L’Angolo de la Wanda – Ottobre 2005 – “I PUOTI del palasso Turco”

…a cura di Graziano M. Cobelli

gcobelli05@gmail.com

Quatro Ciàcoe: da Verona

I PUOTI del palasso Turco

“Il vedere nel detto portone del cortile (palazzo Verità-Montanari alle Stimmate) usati per cariatidi due grandi satiri, ci fa in qualche modo supporre che del Curtoni sia parimenti quel palazzo al n° 1438 in sulla via che da san Fermo Maggiore mette alla chiesa di Santa Maria in Scala ora De’ Sagramoso e prima dei Turco…”

L’atribussión al Curtoni, probabile architeto dela Gran Guardia, la ghe dà ‘na çert’aria de nobiltà al palazzo di via san Cosimo nel qual la fantasia popolàr la s’è sbizarida fin a estendàr la denominassión de “puoti” (bambolotti) non solo al palasso che ospita su la fassada le stranbe cariatidi vestide da Turco, ma a tuta la via; adiritura a tuta la zona.
Comunque che ‘l Curtoni, neodo del Sammicheli, el sia o no l’autór del stravagante edificio, inporta poco. L’è’ invece necessario, par inquadrarlo ne la só giusta luce, tegnér presente el particolare stato d’animo del comitente che’l volea in quela maniera imortalàr nela piera l’orgolio par la parte, sicuramente, a só parèr, importante che l’avéa sostegnù nela veste di rappresentante de Verona presso la Serenissima, nei festeggiamenti dela vitoria de Lepanto (1571).
A farghe omagio al capitàn dela storica inpresa, el futuro Doge Sebastiano Venier, Verona l’avéa mandà ‘na delegassión formà da Pio Turco, Paolo Camillo Giusti, Gerolamo Canossa e Giulio Miniscalchi ma gh’è tocà propio a Pio Turco, omo importante a Verona par le tante cariche publiche e par el prestigio dela fameia, (che, tra l’altro, pochi ani dopo la g’à dà a la çità un grande pitór Alessandro Turchi, deto l’Orbetto) a esaltàr con bele parole a nome dei veronesi, la grande memorabile inpresa dei crociati.
De çerto el nostro concitadìn el sarà restà colpido dal fato che a esaltàr la vitoria de la cristianità contro i turchi i abia ciamà proprio uno che se ciamava “Turco”… cusì l’à pensà ben de far de la decorassión del só palasso tuta ‘na parodia del só cognome.
Purtropo par lu, i veronesi no’ i à catà de só gusto ‘sta stranbaria, che l’andava de bruto, a lancia in resta, contro tuti i cànoni rinassimentài de l’epoca… strucàndoghe l’ocio al barocco; un stile assè mal visto da ‘ste bande. Resta el fato che la note del 2 agosto 1579, quando ancora el palasso l’èra “noo-noèento”, qualched’un l’à laorà de bon brasso par destacarghe la testa a le cariatidi. Inutilmente Pio Turco, in camisa, el g’à corso drio ai vandali con so fradèl Marcantonio, tuti dú sveiadi da le massade. Le teste i è po’ stà’ catade picà via soto la berlina de piassa Erbe, contornà da ‘na marea de sganassade. Recuperade, i è stade infine rimesse al só posto, sora el col dei pori satiri de piera… ma a dir la verità, un pocheto storte (come se pol constatàr ancora dèsso)!
Ma no’ l’è stà’ mia finì cusì… no!! De fronte al palasso dei puoti gh’è el palasso Vimercati el parón del quàl l’à vossù dir anca lu el só parèr su le famigerate cariatidi… tacando su la ciave del portàl, un mascarón co’ la boca spalancada e la lengua a pingolón, quasi par farghe ai bruti inparmè… ’na eterna sgogna.
Col tenpo, paraltro, la gente l’à finì col ‘bituarse anca ai puoti che i è deventadi neri oltre che caroladi… e la ghe passa soto sensa gnanca vardarli… pòri puoti, che co’ la testa incassà sul col, piegà un fiantin da banda par che i se perda in malinconici pensieri e ancora più tristi considerassioni su la memoria curta de ‘sto mondo che ne le só mile insulse façende, sepelisse tute le glorie… tute le storie, parfìn quela dele tre compagnie de crociati che Verona l’à mandà a conbàtar par nostro Signor; ‘n avenimento eternado ne l’altàr del Rosario che ‘sti nostri soldadi de ritorno i à oferto a la Madona in Santa Anastasia insieme con un timon de nave turca che da alora el fa mostra, tacà con ciodi e cadene, dal sofito de la capela che l’èra denominà ”del Pisanello”. Un cimelio che i me concitadini ancora, a distansa de secoli-seculorum i se ostina a scambiàr co’ na massela de balena.

Wanda Girardi Castellani