L’Angolo de la Wanda – Novembre 2010 – “”Chinatown”… a Verona”

…a cura di Graziano M. Cobelli

gcobelli05@gmail.com
Wanda Girardi Castellani

Quatro Ciàcoe: da Verona

“Chinatown”… a Verona

Fra poco, anca qua intorno, vedaremo case come questa!

Me li ricordo ben: ’pena zo da i ponti, specialmente quel “de le navi”, sechi, gialognoli, minudini e pitosto bruti, senpre con al col la marcansìa: “clavate, clavate de tuti i cololi, una lila… solo una lila.” Me pare l’era un so afessionado cliente e par ’na olta che me mama la s’à ardegà a cronparghe la cravata da la so vecia marcantina (a uno e çinquanta) è vegnù fora ’na barufa.
Prima de la guera la presensa cinese ne la me çità l’era pitosto scarsa, tanto che quando se ghe ne incontrava uno se lo vardava con curiosità. Me mama, davanti al camin, menando la polenta, la me cantava: “E anca i cinesi i va via có l’onbrelin ma uno l’era sensa e ’l s’à bagnà el coin… e quando l’è stà a casa tuto inrabià… l’à ciapà la fòrbese e ’l coin el s’à tajà!” Parché la magior parte de quei che ai me tenpi i era in circolassion i gavéa la suca pelada dapartuto, salvo ’pena sora la cópa da dove partiva el cosideto, soranominado “coin”.
De ’sto popolo fisso come le formighe se saveva quel che n’aveva contà Marco Polo nel “Milione” (più fòle che verità) e quel che avéimo catà sù, lesendo i libri de Pearl Buck, cioè: miseria, fame, ignoransa, e in efeti l’è stà cusì fin che no’ è aparso un capo: Mao Tse-tung, bon de nodar par ore ne l’aqua ingiassà e de scrìvar poesie, ma soratuto bon de métar ordine e de darghe almanco ’na ciopa de pan ai milioni e milioni de cinesi che stava morendo de fame.
Par prima el l’à vestidi tuti co’ ’na spece de divisa, po’ el ga dà a tuti un laoro e un libreto rosso che l’è stà par i cinesi quel che el Vangelo l’è par noialtri cristiani, inoltre l’à fato deventar popolare el “Tai Chi”, na stranba ginastica da far al ralentador in qualsiasi posto i se catasse. Faséa ’n stran efeto védar òmeni, done, buteleti, zóeni e veci far con serietà ’na spece de baleto in meso a la strada o sul marciapié! Un’altra bona idea l’è stà quela de métarghe un fren a le nàssite e i cinesi… se sa… i è prolifici come i cunéi. Beh, andando avanti con decoti de Ginko Biloba e nodade ne l’aqua ingiassà, Mao l’è riussì a deventar par el so popolo, fin che l’è durà… un dio!
Ma tornando a Verona… ne i ani dopo la guera no me ricordo de aver visto in giro cravatari. El lento insinuarse de i “fiói del cel” ne la me çità l’à scominçià, se no me sbalio, verso i ani ’70.
Par primi è aparso i ristoranti che i se presentava con su la porta sarpenti e draghi “cololati”. El menu l’era poco variado; generalmente l’era costituì da carne de polame, germoli de soja e altre robe sènplici. Mi, paraltro, no’ ò mai volù entrarghe parché (da la letura de i libri de la sucitada Pearl Buck) savéa che in Cina i magna formighe, cani, cavalete frite e nidi de salangana. Sti ultimi el me amigo Angelo l’à volù tastarli e par un fil no ’l se stràngola, mandando zo do grafete de fero. A fine pasto i te porta ’na ciotolina de ceramica con del “te”; un digestivo a sorpresa parché quando el recipiente l’è udo pol sucédar che ’l lassa aparir sul fondo ’na dona nuda.
Ai primi ani ’80 circolava la notissia de l’esistensa de sartorìe cinesi che lavorava a la sconta; se te volevi un vestito completo par ’na miseria de schei… bastava dàrghene uno vecio e i cinesi i te lo faseva preciso… simile anca ne la stofa. Naturalmente se tratava de sartorìe clandestine dove che un s-ciapo de cinesi serà su in te ’na cantina i laorava uno tacà a l’altro sensa nissun confort e par conpensi che faséa da piànzar.
Sparì Mao, co la fine de i ani ’70 (se sospeta che ’l sia andà a far un giro a Vicensa) la Cina l’à ricominçià a créssar e a strabordar. Da le campagne i s’à spostadi a le çità e da l’economia rurale i è passadi al più sfrenado capitalismo, el che a pensarghe ben, par un Paese che se dise “comunista” l’è ’na bela contradission. A Verona te i cati dapartuto. Oltre ai ristoranti, e adesso ai bar, i à messo le sate nel canpo de l’abiliamento, specialmente da dona e quando che te vè al sabo ne i vari marcà te cati più banchi cinesi che italiani. Soratuto i vende bluse, camise, borsete, biancheria intima, ecc. a pressi assurdi; le bluse da dona le parte da un minimo de 2 euro a l’una a un massimo de 15. Un regipeto (bela imitassion de ’na celebre marca taliana) te lo paghi da 3 a 5 euro, ’na camisa da note 5 “euli”.
Nel me borgo i à adiritura verto ’na boutique. Mi e la me badante ghe semo entrà par scuriosar, convinte che lì i pressi no’ i fusse pan par i nostri denti… viceversa ò podù cronparme ’na bluseta elegante, de la me talia, a 10 euro.
Certamente sta cucagna no’ la ghe fa çerto ben a la nostra industria che… pagando i operai co’ la tarifa sindacale (miga in nero) e faséndoli laorar al massimo 40 ore setimanali (e sensa la scuria) no’ i pol de çerto véndarte ’na blusa par du euro! Cusì al marcà te vedi ai banchi cinesi l’esercito de le done inpegnà nel predileto sport del “ruma-ruma” nel mentre ne i banchi nostrani scarsegia senpre de più i clienti.
Me lo son dita anca mi che son ’na cativa italiana, ma cosa volìo che ghe femo… quando che in scarsela se ghe n’à pochi, se varda de spèndar manco che se pol anca se (tanto par far ’n esempio) a la borseta a imitassion de cocodril crompà par 8 euro al marcà del marti, da me cugnada ’na olta caricà, come noialtre done usemo far, ga cedù el mànego e l’è finì col c… in ’na pocia.

Wanda Girardi Castellani

↓