà l’à scominçià el so pericoloso laoro. Mi no go mia ’vù bisogno de andar via (e ne le me condission sarìa stà un problema)… comunque, no essendo tanto distante, come tanti altri ò tegnù par tuto el tenpo le rece verte, spetando el grande “bòto”! Bòto che par fortuna no ghè mia stà: a mesodì i à comunicà che la bonba l’era disinescà e che la sarìa stà portà a Boscomantico par farla scopiar in sicuressa.
Ne le ore dopo è sta ridà aqua, luce e gas al çentro e la gente l’à podù scominçiar a tornar ne le case. Ciaro che s’à creà el solito ingorgo tra abitanti, curiosi e turisti (l’era anca ’na domìnica). S’à verto le boteghe e s’à controlà se ghera tuto. I ortodossi i à finì la messa e i giaponesi i à finì le foto. L’è stà ’na bela aventura!
Certo che… (vien da pensar) quante altre bonbe gavemo soto i pié? Magari te scavi par slargar la cantina e invesse de la “tonba” de Teodorico te trovi ’na “bonba” de l’ultima guera… Ocio: se scavando trovè del fero, mai bàtarghe sora!

Wanda Girardi Castellani

’Profito par ringrassiar me fiol Mirco par l’aiuto che el me dà nel scrìvar i articoli. Anca se ne la me giovinessa batéa con tuti e diese i déi a mitralia su la màchina da scrìvar, adesso che go el Parkinson fasso fadiga parfin a doparar ’na matita! Così el fiol el me dà ’na man a çercar le idee nòve, trovar la documentassion e butar zo el testo. Insoma el me fa da “segretario”, e spero che i laori che femo insieme i ve piasa. Grassie anca a Q.C. che me òspita da trent’ani e a i me afessionadi letori. Finché la testa la continua a masenar, e go ci me ’juta, continuarò sempre a averghe l’onor de èssarghe su ’ste pagine. (W.G.C.)

↓