L’Angolo de la Wanda – Ottobre ter 2000 – “Premio “Giuseppe Lugo – 2000””

…a cura di Graziano M. Cobelli

gcobelli05@gmail.com

Quatro Ciàcoe: da Verona

Premio “Giuseppe Lugo – 2000””

La sera del 27 luio gh’è stado, nel bel parco de Villa Vento, a Custoza, la consegna al tenor Nicola Martinucci del premio “G. Lugo” rivà, co’ l’ano domila, a la so sètima edission.
A la cerimonia è seguì un concerto lirico con la partecipassion del soprano Cecilia Gasdia, del mesosoprano Anna Maria Di Micco e del baritono Luciano Montanaro, oltre, naturalmente, al festegià.
À compagnà al pianoforte l’esibission de i cantanti, come sempre, la brava prof. Michela Forgione.
Nicola Martinucci, nato a Taranto nel 1941, el s’à dedicà a la lirica grassie a l’incoragiamento del grande Mario Del Monaco. L’à po’ esordì al teatro Nòvo de Milan nel 1966 ne la parte de Manrico, del Trovador de G. Verdì. Par la so magistral interpretassion de Calaf (Turandot de Puccini) quel stesso ano l’à vinto el premio “Viotti” de Vercelli e, su le aIe de’n sucesso senpre più grande, s’à srodolà el cao de ‘na longa serie de importanti altri debuti in Italia e a l’estaro. La so magior notorietà, però, el ghe l’à ‘vuda a l’Arena de Verona (1980) come Radames ne l’Aida de Verdi; ‘na parte che la l’à rivelà come uno tra i più interessanti tenori de la so generassion. In seguito, nei 35 ani de la so brilante cariera, l’à cantà, soto la guida de i pì grandi diretori d’orchestra; Muti. Abbado, Gavazzeni, Oren, Votto ecc…, ne i magiori teatri europei e americani: da la Scala de Milan, al Coven Garden de Londra, al Deutsche Oper de Berlino, al Metropolitan de New York. Tenor “lirico spinto”, Martinucci l’è celebre par le so interpresassioni de Radames e Calaf ma el so repertorio, vastissino, el conprende, tra le altre, Tosca, Norma, La Gioconda, i Pagliacci, el Trovatore.
In ‘Rena ghe l’emo ‘vudo par ben 18 stajoni che l’à visto interprete de 16 edissioni de Aida e po’ Andrea Chenier, Turandot (mandà in onda da la RAI anca la sera del 25 luio nel programa de Antonio Lubrano), Forsa del destin, Cavaleria Rusticana, Tosca, Pagliacci e Madama Butterfly, a fianco de le più celebri interpreti feminili.
Oltre a la splendida, inconfondibile voçe, Martinucci el g’à al so arco anca la sicura frecia de ‘na gran bela interpretassion sènica, ‘iutà da’na aitante presensa.
Ultimamente l’à inaugurà con l’Aida la stajon del Sferisterio de Macerata; la so 426″ recita del capolavoro verdian.
Personalmente, g’ò par Nicola Martinucci ‘na predilession, quindi son ben felice che finalmente el “Premio Lugo” el ghe vaga a lu, tantopì che 7 ani fa, rispondendo subito con entusiasmo e generosità a l’invito del Comitato, l’à cantà, da par suo, al primo concerto dedicà a Lugo, che s’à svolto al teatro Filarmonico. A la fine del concerto el Comitato l’à vossù premiar con un bel trofeo, fato, come el premio Lugo, dal maestro orafo Angelo Antoniazzi, el comm. Giuseppe Pezzini, nostro splendido anfitrion e erede spiritual del grande Giuseppe Lugo al qual l’è stà vissin, da buteleto e fin a la morte (avegnù el 18 setembre 1980) con ‘sta motivassion: “Al comm. Giuseppe Pezzini, par aver riportà a la ribalta, afidade a le generassioni del domila, la figura e l’arte de Giuseppe Lugo”.

Wanda Girardi Castellani