L’Angolo de la Wanda – Ottobre bis 1993 – “Un museo in fondo al lago”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

“Un museo in fondo al lago”.

Dopo quasi çinqueçento ani… e a trent’ani dal ritrovamento, tornarà a la luce ‘na galèa venessiana, al largo de Lazise.

EI 24 giugno 1405 Verona la ga giurà fedeltà a la Republica venessiana, mandàndoghe al Doge le insegne de la çità par mèso de quaranta so citadini vestì de bianco; ‘na fedeltà che l’è durada quasi un secolo.
Durante ‘sto periodo anca noaltri semo stà coinvolti ne la guera fra Venessia e Milan e l’è stà apunto alora che s’è visto ‘na flota tirada da 2000 bo viajar sul monte Baldo, da l’Adese al Garda, traverso la sèla fra Loppio e Nago (Vedi Q.C. n. 10 otobre 1988).
Go dito più sora che la fedeltà de Verona al leon de San Marco l’è durà manco de ‘n secolo, infati, za al prinçipio del 1500 sul cel de la laguna s’era , densà nuvoloni de tonpesta e i prudenti scaligeri i avea pensà ben de pareciarse de drio la porta ‘na bona ombrela. Venessia la stava caressando el progeto de la monarchia sora tuto el teritorio italian e davanti a ‘sta minacia el Papa e i sovrani de l’ltalia e del resto de l’Europa i à pensà ben de riunirse ne la famosa lega de Cambray; un scudo drio al qual gussar ‘na spada bolla de tajarghe via al leon alado el dominio in teraferma e magari anca qualcos’altro!
La nova guera l’è scominçia cussì nel 1508. I venessiani i à fortificà Verona serando anca fra i so muri tuti i frati e le mòneghe de i conventi distruti al de là de le porte, ma, dopo aver ciapà la supa a Ghiara D’Adda, quando che i s’à ritirà verso la me çità con ai calcagni i nemissi, i me concitadini par no’ dover subir un assedio i s’à sprangà drento, costringendo cussì i veci paroni a passar l’Adese sul ponte de barche al Basso Aquar par po’ atendarse a l’esterno, in Campomarso. Libarà, el 31 magio 1509, dal giuramento de fedeltà firmado 104 ani prima, i veronesi i s’à riunì in consilio a Sant’Anastasia, decidendo de vèrsarghe i brassi al re de Francia. (Ga vossù po’ altri tresento ani e passa parché i se ricordasse, fasendo i debiti paragoni che: «quan’ San Marco dominava… se disnava e se çenava… !»).
Beh… «In el predicto tempo la signoria fece armar due galee su el lago e le gazere e altre barche per guardia… (Zagata)» ma anca i rivieraschi del Garda, drio ai veronesi, al momento bon i gavea voltà la schena a Venessia, tanto che el Provedidor del Governo Veneto, Zaccaria Loredan, dopo aver deciso de abandonar la region, l’à brusà nel porto de Lazise la galèa e le do fuste al so comando, parché no’ le cascasse in man nemighe.
Sui resti de ‘sta pìcola flota s’à contà storie par quatro secoli e mèso; storie che à fato sognar generassioni de mostri (bambini) veronesi e non. Qualche pescador l’avea giurà che i so “reoni da fondo” i se gavea imbroià drento… là, al largo del paese, ma sensa massa insistar parché, de ‘ste “fantasie” no’ i ghe desse la colpa al goto. S’è dovù rivar al 1962 par ‘verghe conferma de l’esistensa de ‘sta famosa galèa, quando el prof. Francesco Zorzi co’ i so subaquei l’è riussì a localisarla al largo de Lazise, propio ‘ndove che se pensava la dovesse èssar. Le do fuste oramai i era andade in papa ma “l’amiralia” l’era là… 30 metri par sie… quasi intiera, co’ le so do ancore e l’àlbaro a vela.
Par libararla dal fango i ga messo çinque ani ma i è riussidi po’ parfin a disegnarla.
‘Dèsso, dopo trent’ani, par che ‘sta galèa venessiana la sia a ‘n pel dal revedar la luce del sol. Sponsor del dificile e costosìssimo recùpero (7/800.000 milioni) sarà Gardaland, el bel parco de divertimenti che zà l’à ospitado ani fa la redassion de “Q.C.”. ‘Na olta tornà a gala, la galèa… rimessa in sèsto, la sarà probabilmente esposta al publico drento a ‘na tèca de vero e mi… che pa’ ‘ste robe ghe vago de vita… no’ vedo l’ora de vedarla (ma fasì in pressia che no’ go più vint’ani!).

Wanda Girardi Castellani