L’Angolo de la Wanda – Febbraio 2005 – “EL BÒLE… “DIESE SCHEI DE BÒLE… COL PESSETO!””

…a cura di Graziano M. Cobelli

gcobelli05@gmail.com

Quatro Ciàcoe: da Verona

EL BÒLE… “DIESE SCHEI DE BÒLE… COL PESSETO!”

No’ gh’è veronese al de sóra dei “anta” che no’l se lo ricorda…”El bòle”.
El vegnèa ne le corte, ne le piasse, fóra da la porta dele cese e de le scole col so sgabél de legno sul qual el postava la téia de rame granda e tonda e, vèrta la sportela el tacava a sigàr: “è rivà el bòle… !”
Veramente, i primi a inviàr ‘sta professión i èra stà’ i toscani e ‘l só sigo più precisamente l’èra: “L’è calda… la bólle!!” E da quel: “la bólle” è vegnù fora el termine veronese “bòle” par designare el castagnaccio, overo… la torta de farina de castagne, aqua, sal e oio, cota in forno e magnà, de gusto, bèla (e apunto) de bóio, postà su un toco de carta da becàr…
A Verona, fin nei ani çinquanta gh’èra anca diverse boteghe che vendéa, oltre a la bòle, el “papassìn” (dolçeti de farina de castagne, pignói e uéta passa) e altre squisitesse, sempre derivà da le castagne. Me ricordo che ghe n’èra una anca in via XX setembre, davanti al me uficio, cusì ogni tanto svicolavo fóra, traversavo la strada de corsa, me rifornivo, pò’ ’na òlta rientrà al sgobo, infilavo i scartossi in un calto udo de la scrivania e ogni tanto verséa, me impenivo la boca, e seitavo a scrìvar a machina. El me parón, paraltro, che’l g’aveva el naso fin come un can da tartùfoli, quando el vegneva drento, dopo aver usmà in tute le diressioni, par scherso el me ricatava; “e ‘désso dàmene un toco anca mi se nò te paro via!”
Parlemo dei ani dal 1948 al 1955… dopo, una a una le boteghete de castagnaccio che riforniva anca i anbulanti i è sparide e con lore è sparì un’epoca de la qual tanti come mi i prova ‘na granda nostalgia.
Ma tornando al “Bòle”, le prime aparissioni de ‘sto personagio che ne la facia e nel vestìr el faséva ricordàr le piture de Rosai, i è stade de qualche ano dopo la prima grande guera. Carateristico, el portava ‘na baretina a visiera e maioni a col alto, da ciclista con stampà sóra, apunto, la marca de ‘na bici. Come ò dito, el vegnea da la Toscana portando in giro la so semplice arte; quela de cósar in téie de rame dal bordo basso e la sportela mobile, la farina de castagne par fàrghene ‘na specie de torta molesina dal profumo che’l passava i sete muri come la benedissión.
Nei ani trenta, quando che’l rivava in corte da mi co’ la so padelona coerta de carta giala ripiegà più òlte, postà su l’anca riparà dal grembiàl bianco, al só riciamo: “L’è calda… la bólle” tuti noialtri buteleti coréimo a ròmparghe le tògne a le mame e pò’ co’ la man vitoriosamente alsà a strénsar i conquistadi diese/vinti schei, andàimo a crompàrse la fetina de bòle che’l vendidór el taiava a triangolo co’ un longo cortèl da cusina sensa desmentegarse de la fatidica zónta, overo del “pesseto”.
L’usansa, durà almanco trent’ani, la scominçiava a otobre co’ le scole e la finiva co’ la fiera de marso. Ma la bòle l’èra pò’ reperibile tuto el resto de l’ano. Noialtri de Veroneta se servivimo, oltre che in via XX setembre (ancó ribatesà via negroni… par el fato che no’ te ghe cati più un “bianco” gnanca par morte morìr) anca in quel de San Nazàr e in borgo Venessia.
Ancó, de bòle, se pol par caso incontrarghene ‘na qualche fetina destesa su un piato de lusso, in çerte vetrine de panetiér o, bela calda come ne la vecia tradissión, in casa de qualche nona bona de usàr la farina de castagne che qualche vecio frutaról ancora el tièn, insieme a le miole de suca, a l’erba madre e a le faoline impresonade soto vuoto spinto, in sachetini de plastica.

Wanda Girardi Castellani