L’Angolo de la Wanda – Marzo 2011 – “Un “Canova” in Piassa Bra”

…a cura di Graziano M. Cobelli

gcobelli05@gmail.com

Quatro Ciàcoe: da Verona

Un “Canova” in Piassa Bra

Ga mancà un pel che ne i giardini de la Bra, al posto de la statua equestre del primo Re d’Italia, Vittorio Emanuele II, la çità de Verona la gavesse messo la scultura comissionada al grande artista de Possagno, Antonio Canova, par onorar l’inperator austriaco Francesco II, (el nono de quel Francesco Giuseppe che i veronesi i ciamava “Cecco Beppe”). Ma andemo par órdine. El 12 marso 1799 el Corpo Legislativo francese l’à votà la dichiarassion de guera a l’Austria. La linia de demarcassion tra i do eserciti la partiva da Lazise del Garda e la proseguiva drio el corso de l’Adese co’ le forti teste de ponte de Verona e Legnago in man ai cruchi. L’aliniamento l’era favorevole ai imperiali che, spetando el primo contingente russo conposto de 40.000 òmeni l’èra za dislocà in sessantamila a frontegiar i çinquantaçinquemila francesi de Scherer.

Da la parte austriaca a tirar i fili ghera el feldmaressialo Melas po’ sostituì dal tenente Maressial Carlo De Kray. A ’sto punto i francesi de Scherer, traversando l’Adese, i è riussidi a ciapar tute le fortificassioni austriache, ma questi el 30 marso passando a la controfensiva i à riconquistà el teren perso, costrensendo Scherer a la ritirata al de là del fiume Tione dove i du eserciti i s’à scontrà. El 5 april 1799 la vitoria l’è stada de i cruchi in quel de Magnano da le parte de Buttapiera e quando i 40.000 aleati russi de Suvarov, nominà Feldmaressial da l’imperator Francesco II, l’è entrà in Verona da la parte de Porta Vescovo, grande l’è stà l’entusiasmo de i veronesi, al punto che ghè stà de quei che s’à sostituì al caval de Suvarov e tirando la carossa i sigava: “Viva el nostro liberator.”
El governo de Verona l’à voludo rèndar onor al l’imperator austriaco deliberando de colocar in piassa Bra un degno monumento a eterna memoria de le vitoriose armate austriache. Su la decision de l’aulico Provisorio Consiglio Generale à dovudo influir anca el desiderio de ridarghe a la piassa più importante de Verona un monumento in sostitussion de quel distruto da i giacobini nel magio del 97 dopo le celebri Pasque veronesi (17-24 aprile 1797).

Par el novo monumento l’èra necessario ciamar in canpo un grande artista; grande a livel europeo e la selta l’è cascà su Antonio Canova. A tratar col scultor de Possagno è stà ciamà el padoan Giovanni De Lazara, noto critico d’arte. L’idea del De Lazara l’èra che el monumento el rapresentasse Sua Maestà Francesco II che recentemente l’èra stado in visita a la çità scaligera, desmontà con cavài, carosse e seguito da la stassion de porta Vescovo che a quel’epoca l’èra l’unica par i passegeri (porta Nova l’èra solo par i cariagi militari). El vial de la stassion, a l’onbra de i maestosi castagnari vissudi fin a la guera del 1940 quando i è finì su i camini, l’èra pien de gente, de fiori e de bandiere; tuto un festoso batiman rivolto a la copia inperiale e in special modo a l’inperatrice, Isabella de Baviera, la qual belessa vista dal vero, l’èra al de sora de la so fama.
El scultor el se trovava alora ne la so Possagno (dove ghè la Gipsoteca con la copia de tute le opere de l’artista) e quando l’è stà contatà dal conte Tiberio Roberti de Bassan, Canova l’è restà lusingado da la selta al punto che, pur essendo carico de lavoro, l’à escogità, par sodisfar i me concitadini un compromesso.

Nel so studio de Roma el gavéa in laorassion dal 1795 una statua che figurava Ercole e Lica fata su comission del Duca Onorato Gaetani de Sermoneta. La scultura destinà a Parigi l’avarìa dovù sinbolegiar l’Ercole francese che butava al vento Lica, ossia la monarchia, ma Canova l’à proposto de canbiarghe el significato: Lica l’avarìa rapresentà la libertà sensa règole e Ercole el difensor de l’órdine, cioè l’impero.
Tra Canova, Roberti e De Lazara tuto l’èra deciso in parfeto acordo, senonché el 22 giugno 1799 l’Inperador con un dispacio da Vienna l’à vietà de inalsar el monumento: l’era ’na spesa granda e inutile tanto più che Verona, ’péna vegnù fora da ’na longa guera, l’èra disastrada e bisognosa de riparassioni. L’imperator l’à cusì dà prova del so paterno amor verso i suditi veronesi. El dispacio de la corte austriaca l’à scocià un poco tuti i promotori de l’inissiativa… ma el grande Canova l’à capì inveçe la situassion e, rassegnado, l’à ritirà l’oferta.
Restà lìbero da l’inpegno tolto co i veronesi, in seguito l’à finì el bel grupo marmoreo de Ercole e Lica nel 1802, conpletàndolo e rifinìndolo po’ diese ani dopo, cioè quando el ghe l’à rifilà a don Giovanni Torlonia duca de Bracciano che el l’à sistemada in ’na sala fata aposta par quel capolaoro, nel so palasso de piassa Venessia a Roma.
’Desso el grupo “Ercole e Lica” l’è esposto ne l’ingresso de la Galeria Nassionale d’Arte moderna de Valle Giulia in Roma, nel mentre, al so posto in Piassa Bra a tegner de ocio el Liston ghè, drito sul so caval e mostaci arditi, el primo Re d’Italia, Vitorio Emanuele II.

Wanda Girardi Castellani