L’Angolo de la Wanda – Gennaio 2005 – FUTURISMO; “Se no’ i è mati, no’ li volemo”

…a cura di Graziano M. Cobelli

gcobelli05@gmail.com

Quatro Ciàcoe: da Verona

FUTURISMO; “Se no’ i è mati, no’ li volemo”

La fine del XlX e l’inissio del XX sec. i à visto l’avento de le machine, l’esplosión de le siense, el svilupo de le comunicassióni, la conquista del volo umano, la machina fotografica, la radio ecc…; robe che à messo in crisi particolarmente i artisti. Cosa serviva più laoràr par mesi adrio un ritrato, ‘na natura morta, quando bastava un “clic” fotografico par ritràr in maniera parfeta  lóghi, omeni, e bestie? Alora pitori, poeti, scultori, musicisti i à tacà a Çercàr nóve vie d’espressión liberandose dale cadene, prima fra tute quela de la rima in poesia, indispensabile fin che, par la magior parte analfabeta, la gente la podea impararla e tramandarla solo a pàto che la fusse in rima e metrica, magari a otonari; el metro del “Coriere dei picoli”.
Sul discutibile ma nóvo palco, gh’èra Gian Pietro Lucini che dal 1894 l’èra in lota contro “el zà fato par el novissimo fàr” e, in poesia, par el verso libero. Gh’èra Francesco Balilla Pratella che, in musica, el se batéa par la “distrussión dela quadratura” (1912) e gh’èra Giovanni Papini e Italo Svevo a sostegnér da le pagine de “LACERBA” che la conossensa del sesso no’ la g’avéa da passàr traverso l’inibissión ma traverso la conossensa. A la pónta estrema, po’, Valentine De Saint Point, la ghe atribuiva adiritura positività a la crudeltà, la violensa e la lussuria che la definiva “valori”!  Ma sóra tuti, par le idee e la personalità, spicava Filippo Tommasi Marinetti, poeta, oratór, comediografo, inventór de ‘na nóva leteratura, stimoladór de energie tanto da èssar soranominà “caffeina d’Europa”. Marinetti el s’à batù contro l’Italia bigota, retorica, medioevale, nostalgica e smelensa; l’Italia de Carducci, Pascoli, Fogazzaro; l’Italia “erotomane e rigatiera” de D’Annunzio. La só assión difusa dal “Manifesto del futurismo” del 20 febràr 1909 l’avéa conquistà a la causa Paolo Buzzi, Aldo Palazzeschi, Corrado Govoni, Enrico Cavicchioli. La batàlia l’è stà’ afidà principalmente ai poeti ma l’è anca batàlia contro i musei, i cimiteri, l’archeologia, l’antiquariato, el moralismo, el feminismo e l’autorità dei veci. L’è pan par i anarchici: l’antigrazioso, l’antileterato; insoma “la contestassión globàl”. Futurista l’è ci odia i veci sbecoladi monumenti, la storia passà, la tetragine, la monotonia ecc… “Bisogna spuàr su l’altàr de l’arte”, sbràita Marinetti nel só “manifesto” (1912) e no’ volemo aplausi ma fis-ci” (e gh’è da dir che in questo l’è stà’ contentà a la grande).  Via par sempre el sentimentalismo e porta spalancà a tute le strambarie, i matessi, le ilogicità. Al bando Puccini, Leoncavallo, D’Annunzio che “i vende par meiàra de franchi opere che no’ supera el valór de 40”. Noialtri (siga Marinetti) volemo che l’opera d’arte la sia brusà sul corpo del só autór! Par i futuristi no’ g’à da èsserghe legi né codici, né polissioti, né magistrati. “Frusta o dinamite”. I vol la libertà assoluta e i vede ne la guera “la sola igiene del mondo”. I è anticlericali tanto da bàtarse par cassàr-fora el Vaticano da l’Italia. I è contro le monarchie, contro l’amor visto come sentimentalismo. I dichiara la faméia “quela che sòfega