L’Angolo de la Wanda – Ottobre ter 1994 – “PUNTI DE VISTA – Massèi, disastri, catastrofi, guere e… La speransa a l’obitorio”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“PUNTI DE VISTA – Massèi, disastri, catastrofi, guere e… La speransa a l’obitorio”

AIarmi! Le nàssite i è quasi a zero. Le copie le camina a pìrole, goldoni e retromarcia. A sposarse i è in pochi e i “single” i è in vertiginosa cressita. Sì, la situassion I’è in efeti alarmante. EI Papa e i preti i continua a bàtar el ciodo ma i lo bate, ahimé, su la piera. EI guaio I’è che i popoli che vive ne la miseria, de fioi, invesse, i ghe ne fa un desìo; fioi che, ‘na òlta vegnù grandi i piomba qua in massa a stupar i busi.
Ma parcossa èlo che le nostre copie no’ le vol far buteleti?
1°, parché da ani e anori, giornài, radio e TV no’ i fa altro che contarne rogne e pronosticar disastri: el buso ne I’osòno con la conseguente distrussion de tuto. I giassi che se desfarà, el mar che se alsarà e le coste che le andarà soto aqua. Efeto “serra”; entro el 2000 (e ghe manca 6 ani) no’ nevegarà più e la piova la sarà senpre manco. Entro 200 ani, alegria la tera la se ‘rostirà. E intanto gh’è l’AIDS, gh’è tangentopoli e gh’è la mafia co’ le so parentele. Gh’è guera dapartuto, disocupassion, malatie de tute le rasse. Dopo Cernobil; tumori a man salva. Te vèrsi la TV e te te godi el spetacolo vergognoso del nostro Parlamento che’l par fato de buteleti da asilo, boni solo de farse i dispeti, desfando uno quel che fa quel’altro. Guai vardar un telegiomal fin che te stè magnando; te vedi morti sventrà a tòchi; sangue che core e via discorendo.
Ma me volìo dir come che fa ‘na copia a farse vègnar la vòia de metar al mondo un fiol co’ ‘la situassion e le prospetive che g’avemo? Mi digo che bisognaria semenar, oltre che sisània e velen, anca qualche granin de speransa. Tanto par scominçiar, i dise che el caldo de ‘st’ano l’è dovù al buso ne l’osòno e che ogni ano la andarà pèso. Mi me ricordo ben, inveçe, che nel  ‘51 gh’è stà anca alora un caldo da s-ciopar. Gh’è stà inverni fredi e manco fredi cusì come istà calde e manco calde.
Guere ghe n’è senpre stà e magagne, anca; tanto par dir, nel ‘600 la peste l’à destrigà un bàito de gente! La disocupassion la gh’è stà, ecome, anca nei secoli ‘ndrio e con tuto la gente l’à seità a far fioi parché no’ gh’èra i giornalisti in çerca de “scoop”, boni solo de farghe un òbito (funeral) a la speransa.
Anca el Governo bisognaria lassarlo laorar inveçe che metarghe i bastoni fra le rude a ogni passo. Le rude, par farle girar, specie quando, come ‘desso, i è su un teren acidentado, se ga da darghe el giro co’ la man e tuti insieme.
Ma, tornando a le copie, bison dir che finora no’ gh’è stà legi a favor de la fameia. Manca le case e quele poche che gh’è le ga afiti astronomici. Çerti paroni, po’, i preferisse dàrghele ai “marochini” che, metendose in grupo, i poI pagar afiti più alti. Volemo che se torna a far butini? Jutemo le nostre copiete, dàndoghe casa e laoro e, quando nasse un tato, jutemo la mama a tiràrselo su! Soratuto, finìmola de parlar solo de disgrassie, o almanco, oltre a contar la rogna, vedemo de prospetar anca un qualche scànpolo de rimedio spiansà de speransa.
El mondo l’è senpre ‘ndà avanti e ben o mal l’andarà avanti ancora, almanco fin che’l Paron grosso no’l molarà-zo el coèrciolo.

Wanda Girardi Castellani