L’Angolo de la Wanda – Novembre 2007 – “Finalmente un penel par Paolo Caliari, deto “el Veronese”

…a cura di Graziano M. Cobelli

gcobelli05@gmail.com
Wanda Girardi Castellani


Quatro Ciàcoe: da Verona

Finalmente un penel par Paolo Caliari, deto “el Veronese”

“L’è la… sentà sul scragno, in cao i giardini
sospeso col de-drio tuto da sanca
come el g’avesse un fià de mal de pansa
o ‘na çerta tensión nel star sentado!

‘Sti versi non propriamente rispetosi i m’è sta’ ispirà dal monumento scolpì nel 1888 da Romeo Cristiani su bosseto de Torquato De la Torre. A posàr par la bela statua che rapresenta el famoso pitór Paolo Caliari l’è stado uno dei personagi più popolari de la Verona fine otoçento: Luigi Scalabrini deto Romeo, stimado antiquario con esercissio in Sotoriva… celebre par i schersi che’l se inventava ma soratuto par la só grande generosità: un siór che ai schei ghe piaséa darghe aria!
L’èra conossù come “l’amigo dei spassacamini” parché l’ultimo de carnevàl l’usava ofrirghe ai pòri buteleti che se guadagnava la pagnoca netando i camini un pranso co’i fiochi. Eco riportà da “L’Arena” del 1905 el menù: taiadele in brodo, manso co’ i pearoni, polame co’ le patate, formaio, cafè vin e fogassa. I taoli, fati de asse montà su cavaleti, i vegnéa parecià soto i portegheti de l’atuàl Teatro Novo, soto quei de Sotoriva , in piasseta Pescheria e nel’ostaria Da Balin. Oltre che par i spassacamini, però, la generosa scarsela de Romeo la se verséa anca par un çentenàr de poareti de la çità.
De ‘stó Romeo Scalabrini, al qual el storico veronese Giuseppe Ragazzini g’à dedicato in un só volume un gustosissimo sagio (Quela màcia de Romeo) volemo seràr la parendesi zontàndoghe che nel luio 1918 inviandose in portantina all’ospedal… cossiente che’l suo l’èra un andàr sensa ritorno, l’à vossù passar par la via Nova e el Listón coi finestrini verti… e col capèl in man l’à saludà a drita e a sanca:
“ciao… ciao a tuti… vao a l’ospedàl a farme ciavàr!!!”
Eco in poche righe descrito el modél al qual s’à ispirà Romeo Cristiani par el só Paolo Caliari!
La statua in prinçipio l’è stà messa davanti a la splendida cesa de Santa Anastasia, capolavoro del gotico veronese, ma po’ in seguito l’è stà’ trasferida al giardini de la Giarina a du passi da n’altra bela cesa veronese: S.Maria in organo, celebre par el coro e el candelabro, opere de Fra Giovanni, tuti du lavoradi a tarsie de legni de tuti i colori e de tuto el mondo (‘na maravéia che no’ la g’à gnente da invidiàrghe a Bergamo Alta).
El nostro Paolo Caliari deto “el Veronese”, simile a un “lupo de mar” brincado al timón su la prora de la só nave, se lo pól amiràr in pónta ai giardini de la Giarina… coredà finalmente del só atresso da laoro: el penèl!… sperando che questo el ghe dura, parché da più de un secolo a ‘sta parte, ogni volta che el Comune el ghe n’à fornido uno i mostri (i buteleti)… un colpo co’ un sasso, n’altro co’ ‘na sfiondra i ghe l’à sempre sbatudo zo… e el pòro Paolo, cusita, con el police e l’indice postà de la man destra (uda), più che un pitór l’è parso un prete drio darghe la supa ai só parochiani!

