L’Angolo de la Wanda – Aprile ter 2000 – “El PISTOR”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“El PISTOR”

I è vegnù su come i fónghi dopo la pióva, i grandi supermarcà. Solo in Veroneta, dai ani otanta a ‘dèsso, i ghe n’à vèrto ‘na diesina, tuti co’ la só fila de carèi scancanadi; çinquesènto franchi par destacàrghene uno da la brìgola e via, su e zó tra i vicoleti, in mèso a meiara de articoli; quei più cari a l’altessa dei oci, quei a bonmarcà nei scomparti in alto, più fóra de man. Noialtri magari s’èrimo entradi par curiosità o par crompar solo un pacheto de farina ma quando po’ rivemo a le casse, el carel, come par maghesso, se lo catèmo pién de tuto, specie de robe inutili racimolà col speiéto del “tri par dú” o del “ciapa du e paga uno”. El belo l’è che ‘ste botegóne i è senpre piene de clienti a tute le ore, clienti che i crompa montagne de roba come se in casa i fusse in çinquanta! A l’ora de pagar, te gh’è da descantarte a infilar in borsa la tó merce, scaraventà su quela del cliente che t’à precedù, nel mentre che za i te mucia inçima quela de quel che vièn dopo de ti.
El raporto “pistor-cliente” l’à finì d’esìstar e anca qua se se sente “nùmari” come dapartuto, a scominçiar da l’ospedal, infìn al çimitero.
El “pistor” de ‘na òlta de solito l’èra belo in carne, co’ la panseta coerta da ‘na traversa o un grenbial bianco. Senpre alegro; taiando-zó el salado col cortel, a bele fete serie, magari el te contava ‘na barseleta o el te informava de quel che era sucesso in borgo. Naturalmente el se informava anca de la to salute, pronto a darte qualche bon consilio sul tipo de: dú goti de vin i guarisse tuto!
Fóra de la porta al giòvedi gh’èra la vascheta de fero smaltà col bacalà in móia. In parte al banco, el bussoloto dei crauti e quel de la conserva co’ stampà l’alpin drio ranpegar. Pò’ du sachi; uno de polenta e uno de farina con inpiantà la so brava sessola de legno, fornì da la canolara che, co’ la botega sul gropon, la vegnéa zó dal Friuli. Quando che se crompava i ovi, generalmente parché no’ i se rompesse el pistor el le infilava nel scartosso de la polenta, de la farina o del sùcaro. Me sia ‘na òlta la se n’à po’ desmentegà e la butà tuto, ovi e polenta, ne l’aqua de bóio.
El me vecio pistor el se ciama Gelindo e l’è de ‘na simpatia unica. La spesa la fasso da lu fin dai ani ’60 e l’è un gusto poderghe dir, savendo che’l capisse: “El me daga un eto de bóndola” (quela che i ghe ciama Bologna), un pàr de “chìfar” (panìn a forma de quarto de luna) o ‘na “spongada” (pastina dolçe da cafèlate). Se te ghe prói al supermarcà, come minimo i te scambia par n’èstaro !
La matina de solito son la prima a entrar in botega, dopo averghe fato far el gireto ala cagneta. El sior Gelindo l’è uso rifilarghe a la Picia ‘na fetina de parsuto cusì-che, anca se passo a le 6 de matina o a mesanote, ela la se incioda davanti a la saracinesca e no’ te la cavi da lì gnanca co’ un caroarmato.
La botega in tuti sti ani no’ l’à praticamente mai cambià el “luck”. Gh’è ancora le caramele nei bussoloti de vero, su la mensola drio del banco e te cati pura el bacalà in moia ne la vascheta, anca se, par motivi de igiene, i la tièn drento al coèrto. Al banco gh’è el fiol de Gelindo che ho visto buteleto. El papà el dà però ‘na man a servir i clienti. El fato l’è che distante da la so botega no’ l’è propio bon de starghe. Questa l’è gente de la qual s’à perso el stampo!
Purtropo, i supermarcà i ghe n’à fato serar tante de ‘ste boteghe. Altre le se tièn brincà con ‘na fadiga viliaca, destinade a serar, prima o dopo, anca lóre lassandosse drio un mondo senpre più anonimo e scolorido. Ma, fin che se pol, démoghe drento a dimandarghe ancora ai pochi “sior Gelindo” ch’è restà: “Un èto de bondola e un par de chìfar, par piaser”.

 Wanda Girardi Castellani