L’Angolo de la Wanda – Ottobre bis 1997 – “El Papa de la solitudine”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“El Papa de la solitudine”

In 33 giorni de papato, Albino Luciani l’à inciso un solco fondo ne la Cesa romana.

Da la so càmara in Vaticano, Papa Luciani, de note, el telefonava in òlta par sentir ‘na voce amiga. ‘Na sera un prete venessian el s’à sentì ciamar. “Santità, ma èlo propio lù ? Cossa vòrlo?”.
“Sì… son mi. Se te savessi quanto son solo e come ‘desso capisso tante robe! Te prego, ciapa el primo treno e vien a Roma!”.
ALBINO LUCIANI, Patriarca de Venessia, quando l’à parlà in publico, da Papa, ‘pena eleto in conclave, lassando da banda el consueto cerimonial I’à scominçià de boto: “ieri matina son andà a la Sistina par votar e mai-più me sarìa spetà quel che m’è capità!”.
Ghe volèa proprio un prete veneto, vegnù-zo da i monti cadorini par farghe far un bel rebalton a la rusenìa ponpa vaticana!
Ma Papa Giovanni Paolo I° l’à po’ seità par 33 giorni a stupir tanti e a costernar (e magari a spaentar) altri, co’ la forsa de la so autonomia e de la so deterrninassion pastoral, traverso decisioni adotade con forsa, pur mantegnendo el so solito stile dimesso.
El s’èra rifiutà de sotoscrivar diverse proposte avansà da i dirigenti de la Curia e el 24 setenbre 1978, 4 giorni prima de morir, l’avea de’n bel tòco superà i livèi parochialistici che i g’avea atribuì. Co’ ‘na decisa tolta de posission teologica su le funsioni del vescovo de Roma, riciamandosse ai testi de Gregorio Magno, in san Giovanni in Laterano l’avea sotolinià che come vescovo el s’avarìa desmentegà el so grado considerandose a livel di suditi più boni.
In un’altra celebre omelia, quela del 10 setenbre, Papa Luciani l’avea inpressionà tuti rapresentando par la prima òlta in quasi 2000 ani, la Divinità, non più in vesta maschil ma in termini de maternità (roba che se cata solo tra i gnòstici): “Dio el g’à senpre i oci vèrti su noialtri; più che un pare l’è ‘na mama!”.
A la tiara, sinbolo de poter, l’avea preferì el Palio, sìnbolo del servissio… e qua gh’èra tuto el so programa apostolico.
Se ‘l fusse scanpà un pochi de ani ancora ci-sà mai che canbiamenti avaressimo visto. Nato a Forno de Casale (Belun) el 17 otobre 1912, l’èra stà ordinà prete nel 1935 e el s’avea perfessionà nei studi a l’Università Gregoriana de Roma. Nel 1948; ècolo de ritorno a casa, Provicario General de la diocesi de Belun e nel 1958 consacrà Vescovo de Vitorio Veneto. A Venessia l’avea “aprodà” co’ la carica de Patriarca nel 1969, restandoghe par 9 ani.
Nel 1973 l’èra stà elevà a la porpora cardinalissia e, dopo la morte de Papa Montini (Paolo VI) l’èra stà eleto Papa, el 26 agosto 1978.
33 giorni dopo, el 28 setenbre, inprovisamente, e par tanti misteriosamente, l’è morto. 33 giorni; un fileto ne la tela fissa, za quasi bimilenaria del cristianesimo catolico, epur Papa Luciani, in cusì poco tenpo, l’à lassà ‘na pesta fonda.
El savea catar le parole giuste par rivar a l’ànima de la gente de tuti i ceti sociài e l’èra de ‘na sinpatia unica.
‘Dèsso, però, a vardar ben i so ritrati, se ghe cata nei oci ‘na malinconia… un dolor che sbrega.
Dopo la so morte tute le omelie funebri no le à fato altro che esaltarghene el soriso e la bontà.
‘Na roba sola l’è sicura: Papa Luciani el s’è catado solo ne l’imensità de le sale e de i problemi del Vaticano, inpaltanà in ‘na politica che mai l’avaria sospetà d’esistar. Solo e, par le so idee, magari anca malvisto. La solitudine l’è stà la so malatia… l’inconprension e la fredessa ‘torno a lu, forsi, la so morte.
In quel’udo tremendo l’avarà çercà co’ ioci del ricordo i rii, le barche de la so Venessia, el riflesso de le trine dei palassi ne la laguna, l’aqua chieta de i canài smossa dal remo de i gondolieri, l’onbra del canpanil de san Marco, el volo libaro, invidià, de i colonbi.
Sì, mi penso che’l sia morto cusì; copà, non da un fantomatico conploto ma da la solitudine, el sconforto, la nostalgia.

Wanda Girardi Castellani