L’Angolo de la Wanda – Febbraio 2013 – “Verona in tola”
…a cura di Graziano M. Cobelli
gcobelli05@gmail.com
Quatro Ciàcoe: da Verona
Verona in tola
Mi son senpre del parere che la mèjo cusina del mondo l’è quela italiana e, soratuto, quela veronese.
No son solo mi a pensarla in sto modo: a Verona podemo vantar ricete celebri e un cogo, ormai riconossudo da tuti, Giorgio Gioco, che davanti a i fornèi no ’l conosse rivali.
Cussì anca mi adeguo un poche de ricete veronesi… in versi, ansiché in prosa.
***
POLENTA E SALAME
No ghe ne vol mia tanta de fadiga
par far ’sto piato che l’è po’ ’na consa!
La linia çerto no ’l la mete in riga
e ’l fegato par giorni no ’l se sponsa.
La polenta la sgionfa e la incocona
a, fumante, la tira come un bo
col salame par sora che ghe dona
lustro… co’ l’onto che ghe cola-zó.
Sburtà da i goti la va via de anda
par quanta drento el saco sensa rede
la cata senpre un buso in qualche banda.
Fin che tra-zó salame e tra-zó fete
salta i botoni e vien ’na sarabanda
drento le braghe deventade strete!
***
I GALANI
No ghe vol gnente par far le frìtole
ma far galani l’è n’arte fina,
mi i fao co i ovi, co’ la farina
sùcaro e buro… po’ i tiro a méscola.
Ghe dao de graspa ’na spiansadina
po’, fato el sfojo me i tajo a strìcole
co’ la rudela… come partìcole
sora de l’asse de la cusina.
I segno in meso pa’ intorcolarli
che i fa un bel védar… tuti ’na càpola.
Li friso in ojo par po’ scolarli.
I me galani, cusì friabili
siga al miracolo ci vien tastar
legeri e suti come le gàleghe!
Wanda Girardi Castellani
