L’Angolo de la Wanda – Ottobre bis 1998 – “UN MONDO tuto de PLASTICA”

…a cura di Graziano M. Cobelli

gcobelli05@gmail.com

Quatro Ciàcoe: da Verona

UN MONDO tuto de PLASTICA

“Un tenpo se usava la celulosa del legno, le caseine del late e le gome. Ancò tuto ne vién dal petrolio; spòtico Dio del XX secolo e, quasi çerto, anca de quel che vegnarà!”

Nel 1961, in ocasion del centenario de l’unità d’Italia, son andà co’ la faméia a la grande esposission de Torìn. Lì, tra le tante maravèie ò visto par la prima òlta la lavorassion de la plastica; davanti ai me oci i à udà in te ‘na specie de pressa vertical un cuciarìn de pólvar e, in quatro e quatr’oto, è vegnù fora ‘na musina fata a porseleto. Me ricordo che propio in quei ani scominçiava a spuntar ne le boteghe: cadini, seci, piati, biceri e n’altra infinità de robe fate de ‘stó novo material e la radio la recitava: “Ma signora, guardi ben che sia fatto de MOPLEN!”
Ancó, co’ la plastica, i fa praticamente tuto e i è passadi, sensa possibilità de ritorno, i tenpi de le mastele de legno, dei cadini de fero smaltà e zingo e de quando noialtre done se andava a far la spesa co’ la nostra brava sporta de paia, sostituida dai sacheti che, con 100/150 franchi, qualsiasi cassiera de supermarcà te sbate sul bancon a drio a la roba.
Le materie plastiche,overo: resine sintetiche, de origine chimica, derivà dal petrolio, i è dete apunto “plastiche” in quanto se pol plasmarle facilmente in n’infinità de maniere. Oltre a sacheti e contenidori de tute le misure e spessori, i fa zugàtoli, seci, cadini, scafi de barche, mobili, tubi, tendoni e parfin tochi de automobili.
Prima, a darghe ‘na man al progresso, gh’èra stà, ma in sordina, la BACHELITE, scoperta nel 1909 ma solo da ‘na çinquantina de ani ‘sta quà l’è stà perfessionada a forsa de processi industriài fin a otègnar tante altre materie plastiche adate ai vari usi.
La fabricassion, nela stragran magioransa dei casi, la parte donca dal petrolio che, naturalmente, el g’à ‘vú, cusì, senpre de più inportansa portando definitivamente sui più alti altari le industrie petrolifere con tute le conseguense, politiche, comerciali e de guere, che savemo.
Le resine le se divide in: termoplastiche (che se deforma a caldo e se indurisse a fredo) e termoindurenti (che se lavora a caldo e se indurisse con un ancor piassè rialso de la tenperadura).
Che la plastica l’abia senplificà la vita, semo dacordo. A parte le altre meiara de aplicassioni (nel “72” adiritura gh’è stà’ realisà el tendon soto al qual, a Monaco de Baviera, s’à svolto al coèrto i zughi olimpici), col TEFLON, par esenpio, dato l’alto poder isolante, se pol far i isoladori dei rivestimenti de aparechi eletrici. Pecà solo che le materie plastiche le g’àbia anca la teribile particolarità de ciapar fógo a tenperadure basse cusìta i è pericolosissime. I è anca assè tossiche e quando che se tenta de brusarle le manda fora fumi altamente cancerogeni. L’è facile, paraltro, quando che se va in canpagna, védar falò de sti materiài scadenà da gente incossiente, criminal o ignorante, che se ne bùsara, oltre che dela salute publica (conpreso la sua) parfin dele multe salade che la ris-cia. Daltronde, ‘sto material l’è praticamente indistrutibile in altra maniera e sicome gnanca el se smarsisse, l’è sperabile, almanco, che no’ i ghe fabrica mai le casse da morto! L’unica roba che se pol far l’è sepelirlo fondo, senonché, data la oceanica produssion za no se sa più andó mètarlo e el problema l’è serio assè.
Ultimamente i à tentà co’ la racolta diferensiada e i citadini civili, quei che se preocupa anca dele generassioni che vien dopo de la sua, i l’à tolta con serietà anca se se dimanda cosa po’ i ghe ne fassa de tute quele bosse e el resto.
Prima de le plastiche derivà dal petrolio, se usava la CELULOSA del legno, che tratà con acido cetico o nitrico, la servìa a la fabricassion de sede artificiài e vernise. Senpre co’ la celulosa e coi cascami del coton, co’ un particolar tratamento che prevedèa anca la zónta de canfora, se otegneva la CELULOIDE co’ la qual, par esenpio, se fabricava i puoti (banboloti), facili da riparar, po’, ‘na olta róti, co’ l’acetone. La caseina del late, tratà col formolo, la forniva la GALALITE; ‘na materia termoindurente, dura e isolante. Se tratada inveçe co’ la soda, la dava fibre curte che vegnèa missià col feltro.
Emo dito : “PLASTICA… Dio del XX secolo!” Un Dio che, come tuti, el juta, el premia ma anca el castiga. Daltronde, no’ l’è più possibile tornar indrio, gnanca fasendo come mi che, tegnissa come la pégola, sèito a andar a far la spesa co’ la sporta de paja, cronpo el vin, el late e l’aqua mineral in cartoni o botilie de vero e tuto quel che l’è possibile in sachéti de carta;
SIGNOR… ma l’è pur senpre ‘na góssa nel mar!

Wanda Girardi Castellani