le energie vitali” e i è contro al matrimonio, esaltando l’amor libero. I vol  “copar el ciaro de luna” e darghe n’ideàl pessatada a la nostra Venessia antica, “marcà de antiquari e imbombegà de romanticismo”. De la Çità de san Marco, come de Firense (patria de ciceroni e insonolidi veturài) i vorìa far “tabula rasa”. Idem par Roma “lebra de rovine”. Nel mirìn anca Verona e soratuto el ghèto, salvà dala demolissión dal bataliero intervento de Matilde Serao (N°3 “Quatro ciacoe” 1998). Via tuto,  par far tuto de nóvo, parfìn la cusina par la quàl el solito Marinetti l’à inventà “complessi plastici mangiabili”, dopo aver condanà la pastassuta “assurda religione gastronomica italiana”. Contro le scóle parte a lancia in resta Papini: “Serémole tute!”  Mentre Prampolini el ghe zónta: “bombardemo le academie!”
Un sfrisón col làpis rosso sul teatro greco, sui monumenti (specie quei dei “caduti”). I riva al massimo; “ricostruìr l’universo sostituendose a Dio”. (ricostrussión futurista de l’universo de Balla e Depero-1915).
El futurismo, fondamentalmente misògino, l’à messo al bando la dona ideàl, dannunsiana e fogazzariana e la vamp cinematografica.
L’amor no’l dovèa deventàr ‘n ostacolo a la marcia de l’omo ma solo strumento de gioia par i sensi.
Paraltro, Palazzeschi nel só manifesto del del 1914, negando anca el dolor, l’à afermà, 70 ani prima de Barnard, l’intercambiabilità dele parti del corpo. L’omo (dise pò’ Palazzeschi, ricalcando Epicuro) no’ l’è fato par patìr ma par gòdar e bisogna educàr i fioi a rìdar. I “tristi” i g’à da èssar ricoverà!
“EL VERSO LIBARO” – Co’ la “religión dela velocità e de la sìntesi, l’imaginassión sensa fili dele tavole parolibere” la poesia la g’à da èssar ribèle a tute le forme passà (Marinetti-discorso ai triestini 1909).
“LA DISTRUSSION DELA QUADRATURA” – 9 marzo 1913, Teatro Costanzi di Roma. L’è scominçia co’ ‘na sinfonia futurista del maestro Balilla Pratella,”Inno alla vita”; esempio de distrussion dele simetrie sostituide co’ “l’intonarumori” e grupi de ululadori, rombadori, sibiladori, crepitadori, stropiciadori, ronzadori e ci ghe n’à più ghe ne meta. Strumenti de nóvo conio acolti, ovviamente, dal publico con ‘na selva di fis-ci e lanci de varie robete, non tute nominabili!
Gh’è da dir che la musica futurista la g’à ‘vù pochi svilupi.
“EL ROMBO DELA PITURA” – La pitura futurista, dise Carlo Dalmazzo Carrà nel só manifesto del’11 agosto 1913, l’è fata de sóni, rumori e udori. I rossi i siga, i verdi i stride ecc… ‘Sta pitura la vol la cooperassión attiva de tuti i sensi; pittura-stato d’animo plastico de l’universàl. Bisogna pituràr come i imbriaghi, cantando e regatando (vomitando): sóni, rumori e udori.
L’8 marzo 1910 Umberto Boccioni, Carrà, Russolo, Balla e Severini, dala ribalda del politeama Chiarelli de Torìn i sbara el só manifesto (11-2-1910). Tra i pitori de la vecia guardia: Segantini, Previati e Medardo Rosso.
Ne la pitura futurista el ritrato no’l g’à da someiàr al modèl. La figura no’ la va copiada ma “fata” con risultati simili ai ragi X.
Gh’è da dir, specie riferendose a Boccioni, che ‘na volta ‘bituà i oci a penetràr nel quadro co’n altro modo de vardàr, se se ne inamora. Personalmente ho passà più de ‘n ora davanti al ritrato de la “Madre”, estraniamdome dal mondo intiero e soratuto desmentegandome del scórar del tenpo.
