L’Angolo de la Wanda – Ottobre 1994 – “PUNTI DE VISTA – Calcio e calceti”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“PUNTI DE VISTA – Calcio e calceti”

Ogni ano, ‘pena che l’istà co’ le man de fogo la vien bàtar a la porta, eco che ne la me parochia, come in çentenara, meiara de altre, se taca a picar via bandierine colorade e cartèi co’ la scrita “GREST” (e che me vegna un temo sèco se so che òstrega voI dir). I mete in t’un canton de ‘la corte ‘na fila de “calceti”, i piassa quatro paleti con do strìcole de redi e subito scominçia el tananài che par mesi el va da le 9 de matina infin a mesanote, quando, serà i cancei, quei più grandi i stassiona fin al boto e passa su la mureta de fora, semenando in tera latine de coca cola e sacheti da patatine e rompendo timpani e àmoli, tra scapamenti verti de moto e motorini e sighi da anguane.
Ma za de prima matina, davanti ai calceti se ghe inmucia diesine de fioi che a turno i manegia con selvagia frenesia i pòmoli come se i fusse siàbole, sigureti, rengàie e consimili; ‘na guera de ‘na tal violensa che anca stando a casa mia, do strade più in su, la te frastrona le rece come ‘n esercito de sgnàcare.
Intanto nel spassio dedicado al “calcio” ‘n’altra trupa d’assalto la pessata un pòro balon co’ ‘na cativeria come se se tratasse del c… de qualchedun che ghe va streto; magari so pàre, so mare o so noni, visto che se trata de la generassion dei “Maso” e de i “dopo Maso”. Possibile che no ghe sia altro da farghe far a sti buteleti ? (mas-ci, parché de le femene nissun se ne interessa). Mi sarò anca ‘na maniaca de la cultura ma penso che i farìa ben a indirissarli a qualcosa che meta in funsion anca el sarvel, oltre che i muscoli de i brassi e de le ganbe; va ben che in Italia se vive oramai solo pa’ ‘l balon. Mi digo che se volemo che i giovani i vegna su ben, bisogna prima de tuto coltivarghe de i interessi spirituài e culturài; ‘na richessa che ‘na òlta mucià i se portarà a drio fin a la fine de i so giorni. L’è el sarvel che tien svèi; se se inebetisse quel, va a farse c….r anca el resto!
In quanto a “calcio e calceti”… bon ànca quei… ma la Cesa, in particolar, la dovaria saver che gh’è più Dio in un spartito de Mozart, in ‘na bela poesia o in ‘na tela de Michelangelo che non in tuti i campi de balon de sta nostra tera senpre più bròcola, oltre che ignorante, materialista e orfana de ideài.
In finis, ‘na considerassion un fià bastarda, par via del balon: Le sere del 23 giugno e del 5 lujo, quando l’Italia l’à segnà i gol de le vitorie contro la Norvegia e la Nigeria, mi che (poco sportivamente) stavo dormendo, me son sveià de sorassalto convinta che fusse scopià la guera o che stesse par croar la casa, tanto grando l’è stà el bordel dei tifosi veronesi smissià a quei de la TV. (In ‘Rena i stava fasendo, la sera del 5, la prova general de la Norma; completamente sassinà e ‘ndà sofegà dal bordel scopià par de fora e parfin de drento, tra comparse, coristi ecc…)? Beh… pensève, gente, se tuto ‘sto apassionado orgòlio nassional el podesse èssar incanalà in altre e più giuste diressioni; ospiamenta… che popolo che saressimo, degno dei fasti de la Roma de i antichi Cesari, cussi poco inparentà con quela de ‘ncò che, in poco più de çent’ani, l’è riussì a mandarne tuti a manghel (questua).

Wanda Girardi Castellani