L’Angolo de la Wanda – Novembre bis 1994 – “Molina… paradiso de acque”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Molina… paradiso de acque”

In giornade da fogo come quele de fine luio, no’ gh’è lògo più desiderabile al rnondo de le cascade da Molina; un paradiso de acque che te scòre de soto, te piove de sòra e te çirconda tuto in ‘na miriade de lagheti, fiumesèi, cascade e cascadele che te fa fresco anca solo a pensarghe!
Molina, fior a l’ocèl de la Valpolesela, l’è ‘na frassion de Furnane, paese ben conossùo par via del Recioto e del bel Santuario de la Madona de Salette, ‘barbicà a ‘n monte. El se trova a 600 metri, incassà in te ‘na vale de i Lessini, la vaI de i Progni, e ‘l so percorso l’è stà ideà dal naturalista fradel Perin. Lì gh’è ancora ciari i segni de insediarnenti umani ne la preistoria, anca se non inferiori al periodo de Wurrn, (fin a 5000 ani a.C.). El nome el ghe vien da i tanti molini che gh’èra. El parco el ga la superfice de 1 km quadrato circondà in parte da ‘n’alta parete de rocia e in parte da’ na rede metalica. La visita no’ la porta via più de ‘na giornada, ma l’è consiliabile andarghe quando l’è un tocheto che no’ piove senò la visita la deventa pericolosa pa’l ris-cio de i sbrissioni e relative sculatade.
Bisogna cornunque averghe un bon par de scarpe co’ la sola de gorna e magari un baston, oltre al gilè de lana anca de istà.
Armarse de machina fotografica e de ‘na scarica de rulini, parché el spetacolo l’è unico al mondo e a dirghe splendido l’è poco!
L’itinerario l’è segnà con cartèi e mace rosse, quindi no’ se se perde gnanca a volerlo.
Pagà el bilieto d’entrada, se scarpina in dissesa fin a l’ingresso (‘na quindesina de minuti) e, ‘pena dentro; eco, de fassada, grandiosa, la rupe Sengia Da Ponto, mentre, più in basso, ‘na cortina de dirupi i divide l’area del parco da i pendìi sorastanti.
Seguendo la segnaletica, se s’inbate ne la cascada del Pra de la Sacheta (cascada verde); un salto de ‘na vintina de metri con tuto intorno ‘na natura selvàdega e diverse grote.
Avanti se poI amirar du molini e po’ se va a tocar el punto più basso a 395 m. a la Rosta. Se traversa e l ponte e se riva a la cascada de l’Orso, dove la tradission la voI che sia stà copà, du secoli fa, l’ultimo plantigrado, e, risalendo el sentier, se riva al bivio; a destra gh’ è l’òrido de le Scalucce, a sinistra ‘na scala adossà a la rocia (scala de le verùgini) la consente ‘n ociada panoràmica su la zona de soto e n’altra, da l’alto, de la cascada e de l’òrido del Posso de l’Orso. Po’ se risale la “forra” ai margini del Pra del Posso de l’Orso e a la confluensa de la VaI Casara eco la grande cascada del Pra de i Salgari e, poco più in su, la violenta cascada Spolvarona (del Marmiton). Camina, camina, se passa viçin a uno de i covoli, se passa un altro ponte, ‘na fontana de acqua potabile e se riva a ‘l ventàio de la cascada Pra de l’Orto; in alto, quela Quarena (cascada nera) che la vien zo compata da 25 metri. Oltrepassà la piassola de ristoro, se riva al spiasso Quarena. Altri quatro passi e, voilà, n’ attrassion acrobatica; un’altalena che, ne la so ossilassion, la riva quasi a tocar i pie de la cascada nera. Risalendo, a la fine, se torna a la base.
Ponti sospesi, piassole su spetacoli de natura, grandiosi da far fermar el respiro, colone prismatiche de basalto vitreo, alte fin a 4 metri, camini de vulcani, grandiosi covoli, strapionbi de 40/50 metri! A ridosso de ‘ na parete rociosa, ‘na soga e ‘na titanica cadena le pende da l’alto a parmetar, a ci se la sente, ‘na ranpegada fin al Nido de i Falchi. Tra i covoli, interessante, specie par i buteleti, quel che mostra ‘n’oficina lìtica preistorica dove un nostro avo l’è intento a forgiar armi e utènsili de selce. Ghe n’è anca un’altra dove ‘na fameia paleolitica la vien tacà da un orso pleleo. Par tera, tra le sgauie de la cusina, gh’è el fedele can sventrà da la belva ne l’èpica difesa dei paroni. Nel scavo de adatamento de le statue, è vegnù in superfice diversi fossili, denti e teschi de lupi e svariadi manufati; ma tuta la zona, in ‘sto verso, l’è ‘na miniera!
A Molina se ghe riva in auto da via Mameli (ospedal de Borgo Trento) par Parona, ciapando la strada de la Valpolesela. Al bivio par Negrar, se va ‘vanti verso sinistra in diression de Pedemonte e a S. Piero Incarian, po’, se piega a destra par Fumane e su!
Da Fumane se poI ciapar do strade; quela de destra l’è sfaltada ma pitosto streta. Quel’altra l’è più agevole ma più longa e la prosegue, traverso Mazzurega, Cavalo, Breonio.
Rivà a destinassion sarà ben procurarse la guida stampà.
A Molina gh’è un anpio parchegio e anca se poI mètar qualcosa soto ai denti. EI parco l’è verto tuto l’ano e el bilieto el costa ‘na miseria. Par via, po’, de sbafatoria e bevitoria, come più sora ò dito, anca nel parco funsiona i posti de ristoro.

Par informassion: tel. 0457720039 (Trattoria Du Scalini) opur se ga da scrìvar a la Pro-Loco de Molina 37022 Fumane (Verona).

Bon viaio e bon divertimento !

Wanda Girardi Castellani