L’Angolo de la Wanda – Settembre 1991 – “ITALIA CASA MICIOLA”

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“ITALIA CASA MICIOLA”

Prima i séngali, po’ i africani, po’ i albanesi, po’ i slavi; presto saremo noialtri a far samartin.

In un giorno scominçià come tanti altri, i brindisini i s’à visto scaricar su la banchina del porto meiàra de profughi albanesi.
Omeni, done e buteleti, qualchedun evidentemente de bona estrassion sociale, altri inveçe scalcagnàdi e de pèle mora, più simili a i séngali che semo bituadi a incontrar e, amaestrà da l’esempio, a scansar. I motivi de l’esodo i è politici ma, a me parer, miga par tuti. Me sa che tanti i s’à agregà, drio el miragio de sto paese de “bengodi”; come che da ani i mass media, al servissio del consumismo, i fa passar l’ltalia. El stesso miragio che n’à menà, ne sti ultimi ani, l’esercito dei tersomondiali; na marea de gente afamà, descalçinà, sensa documenti, vacinassioni, laoro e posto andove star. La popolassion nostrana, par so natura ospitale, afato rassista, la s’à catà impreparà, sensa àlsari, davanti a sta fiumana e, pur convegnendo che se trata, ne la maggior parte, de pòri cani, tirà qua con false promesse e a presso de tute le so strasse, da farabuti, speculadori, la sta avendoghe reassioni sempre più violente de rigèto… tanto più che la taca a lèsar de drio le righe qualche stramaledeto, par ‘dèsso ‘ncora incompresibile, disegno politico.
De le meiàra e meiàra de profughi albanesi, po’, sistemà a la “bona de Dio” a Brindisi, in scole, asili, magasini e mantegnù con altre palotàde de schei, cavà ànca quele a i lavoradori italiani, za salassadi fin a l’anemia, con nove e sempre più grevi tasse, in 2000 i è stà dirotà al Veneto e de sti qua, circa 350 a Verona.
E fortuna che i sta rimandando ‘ndrìo i ultimi scalioni che çerca de sbarcar! Ma sta gente, che lassando la casa, tute le so arsàre, i amiçi, le abitudini, i vien su le nostre coste, cossa pènseli mai de trovarghe?
Par quel che concerne la çità scaligera, za semo in rivolussion par via de le meiàra dei nostri che da ani, soto la spada de Damocle del sfrato, i spèta na casa a “equo canone”.
I apartamenti in afito i è tuti amobilià, quindi a pressi proibitivi e con la minacia continua del Veneto “piè nel cuI”, dato che i contrati i è a curto termine. Quanto ai schei, grassie ai laori imbeçili (e mai fini) fati par i “mondiali”, el bilancio comunale l’è anca pèso de quel nassionale, un chilometro più in basso de la fossa de le Mariane! Onde…  par cui, negà in problemi quasi desperà dovendo sistemar i “extra” che gh’emo; tirà de qua e de là come tante bàIe da ping-pong, da castel s. Piero ai magasini generali grassie a l’assessor Pizzoli che, par questo, l’à finì col deventarghe antipatico a mèsa çità (e quel’altra mèsa la sta andàndoghe drio) me dimando come che Verona la taconarà st’altra fàla! ‘Dèsso… òcio, che sta rivando ànca i slavi, e quei gh’i emo qua, a un tiro de sciòpo!
Penso che se la lege Martelli la fusse aplicà coretamente, forsi se risolvarìa qualcosa; inveçe i “clandestini” i sèita a rivar e nissuni li ferma. Sbandà, sensa un lògo ‘ndo dormir, i se còmoda su le banchete e, come l’è imaginabile, a la matina i se cucia ‘ndo ch’i pòl (i albari ch’i g’à sòra i ghe fornisse ànca el surogato de la carta igienica).
Andar a far spese po’, voI dir èssar costreti, par amor de chieto vivar, a somenar almanco 3-4 carte da mile in più par cavàrse da tòrno i maghelisti “estracomunitari” più pegolòsi.
Al bar sucede spesso de no poderse béar in paçe un cafè; tra marochini, mòri o senegalesi che çerca de rifilarte strafàntole e séngali che te se strussia ‘dòsso, col ris-cio che te ghe rimeti ànca ‘l tacuin. Gh’è ci, ne l’intento de smóar la pietà pubblica, l’insiste nel paragonar sta gente ai nostri emigrati in ‘Merica, in Germania, in Svissera ecc… , ma i se desmentega che i nostri i andava a l’estero, el più de le òlte, con in scarsèla za el contrato de lavoro, le vacinassioni fate, i documenti a posto e, de solito, anca un lògo dove star, magari da parenti o coregionali.
In sostansa; che resta pura tra noialtri, bianco, moro o gialo che’l sia, ci g’à da laorar e se sa combinar, con bona volontà, ale legi e le usanse de la nassion ospitante, ma rimandemo in pressia a casa sua tuti quei che, volenti o nolenti, i canpa solo de espedienti, droga e prostitussion conprese. L’Italia no l’è miga un stival de goma, estensìbile a l’infinido!
Che la veda de ricordarse, òstrega, che un stival l’è fato par contègnar un piè… e un piè, in çèrti casi…!
Fortuna che, dai e dai, par la stesse fiorendo la pianta del bonsenso. Naturalmente, ci çerca de catar na solussion, se cuca del “rassista”, un titolo che spesso i cùbia a quel de “fassista”, ci sa parché. Ho sentì, a sto proposito, l’ataco del sindaco de Milan ai filovieri ch’i avea sioperà contro na bidonville de “extra” nata tacà al so deposito, con tuti i anessi e conessi. Ci, come mi, à podù scoltar e vedar a la TV sto “baluba” sbraiar ofese e parolasse fasendo gesti inconsulti, el se sarà, come mi dimandà in che mane semo mai capitadi e dove mai andaremo a infognarse.
Semo tuti fradèi, l’è vera, e par questo, semo disposti tuti a vèrsarghe i brassi a ci, con bona volontà e çiviltà, vien a ofrirne i soi… naturalmente, se gh’è da darghe laòro e bona ospitalità. L’deale però el sarìa che ognuno podesse laorar e vìvar a casa sua, tra la so gente e le so usanse. A sto scopo dovarìa operar tute le nassioni più siore de la tera.
Gh’è, paraltro, da dir che, mentre da noialtri la natalità l’è controlada (come la salute publica), nel terso mondo, dal 1960 ai nostri giorni, l’è triplicada, con le conseguenze che tuti podemo vedar. Far la carità l’è cristian e, pura cristian l’è incitar a l’incremento demografico ma tuto questo no risolve çerto i macroscopici problemi del mondo. Bisognarà, ripeto, metar chiunque sia in grado de poderlo far, ne le condission de guadagnarse el so pan co”l laoro e, possibilmente, a casa sua.

Wanda Girardi Castellani