L’Angolo de la Wanda – Novenbre ter 1997 – ARNALDO FUSINATO: “ADIO a VENESSIA”

…a cura di Graziano M. Cobelli

gcobelli05@gmail.com

Quatro Ciàcoe: da Verona

ARNALDO FUSINATO: “ADIO a VENESSIA”

El so ritrato no’ l’ò catà su nissuna dele me enciclopedie salvo un disegneto pitosto sbiavo… cusì gnanca son riussì a saver che facia el g’aveva e me ne despiase tanto.
I ani de nassita e de morte, quei si! El me vecio Melzi el riporta: Nato el 25 novenbre 1817 a Schio (VI). Partanto, ‘sto ano el sarìa el çento-otantesimo aniversario de la nassita. Se lese po’ de seguito: “L’à conbatù eroicamente a Montebello e a Vicenza. Le só poesie patriotiche le à contribuì, nel periodo 1846-1865, a tègnar viva l’idea del nostro riscato. L’à lassà poesie anca gioiose e romantiche”
In prinçipio, l’è stà propio Talia, la Musa che lo ispirava, ma, rivà a ‘na çerta età, gh’è nato ‘na granda amirassion par el Giusti e la voia de andarghe drio, a questo, con poesie satiriche sui costumi del tenpo, e a Berchet, con conponimenti de caratere patriotico che gà fato guadagnar ‘na barca de rogne e persecussioni da parte de l’Austria.
Arnaldo Fusinato, dunque, l’è nato ne la nostra venetissima Schio e l’à studià ne l’altretanto venetissima Padova.
L’à partecipà a la guera de indipendensa come volontario e in quel periodo l’à conposto el “CANTO DEI INSORTI” che l’è deventà l’ino de la so compagnia. L’è stà po’ in Venessia assediada dove l’à conbatù con coraio par la difesa de la çità.
El g’à ‘vù ‘na granda notorietà par le so poesie de tòno spesso popolar, ispirade a avenimenti del giorno; poesie piene de sensibilità e de gusto de l’osservassion; dote, queste, che distingue ‘stó autor, el qual, a la bonomìa, al facile senso del canto e dela comunicativa umana, l’à savù senpre ‘binar l’inpegno moral, civil e patriotico che l’à conpagnà, prima ne la cospirassion, po’ ne la corajosa lota par l’indipendensa ne la qual el g’à ‘vu par conpagno el fradel Clemente.
Ne la leteradura, la so poesia l’è testimoniansa de’n momento minor ma pur degnissimo de èssar ricordà.
Arnaldo Fusinato l’è morto ne la me Verona, el 28 Dicenbre 1889.
Mi, g’ò vossudo senpre ben. El sagio a l’asilo, a 5 ani, l’ò fato recitando con inpeto, e tuta a memoria, la so poesia più celebre: “Adio a Venessia” che m’avéa insegnà me papà, tra un scufioto e l’altro, tra un’òstrega e un sacramento, in diese giorni de fatiga. Me ricordo ancora i aplausi a la fine de la me esibission e i conplimenti, specie da parte de le maestre, restade tute a boca vèrta. Qualcheduna la m’avéa anca pronosticà un gran avenir in teatro (indovina balonara parché inveçe ghe l’ò avù davanti al fornel e al seciar).
Comunque, par comemorrr degnamente el me amigo d’infansia, Arnaldo Fusinato, vorìa che “Q.C.” el riportasse quà de seguito, “Adio a Venessia” che, da quel distante 1936, ancora no’ me son desmentegà.

Wanda Girardi Castellani