“LA STATUA VERTA” – El manifesto dela scultura futurista l’è de Umberto Boccioni (11-4-1912). L’artista l’aferma el prolungamento del spassio dele robe, la resa plastica dele influense de’n ambiente e dei ‘binamenti atmosferici che li ingropa al sogeto.
“Scultura verta” – spalanchemo la figura e serémoghe drento l’ambiente. Interessanti, tute, le sculture del grande Boccioni, forsi l’unico tra i futuristi a restàr su la vetta dela notorietà mondiale. Purtropo, dopo la só morte, avegnù el 16/8/1916 a Sorte de Chievo-Vr (vedi n°3 de”Quatro ciacoe”-1986) sicome le sculture no’ le passava da la porta, i l’à rote e butà ne le scoàsse. Solo un pàr i è stà salvade. Anca i quadri, sensa el tempestivo intervento del celebre parapsicologo dott. De Boni, i avaria ris-cia de finìr distruti a Verona, in un appartamento de via San Paolo, colpì da le bombe anglo-americane.
“LA CITA’ CANTIER” – A insognarsela l’è stà Antonio Sant’Elia, achiteto futurista, scomparso giovane nela guera “15-18”.
“LA RIVOLUSSION TEATRAL” – L’è scominçià al teatro Costanzi de Roma co’ le serate futuriste de Marinetti acolte co’ ‘na vera rivolussión tra el publico; rivolussión anca sul palco che ‘na sera l’è adiritura franà soto la cagnara.
“FILM FUTURISTI” – L’inissiativa l’è nata dal grupo fiorentin “Italia futurista” ma zà nel 1910/12 Ginna e Carrà i avea realizà i primi cortometragi d’avanguardia. El film “Vita futurista” l’è stà ideà a l’hotel Baglioni de Firenze da Balla, Marinetti, Ginna e Carrà, Venna, Settimelli, Carli, Neri e Nannetti. L’è risultà de 1200 metri ma la censura la l’à ridoto a manco de mile.
El contributo futurista a la fotografia l’è stà’ dà da Anton Giulio Bragaglia e el fradèl Arturo (1910/12, “La fotodinamica”) con el manifesto de l’11 april 1930, firmà anca da Marinetti.
“LA MACCHINOLATRIA” – Con el futurismo nasse “la poesia de la machina”. Poesia dei tecnicismi, aeropittura, aeropoema (Marinetti 1935).
E Marinetti el continuarà a cantàr el splendór geometrico e mecanico (1914) magnando “carneplastico”, fasendo zugàr i butini con i zugàtoli futuristi de Balla e Depero e viaiando su la só legendaria auto bianca. A Verona, el poeta pitór futurista Quirino Sacchetti el sfodra la só cravata “futurista” de banda mentre Balilla Pratella el core sonando un pianoforte montà su le rude. Boccioni e Carrà i urla ‘traverso i só quadri e le parole le çerca la sintesi nei romansi de Carrà. Cangiullo inveçe el forma orchestre de sete tromboni, un violìn e ‘na motocicleta.
Un movimento, quel futurista, che cata el só Vangèl nele parole de Marinetti: “Mi no’ g’ò gnente da insegnarve, neto come són da ogni quotidianismo e faro de ‘na aeropoesia fora tempo-spassio”
Gente de quà o vegnù da le stele?
Citadini de ‘n altro mondo che nel giro de ‘na quarantina de ani, i n’à lassà ‘na pesta fonda e i só nomi, a matita, co’ ‘n comovente saludo, su la lapide de ‘n calto al cimitero de Verona; quela de Umberto Boccioni, amorosamente curà (come la piereta comemorativa a Sorte de chievo) dal Maestro Luciano Pollini.

Wanda Girardi Castellani

p.s. Ringrassio l’amigo Luciano Pollini,
noto pitór e studioso del “movimento”,
(in special modo par quanto riguarda
Umberto Boccioni), par l’aiuto
che’l m’à dà, metendo, ancora ‘na olta,
a servissio de Quatro Ciacoe, le só
apassionade ricerche e la só competensa.