L’Angolo de la Wanda – Ottobre bis 1994 – “Gianfranco Marcon – “El ferar de le stele”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Gianfranco Marcon – “El ferar de le stele”

 

EI termine “ferar” el riciama a la mente çerte boteghe, nere, piene de fumo, iluminà solo de l’ocio sbacià de la porta e da i carboni roènti su la forgia. De solito gh’èra a tirar el màntese un qualche “picolo”, tacà a la soga de la carùcola come un ratin a ‘na meséna. Tuto ‘ntorno, tenàie, ancùseni, martèi, cùgni, sbare de fero e ‘na mastèla de zingo ‘ndò pociar el fero sfrigolante, ‘pena cavà dal fogo, tra ‘l rebòiar de l’aqua, e ‘l vapor che’l se dissolvea in meiara de nuvolete, su-su, verso el sofito de trave, infrusenà. EI ferar, nero anca lu come ‘na tàcola al reparo de ‘n grembial de corame, el paréa ‘n orco ne la so tana o el Dio Vulcano intento a laorar i fulmini par so pare Giove.
Beh, con ‘sto personagio dirla però che ‘l “profe” Gianfranco Marcon, “ferar de le stele”, overossìa, costrutor de telescopi; el più brao, el più conossù in Italia, el g’à poco da spartir! La so “oficina”, po’, l’è quanto de più grande, moderno e funsional se possa imaginar e lu, de l’orco no’ ‘l gà propio gnente, ansi, l’è uno tra i omeni più piasòsi che ò conossù in vita mia. A far la so conossensa, mi e me fiol, astrofilo alora in erba, semo ‘n dà nel 1981 a San Donà de Piave, dove tutora el vive e ‘l laora, ben intensionadi a crompar un “picolo” e, soratuto, “economico” telescopio. ‘Na òlta là, prima de tuto Gianfranco el n’à invità a tastar ‘na sgnapeta, fata da lu e conservà in ‘na botesela de roaro con legno de rosa, dopodeché mi, tra ‘n bicerin e l’altro, ò combinà, sensa tanti preamboli, la spesa de’n aparechio dotà de òtiche Zen, (anca lu veneto, de Venessia). Me ricordo che dopodisnà, prima che partissimo, Gianfranco el m’à proposto de proar la so motocicleta (un bestion) e mi, mèsa ciuca, g’ò dito de sì. Beh, dopo la “passegiada” no’ go più ‘vudo bisogno de erbassèna, in vita! Se no’ ‘l m’à semenà par strada, ne scudelà in ‘na qualche sesa o in qualche fosso, l’è, me digo, par via de le orassione che ò seità a sbrodolar fin che no’ son desmontà.
Come dolçe, ve zontarò che quando, mesi dopo, me son vista rivar a Verona l’acquisto ò ciapà un sorbolòto da ‘n quintal! “Mi, ò crompà quel monumento lì! Ma se ‘l me parèa picolo”. Picolo, evidentemente, soto l’efeto de le sgnapete! Morale, Marcon el fa telescopi superlativi, ma prima de crompàrghene uno, ve racomando… gnente sgnapete!
Schersi a parte, l’è el costrutor de ‘n bàito de telescopi sofisticatissimi, semenà in tuto el mondo, in spècole private, universitarie (vedi quela de la Sapiensa de Roma) e comunali.
Atualmente, par la magior parte el laòra per el C.N.R.-E.N.E.A. (Centro Nassional Ricerche, Ente Nassional Energie Alternative) e çerti so strumenti in lega legerissima, mandadi ne l’alta atmosfera tramite de i grandi baloni aerostatici, i è servidi par de i importanti esperimenti. Ànca tuti i telescopi instaladi ne l’ Antartide i è opera sua. Ultimamente, su Rai 3, in ‘na trasmission dedicà a uno tra i so tanti celebri clienti, el basso Alfredo Zanazzo, i à parlà pura de lu, fasendo vedar el telescopio che ‘l g’àmontà da le parte de Imperia.
‘Sto ilustre nostro coregional, dotà, tra l’altro, de ‘na vitalità più unica che rara, I’à scominçià I’atività, subentrando a so pare, verso la fine de i ani sessanta, deventando ben presto el nùmaro uno, nel so campo. Naturalmente, el g’à anca lu un aparechio “Marcon” sul terasso de casa, parché, par farli ben, i telescopi, bisogna amarli e se s’i ama l’è parché se ama soratuto l’universo che ne stà intorno, co’ in più la curiosità, mai apagada, de metarghe el naso, el più a fondo, el più in largo, possibile. (Par chi gavesse sta sana curiosità, el poI contatarlo, ciamàndolo a San Donà de Piave. tel. 0421/55170 (ndr).)

Wanda Girardi Castellani