L’Angolo de la Wanda – Ottobre 1995 – “Josè Carreras in ‘Rena – Consegna del premio “Giuseppe Lugo – 1995” al tenore spagnolo”.

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Josè Carreras in ‘Rena – Consegna del premio “Giuseppe Lugo – 1995” al tenore spagnolo”.

La sera del 28 agosto u.s., prima del 2° ato del concerto de musiche spagnole, sul palco de l’Arena de Verona, davanti a circa 15.000 spetatori, s’à svolto la cerimonia de la 2^ edission del premio “Giuseppe Lugo”; premio che l’ano passado l’èra stà assegnà a Placido Domingo.

Par el 1995, el Comitato composto da:

Presidente, soprano Magda Olivero, Pres. onorario, dr. Oianfranco De Bosio (Sovrint. de l’Ente Lirico)
el musicologo dr. Carlo Bologna,
el com. Giuseppe Pezzini, erede spiritual de O. Lugo,
el sign. Nando Tavoso Spezie, Pres. del circolo “O. Zenatello”,
el dr. Eduardo Fronda,
el sign. Oianni Zatachetto,
el pitor Luciano Pollini (organizador e ideator del Premio),
e mi,

l’à deciso de assegnarghe, el riconossimento destinà ai tenori che magiormente i à onorà la lìrica, specialmente quela, italiana, nel mondo, al Maestro JOSE CARRERAS.
EI grande tenor catalan che quela sera l’à tegnù el so concerto de gala, spicando el volo da la natìa Barcellona, l’à inissià giovanissimo la cariera vinçendo a Parma el concorso “G. Verdi”; ‘na vitoria che g’à verto, dopo quele del “Regio”, le porte de tuti i altri più inportanti teatri del mondo.
EI debuto in canpo internassional el ghe l’à ‘vudo nel 1971 a Londra e dopo i trionfi europei l’è ndà a ‘binàrghene altri nei Stati Uniti. Nel 1975 l’à infine conquistà anca la Scala.
L’è stà el grande predileto del maestro Von Karaian che’l l’à vossù arènte par 12 stajoni, in Austria, in Germania, in Svissera. Memorabili i du concerti, arente a Pavarotti e a Domingo, nel 1990 a Roma e a Los Angeles ne11994. Inumerevoli e prestigiosi i riconossimenti a la so arte; uno par tuti el “Laurence Oliver” nel 1993, a Londra, par l’intepretassion nel Stiffelio de Verdi.
Nel 1988 a Barcellona el Maestro Carreras l’à istituì la “Fondassion Internassional par la lota a la leucemia” con la colaborassion de un “team” mondiale che includeva el prof. Thomas, premio Nobel 1990. De ‘sta importantissima fondassion Josè Carreras l’è anca l’instancabile Presidente. E a ‘sto punto me par giusto zontarghe che ‘pena rivà a Verona l’à fato el giro de i ospedai, portàndoghe ‘na parola de conforto ai maladi de leucemia. Ma par tornar a la cerimonia in Arena; a lesar la motivassion son stada mi… sola, in mèso al grande palco, davanti a quela marèa de publico fodrà, tra l’altro, de grossi nomi internassionai. Come no’ sia croà-zo come ‘na bandiera quan che casca el vento, no’ ve lo sò miga spiegar. Ò parlà par quasi 5 minuti co’ la forsa de la desperassion e i m’à dito ch’è ndà tuto OK! Çerto che n’aplauso cusì, da 15.000 pari de mane no’ ghe l’avea avudo mai e mai me lo podarò desmentegar!
La targa d’argento, incisa dal nostro Maestro orafo Angelo Antoniazzi, su disegno de Luciano Pollini, l’è stà consegnà dal dr. De Bosio atornià dal com. Pezzini, la so bela fiola e Pollini. In finis, el Maestro Carreras, oltre che belo come el sol (ve lo garantisso… done) l’è anca de ‘na gentilessa squisita e po’ el g’à ‘na gran voçe arichida a ‘n’interpretassion apassionada, piena de sfumadure e de sentimento.

Wanda Girardi Castellani