PAOLO VERONESE, al secolo PAOLO CALIARI o CAGLIARI (Verona 1528 – Venezia 19 aprile 1588) l’è stà’ un pitór del Rinassimento e l’è deventà noto come “el veronese” par via che’l d’èra de origine anca se l‘à speso bona parte de la só carriera a Venessia.
Só papà Gabriele, el laorava la piera e proprio par questo l’èra soranominà “Spezapreda” (spacapiera). Ma el nostro Paolo zà nel 1541, a soli 13 ani, l’èra a botega de Antonio Badile..
La só prima opera l’è stà la pala “Bevilacqua-Lasise”. Nei ani vegnù dopo l’à laorà a Castelfranco par i Soranzo (1551) e par el Cardinàl Ercole Gonzaga a Mantova (1552) par po’ andàr a Venessia a pituràr el Palasso Ducale (1553), decorando anca el sofito dela Sala del Consiglio dei Dieci con ‘na serie de tàole de sogeto mitologico e alegorico (dó i è conservade al Louvre de Parigi). La famosa pinacoteca la espone pure “La cena de Emmaus” tra le cosidete “Cene” dal sogeto sacro contrassegnà da un straordinario acordo de luci e de colori.
Na pausa a Verona… po’, via par sempre ne la çità lagunare dove l’à messo man anca nel sofito de la biblioteca Marciana. Come ò dito… a Venessia el gh’è stado fin a la morte, pur acetando altri incarichi al de fora (vila Barbaro a Maser, pale par Padova, Verona e Vicensa).
Nel 1566 par la só çità natale l’à piturà la grandiosa pala de l’altàr magior de san Giorgio in Braida: “El Martirio de San Giorgio e, par la stessa cesa, “San Barnaba guarisse i malati” (Museo di belle arti, Rouen). Quel ‘stesso 1566 l’avea sposado Elena Badile, fiola de Antonio da la qual el g’à ‘vudo ‘na brìgola de fioi. Tra ‘sti qua, quei che più i à caminà su le só peste i è stà’ Gabriele e Carletto, dissepoli del Ligozzi. Só devoto colaboradór l’è stà pure el fradèl Benedeto del quàl l‘à curado lú l’educassión artistica. Ma in quanto a dissepoli el ghe n’à ‘vudo tanti specialmente de veronesi: el Zeloti, el Brusasorzi, so neodo Benfato, el Montemezzano, l’Aliprandi, el Varotari, el Canerio, el De Stefani e ‘l Ligozzi..
Le opere de Paolo Caliari, realisade in stile manierista venessian i è caraterisà da penelade colorade in maniera spetacolàre. In quele più tarde come “La Lucrezia” del Kunsthistorisches de Vienna se intuisse zà i segnài de ‘na sensibilità luministica prebaroca. De la vasta opera del Caliari gh’è restà a Verona, tra le altre: in san Paolo (capela Marogna) ‘na Madona fra i Santi e donatori e nel museo de Castelvecio se pol amiràr quatro tele e tri afreschi. La deposission de Cristo, Madona e i SS Gio.Battista e Ludovico Vescovo. La famosa dama col cagneto, el ritrato de Pase Guarienti, ‘na Gentildona, ‘na dona a la balaustra e un butìn sentà.
Altri afreschi i vièn da la só scola.
El Berenson l‘elenca più de 300 opere de Paolo Veronese sparse par tuto el mondo.
‘Na sessantina i è a Venessia, Firense la ghe n’à tredese, Milan diese… altri diese i è a Roma e po’… via: Torin, Padova, Napoli, Genova ecc. ecc.
Ma a l’estero el più bel grupo de opere del “Veronese” (25 tele) l’è a Vienna. Parigi el ghe n’à 20, Madrid e Londra quindici, Dresda 12, New York, Filadenfia, Stoccarda, Dublino, Edimburgo, Berlino, Amsterdam ecc.
In fine l’è esato dir che Paolo Caliari l’è stà un precursór del baroco. Sul só esempio, S.Ricci a l’inissio del seteçento l’à sveià dai sòni la scola venessiana, e gh’è andà drio parfin G.B.Tiepolo.
De Caliari è stà fedele dissepolo postumo el Delacroix e tra l’esercito dei amiradori anca el grande Çézanne!
Sto grande pitòr, a Verona se pòl vederlo in pònta ai giardini dela Giarina, vissin al Teatro Romano e al Ponte Pièra… con la facia seria de l’antiquario Luigi Scalabrini deto Romeo (che serio no l’è mai sta), sentà de traverso su una ciàpa sola (come uno che’l g’abia problemi a sentàrse del tuto), con un brasso alsà e du dei postadi… se tra i du dei no gh’è gnente no l’è che el sia drio far OK come i ‘mericani… l’è solo che i ga butà zò el penel n’altra òlta!

Wanda Girardi Castellani

↓