L’Angolo de la Wanda – Marzo 2010 – “A tuti la so croçe”

…a cura di Graziano M. Cobelli

gcobelli05@gmail.com
Wanda Girardi Castellani

Quatro Ciàcoe: da Verona

A tuti la so croçe

Son senpre stà del parer che quei che tira un cioco dormendo i sia i più fortunadi. Me ricordo un nostro amigo, sindaco de un paese sul Garda, che a 65 ani tute le matine ’pena fata la colassion, infilada la tuta el se masenava du kilometri de corsa in riva al lago. L’era suto e san. Tre volte a la setimana el zugava a tenis e quando l’era la stajon, col s-ciopo in spala e ’l so can tacà ai calcagni, l’andava pure a cacia e mi lo sò ben, parchè quando el ciapava un fasan, dato che a casa sua no’ i ghe ne podéa più, el ghe lo portava a me marì e a mi: solo a védarlo, me vegneva el mal de pansa. Se doveva tacarlo via a testa in zo a farlo frolar soto pena. Ogni matina se ghe ne cavava una e se controlava, da l’udor, se l’era ora de métarlo in pignata o in sgaujara. ’Na olta che de note gh’era stà siroco quando ò cavà la pena quasi son voltà-via. Naturalmente par quela sera… gnente fasan!
Ben… la mojér de ’sto amigo inveçe, a difarensa de lu, l’era la classica piaga d’Egito, e a védarla te avaressi giurà che no’ la sarìa rivà gnanca a la fine de la setimana. ’Na matina, sicome che ’l marì, contrariamente al solito, el tardigava a saltar fora dal leto, l’è andà a svejarlo. El nostro amigo, co i primi ragi del sol che faséa baeto da i scuri a sbacio, l’apariva belo chieto co’ ’na man soto la ganassa. Paréa che ’l dormisse ma da quel sòno lì no ’l s’avarìa mai più svejà! Par conclùdar ve dirò che la so sposa, vecia-stracampida, operà, ”stradeladeoperà”, a 90 ani l’è ancora al mondo… e démoghe rason al proverbio che dise che “i pio-pio no ’l li vol gnanca Dio!
Mi no’ sò come che la pensè voialtri, ma mi ne le me orassioni go senpre dimandà al Padreterno la stessa roba che ghe dimandava Marcello Marchesi: “Signor, fa’ che la siora da la rengaja quando la vegnarà la me trova viva!” La roba che me fa più paura l’è la perdita de la dignità umana che generalmente ghe càpita a ci ga malatìe longhe e dolorose.

Cussì te sistema el Parkinson…

Man a man che la fine la se fa più viçina se fa anca più insistente la me racomandassion: “Signor, te prego, quando che rivarò a l’ultimo scalin fame rivar in tenpo al WC!” (e no’ se trata de le me inissiali!)
Tuto ’sto “capel” l’è par introdur el discorso su la magagna che ’l Padreterno l’à volù inveçe darme a mi: el morbo de Parkinson: ’na condana a vita, parché a tutora no’ la ga guarigion. Inoltre, mi… che ò senpre amà caminar, recitar, parlar, lésar, gnanca farlo aposta, 14 ani fà me son trovà ’sto bel regal: ’na malatìa del sarvel, degenerativa, che tòco par tòco la me sta portando via propio tuto quel che me sa caro. El profe che m’à diagnosticado el mal, ne l’intento de consolarme el m’à dito che “de Parkinson no’ se móre”… Sarà anca vera ma ghè çerti momenti, però, che te vien da vardar con interesse la finestra verta!
El Parkinson l’è ’na malatìa che se pol portarse drio, co’ ’na fadiga cagna, anca vinti ani e più, inoltre l’è carica de “optional”, uno più maledeto de quel’altro: par prima roba taca la tremarela, ma almanco par questa ’na trentina de ani fà i à scoperto el Levodopa che, se l’è vera che no ’l te guarisse, al riesse almanco a fermarte el motorin che ’l te fa balar da la testa ai pié, causado da la consumassion de quela parte del çervel che el comanda i moimenti (la dopamina). Pian a pian te te incorzi che l’è deventà ’na fadiga da Ercole anca solo tajar ’na piza, tacar un boton, star in equilibrio, girarse nel leto, dormir, ecc.
Te tachi a cascar in tera de peso come un saco de patate e se no’ te ghè fortuna te te rompi qualcosa. Mi go un zenocio ’sassinà, me son massacrà la facia contro el spìgolo del bagno e via cusì. Fate tute le prove… co’ l’ultima, la risonanza “nucleare”, i m’à stabilido la gravità del mal.

Ve lo ricordèo el Papa…

Intanto fa el so “ingresso” altri “optional”: le bave come i butini e la dificoltà de parola (ve lo ricordèo el Papa che quando che ’l parlava ogni tanto ghe spariva la voçe e spesso i ghe sugava la boca?). De note i malà de Parkinson no i cata pace in nessuna posission e, inciodadi, i vede passar tute le ore sensa catar sòno. De medissine par el Parkinson ghe n’è tante e tute più o manco le funsiona, ghè solo che se aumenta la dose e a un bel momento par non andar in… overdose, se ga da cambiar marca. Quando po’ no’ ghè più àlbari andó picarse, se passa a la pompa. Se trata de ’na machineta a pile colegada con un’ucia. Se la carica con l’Apofin che atraverso un caveto el te vien trasferì ne la pansa. Purtropo, a forsa de busi ’sta qua la te deventa tuta un gnoco e a sto punto se passa a ’n’operassion con la qual la medissina, ansiché traverso el stómego, la va diretamente nel duodeno (duodopa) traverso ’n altro stranfer ancora più intrigoso da tirarse drio. Ghe sarìa anca ’n’operassion da far, sta òlta ne la testa, ma l’è solo par quei manco veci! A la fin fine, però anca questa l’è un surogato del tòco de sarvel che no funsiona… un paliativo come tuti quei altri in atesa che i scopra qualcosa de sicuro e, soratuto, definitivo.
E no’ go dubi: el rimedio prima o po’ i lo scoprirà: pecà che par mi sarà tardi oramai; ghe scometo che sarò za andada a magnar el radecio da la parte de la soca!

U.P. Associazione di volontariato a sostegno del morbo di Parkinson
Via A. Saffi, 43 – 43100 Parma tel. 0521-231318
Via Don Gaspare Bertoni, 6 – 37122 Verona, Telefono e fax 045-597351
upvr@libero.it Aperto: Mercoledì 15.30 – 18.30; Venerdì 10.00 – 12.00

Wanda Girardi Castellani

↓