L’Angolo de la Wanda – Settembre 1993 – “L’ultimo de i Scaligeri a Soave insignido de l’ordine de “Spadarini de la Castelania de Suavia””
…a cura di Graziano M. Cobelli
gcobelli05@gmail.com
Quatro Ciàcoe: da Verona.
“L’ultimo de i Scaligeri a Soave insignido de l’ordine de “Spadarini de la Castelania de Suavia””
‘Na dorninica da fogo, el 16 de magio! Su le tori merlade a la “ghibelina” de ‘l castel de Soave, el sol, ale “5 de la tarde” (scomodando G. Lorca), el batea la massa come su ‘n’ancùsene (incudine), spresonando sdinse. I à dito che sérimo, su per zo, in vintimila e, de sicuro, nel cortil d’onor, el publico l’à passà via tuti i record, almanco a quando me ricordo. Mi, da dodes’ani “araldo” de sta bela cerimonia che la risale al 1300, in quanto istituì da l’Imperatrice d’Antiochia, moier de Federico De La Scala, al sono de tronbe e tamburi ò predicà, tra la letura del proclama e la condussion de l’intiero programa de baleti, sbandieradori, consegna de le onorificense ecc…, çirca un’ora e mèsa, fin a farne vègnar la poeia come le galine.
‘Sto ano, le “Castelane de Suavia” i è stà’ sié: Carla Vittoria Corradini Gardoni, docente de formassion agricola, Anna Cicolon, de la dita P.A.F.; par l’opera de beneficensa, specialmente verso le popolassioni bosniache, a le quali l’à porta personalmente un cargo de generi alimentari, sfidando le site (saette) de la guera; Teresina Molinarolo Pieropan, esperta nel setor enologico; Maria Pia Gini, parona de una tra le più prestigiose cantine de Monteforte d’Alpone ne la qual nasse ‘na maraveia de “Reciòto” e de “Froscà”, da tirar su anca i morti; Maruska Stupiza, da Lubiana, architeto, progetista e Janet Lee, grande conossitrice de vin e artefice de la propagassion del “Soave” nel mondo.
La Presidente Nene Lovat tra i sindaci de Soave e Monteforte.
A riciamar, paraltro, un s-ciapo de giornalisti e de operadori televisivi, l’è stà soratuto la presensa del baron Krafft V. Crailsheim, ultimo dissendente, in linia feminil, de la dinastia Scaligera. L’é de casa in Baviera nel castel de Amerang che dal 1072 l’è sta dimora dei conti Burghausen-Shalla, i quai, vegnù in Italia al sèguito de l’imperador Enrico VI nel XII sec., i à cambià el nome in Della Scala, deventando nel 1262 Signori de Verona. EI baron Von Crailsheim l’è laureado in agronomia e l’à vissù anca in Florida, Australia, Nova Zelanda, ecc…
Quantomai democratico e simpaticissimo, ciauscando in tedesco, l’à çercà de far conversassion con tuti quei che ghe ‘ndava ‘rente; pecà che, almanco mi, no’ ò capì un’òstrega… anca se me nona l’èra kruca. Par ‘sto ospide d’onor, Angelo Antoniazzi l’à studià e realisà ‘na spila che rapresenta el motivo de le arche scaligere: Durante el cerimonial de l’investidura a “cavalier de l’ordine dei spadarini de la castelania”, gh’è stà messo indosso la tracola damascada co’ la “spadina” de pramatica e l’à dovù “trincar” anca lu un goto de bianco, al sóno de le trombe e al rular dei tamburi. Un particolar elogio ai sbandieradori e a le balarine; tuti in costume de l’epoca, istruì dal coreografo, sign. Adriano Bertoldi che ogni ano l’è sempre più bravo! Brava anca la nostra “Madona Verona” (al secolo, Luisa Vassanelli) co’ i so cavalerissi.
Un elogio, in finis, a la solerte segretaria de la Castelania; signora Teresa Benetton che da qualche ano in qua la çerca de darghe a sta bela tradission tuto el so lustro, tirando el careto con ‘na passion granda, al costo de altretanto grandi sacrifici, che i meritava fòrsi ‘na s-ciànta de considerassion in più de quanta (poca), a la fin-fine, la ghe ne cata. Ma, a vardar ben, ‘sto discorso l’andaria fato anca par mi.
Wanda Girardi Castellani
