L’Angolo de la Wanda – Gennaio 2010 – “Da STALLAVENA … su le PESTE dei BRIGANTI de la VALPANTENA”

…a cura di Graziano M. Cobelli

gcobelli05@gmail.com
Wanda Girardi Castellani

Quatro Ciàcoe: da Verona

Da STALLAVENA …
su le PESTE dei BRIGANTI de la VALPANTENA

El panoramico sentiero che da Stallavena rìva fin a la Grotta de Falasco (FOTOSERVIZIO AMATO)

El disissete de otobre a Stallavena de Grezzana (Vr) i à inaugurà el sentiér turistico che da via Segai el porta i visitadori a la scoperta de interessantissime testimonianse su la presensa dei briganti ne la Valpantena.
Qua se pol ancora védar i ruderi del castèl fabricà nel Xll secolo da la fameia Turrisendi e deventà intorno al 1600 el rifugio de Francesco Falasco, un picolo possidente del posto entrà a servissio de la fameia Cozza.
A quei tempi sucedeva spesso che i nobili con diriti feudali i mantegnesse “al soldo” òmeni ciamadi “Bravi” o “Buli” pronti a far, al só comando, tute le pèso porcade.
Francesco Falasco, però, no’ l’è miga da confóndar con Paolo Bianchi de Bregantin, deto “Falasco” in memoria dele legende del lógo. ‘Sto qua l’èra un fior de farabuto; un brigante da prima fila, ‘n autentico assassin. I conta che co’ la só banda par ani el ghe n’à fate de cote e de crue… l’èra, insoma, el terór de la Valpantena andove, sconto de drio ‘na qualche macia l’assaltava con pugnài e archibugi i pori viandanti rapinandoli o sequestrandoli quando no’l ghe faseva la pèle su comissión de qualche don Rodrigo e nominèmoghene du: i Conti Giusti de Santa Maria in Stele e i  Conti Alegri de Gressana.

Le grote de Falasco (VERONA SERA)

Verso la fine del XVll secolo  diverse bande armade fin ai denti le operava a far, su ordinassión, vendete personali. La tradission popolare la conta che a tegnér i contati tra le fameie nobili e la banda Falasco, l’èra un çerto Piélongo, cantastorie nano che l’èra sempre pronto a darghe el so aiuto, tanto a ci ordinava quanto a ci eseguiva.
Nele lónghe sere d’inverno, nei filò che ancora se srodolava al calór dele stale, fin a la metà del secolo scorso, i veci de la Val i contava la triste storia de l’Anzolina Lonardi e i giurava che l’è stà proprio co’ l’aiuto de Falasco che el conte Provolo de la faméia Giusti de Santa Maria in Stele (un giovinoto da la fama pitosto bruta) l’à organisà el rapimento de la butela. La Anzolina l’èra fiola de un comerciante de formajo che’l s’avea trasferì nela çità scaligera dal Friuli… A la fameia Lonardi, colpì dala “peste mansoniana” che dei 53.533 abitanti che i risultava dal censimento de Verona del 1627 la ghe n’aveva lassà al mondo solo 20.630, gh’èra restà viva quel’unica fiola, de conseguensa unica erede de tuti i beni de casa. Tra i tanti pretendenti interessadi, più che a la fiola, a la dota, a domandarla in sposa g’à provado anca el conte Provolo ma la nostra Anzolina l’èra inamorada e promessa al marchese Sagramoso.

Riparo del Brigante Falasco (VERONA SERA)

El conte Provolo alora el s’à consiglià con el nano che’ l l’à fato incontràr par idear un piano, con el brigante Falasco e la só banda nel segreto del rifugio tra le roce. Cusì qualche giorno dopo Falasco co’ i só “bravi” el g’à dà l’assalto a la casa dei Lonardi in quel de Poiàn e l’à rapì la butela scapando po’ verso Ferrara, el più distante possibile da la Serenissima. L’intento del conte l’èra de sposàr l’Anzolina a la sconta, metendo so pare davanti a le robe oramai fate  sensa più rimedio.
El marchese Sagramoso ‘péna che l’à savù quel che era sucesso l’à scominçià a indagàr metendose su le péste de la banda.
Par só conto, el  pàre de la rapida, el s’a rivolto a Venessia, domandando giustissia al “Consiglio de i Diese”. Anca “Pielongo”, pentido el s’a messo in çerca de la Lonardi e andando a parlar con el Cardinal Legato, che governava Ferrara, l’è riussido a scoprir la só segreta preson e a liberarla.
Intanto i “Bandidori” de la Serenissima i à arestado el conte Provolo che, in seguito, l’è sta decapitado in Piassa San Marco dopo che i g’avea demolido “secondo l’uso dei tempi” el castel avito a Santa Maria in Stele.
El Falasco inveçe, caturado, l’è sta impicà soto le mura de Verona.
Fin a pochi ani fa l’era possibile visitar le grote de Falasco, rampegandose longo un sentier pien de piante de “spinarati”, rente a ‘na cascadela “cantarina” che vien zo a ropetoni dal monte Dardera..
Ne l’ombra ‘na romantica ceseta la invita a la preghiera. No l’era longa sta via e el sentier tuto d’un trato, versendose a la luce el mostrava la tóre che traverso la scaleta la portava a le grote dove Falasco l’usava segregar le só vitime.
Soto a le feste de Nadal su par quel sentier andavimo a catar su oltre al “spinarati” el mus-cio par el Presepio.

Come disevimo; el 17 otobre dopo l’inaugurasion e i discorsi de rito, autorità e ospiti i s’a inviadi a pie su par el sentier proteto da 400 metri de balaustra de legno, sistemada per la sicuressa del visitador. Par sta “opera” ha contribuido el BIM Adige co’ un contributo del 40.000 Euro. S’à realisado così el progeto de restauro direto da Moreno Dalle Pezze scominçiado nel 2002, che l’ha comportado, la sitemassion de la Tore, a la qual però  i à serado l’ingresso, e dei muri che i é stadi anca in parte rifati.
Anca se no’l g’a più l’aspeto “rustego” de prima, el novo sentier l’è de sicuro più comodo e anca panoramico. Andando su par la la salita se pol vardar verso el fondo de la vale, cuerta de case, fabriche e marmifici, pensando a quel tempo ormai così distante quando g’era solo alberi e campi, e su le strade piene de sassi, l viandanti a piè o co’i careti i se afretava al sóno del “vespro” del campanil distante par no catarse a l’aperto sul far de la sera, co’l ris-cio de incontràr el “teribile Falasco”

Nei articoli de l’otobre 1989 e novembre 2002 su Q.C emo parlà de la bela Anzolina che da oltre 400 anni, involtolà de veli bianchi, la dorme nela cesa de santa Eufemia soto l’altar del Cristo. Ne la cesolina de l’Alarol a Poiàn (ciamà el santuario dei ciclisti) un “ex voto”, pò’, el ricorda el rapimento e el ritrovamento.
Le storie ligade ai briganti che a quei tenpi i terorisava la Valpantena, i è stade contade, cantade e scrite come à fato par esempio, l’Abate Pietro Caliari co’ La só “Angiolina” ristanpà nel 1988 e “la vera storia de Angela Lonardi” de Tiziana Marchiori Scarabello (Verona 1977). L’ultima publicassión l’è stà un fumeto intitolà “La Valpantena ai tempi del brigante Falasco”. autor Aldo Signorini.

Par la visita a le grote de Falasco telefonàr al Comune de Grezzana al n. 045  8872513.

Wanda Girardi Castellani

↓