L’Angolo de la Wanda – Novembre bis 1991 – Lirica: “La ‘Mèrica tra i Lessini”.

…a cura di Graziano M. Cobelli

gcobelli05@gmail.com

Quatro Ciàcoe: da Verona.

Lirica: “La ‘Mèrica tra i Lessini”.

Cerro Veronese l’è un paeseto de la Lessinia centrale, fato de poche case, ma carico de storia in quanto la so fondassion la risaI al 1200/1300, sòto la signoria de i Scaligeri. De inverno el se ‘ntabara fin a le rece e, come el celebre “orso del Baldo” (araba Fenice, ani ’90) el va in letargo. Ma quando vien l’istà el se scurla via la polegana, el ghe vèrse la porta ai turisti e, ben intensionà a no farghe rimpiànsar la çità, el mete a segno na brigola de inissiative, una più bela e interessante de l’altra. Par esenpio, sabo 24 agosto 1991 l’à organisà un concerto lirico. Mi, quando ò leto che a conpagnar i cantanti gh’èra la brava Michela Forgione, pianista fissa al “Zenatello”, me son tirà a màlta fina e son corsa a ciaparme un posto de prima fila. A cantar gh’èra do artisti che no conossevo: el tenor JOSE CURA e la mèso-soprano Claudia Clarich. De questa, al massimo, se poI dir che l’è “dignitosa”… EI tenor, però, l’è stà na sorpresa! Na voçe da lassar tuti ‘ncantà. Notevole, sia par la estension vocale che par la preparassion. In più, teatralità… sentimento e na carga de entusiasmo a dir poco “trassinante!”
Da un “pissi-pissi” del paese ò savù che l’è vegnù da l’Argentina par dedicarse al melodrama e che ‘l vive qua. Parcossa? Come? Stamatina l’ò visto passar soto la me finestra e l’ò ciamà par cavarme sta curiosità fasendome contar la so storia par i amiçi de “Quatro Ciàcoe”, co la speransa che a qualchedun de lori che “pòl”, ghe vègna la voia de darghe na man. Esisteli ancora i mecenati? Caruso l’à catà la so fortuna in ‘Mèrica. Cissà che Josè Cura no’ la càta nel Veneto.
Ècolo qua… in maieta e braghete curte. Un tòco de Marcantonio.
Moro, oci neri, barba e mostaci. Voçe a parte, el g’à tuti i numari par far ciòco su un palco.
– Da dove viento, Josè ? -“Da Rosario Argentina”.
– Solo?
– “Nò… con me moier e me fiol; un tato da tre ani, pitosto vivace”
– Come mai sito vegnù in Italia e, soratuto, parche qua al Çèro?
– “In Argentina no’ gh’è possibilità de cariera! Gh’è un solo teatro de na çerta inportansa, el COLON. Economicamente, po’, la va mal! No gh’è possibilità de andar ‘vanti, quindi bisogna emigrar!”
– Da quanto tenpo càntito?
– “Da senpre, ma professionalmente dal 1983. Avevo scominçià come chitarista. Po’ ò fato el diretor de còri. Ò frequentà el Conservatorio ‘ndove ò fato diression orchestral e conposission. Ò po’ studiado canto co’ ‘l maestro HORACIO AMAURI. Come Diretor de orchestra, ò direto la Carmen de Bizet, la Passion secondo Matteo de J.S. Bach e vari concerti. Come conposidor, ò conposto un “REQUIEM ARGENTINO par la paçe” dedicà a la me generassion (son del 1962), la generassion che à combatù la guera de MALVINAS. Un sentido omagio ai tanti amiçi che con mi i à vissù sta enesima tragedia che à insanguenà la me Patria. Una preghiera in musica per ci no g’à vù la fortuna de tornar a casa. Dopo del REQUIEM ò scrito na VIA CRUCIS, un STABAT MATER, un MAGNIFICAT e parfin un baleto sul Pinochio de Collodi; in omagio, questo, a l’ltalia, a la qual son ligado par via de la nona materna, nativa de San Stefano Belbo (Cuneo).
– Ma quante robe eto fato… in cussì pochi ani?
– “Tante… e tanti mestieri! O parfin studiado tecnica de lota, atletismo e arti marsiali cinesi”.
– Ma a un çerto momento, però, te t’è votà a la lirica!
– “Sì! Nel 1983 son entrà al teatro Colon de Buenos Aires con un contrato e ghe son restà par sète ani arivando a un punto oltre al qual, visto l’ambiente, no l’era possibile andar, tanto più ch’i m’à messo tali e tanti bastoni tra le rude da crearme ‘npedimenti pressoché insormontabili. A sto punto… vendendo tuto par poder pagar el bilieto, ò tolto su la fameia e son partì par l’Italia con la speransa de trovar a S. Stefano Belbo qualche parente sopravissù. Purtropo no gh’èra restà nissuno! Ò quindi pensà ben de acetar l’invito de na copia de veronesi conossù in aereo da l’Argentina. Sti boni arniçi i m’à trovà casa a Cerro; preferibile a la çità, sia par l’aria manco inquinada che par i afiti più abordabili. Beh… ghe son da quatro mesi e me ghe trovo ben. La gente de qua, non solo la m’à vèrto la so casa ma soratuto la m’à vèrto el cor!”
– Gheto prospetive de lavoro?
– “Sì… son stà finalista al concorso de canto a BREGENZ, in Austria e a quel intestà a MARIO DEL MONACO, a Castelfranco Veneto. Go ‘vù varie audission in vari teatri italiani e èstari, quindi penso de poderghela far! Beninteso… preferiria restar in Italia, patria de Caruso, de Gigli, de Del Monaco, cuna de la lirica e del bel canto. Spero propio de no dover andar via!”
– E te lo auguremo, Josè! Ànca qua ghemo bisogno de bravi e giovani tenori che no i ghe parmeta al melodrama, cussì inradisà ne le nostre tradission, de morir! Te volemo nei nostri più bei teatri. Te volemo in Arena e quando te sarè là… sul palco che à conossù la gloria de tanti grandi… tra el slusegar de meiara de candeline somenade su le piere milenarie del nostro anfiteatro; par ti se spelaremo le mane e, rivolti ai altri coi quai, gonbio a gonbio, spartiremo i scalini… gavaremo el gusto de dir: “JOSÈ CURA…l’è nostro amigo!”

I so ruoli:

Pinkerton – Butterfly (Puccini); Don Josè – Carrnen (Bizet); Cavaradossi – Tosca (Puccini);  Manrico -Trovatore (Verdi); Riccardo – Ballo in maschera (Verdi); Pollione – Norma (Bellini); Don Alvaro – Forza del destino (Verdi); Andrea Chenier – Chenier (Giordano); Canio – Pagliacci (Leoncavallo); Radames Aida (Verdi); Calaf Turandot (Puccini); Turiddu – Cavalleria (Mascagni);
Atual abitassion (Ndr) Via Lessini, n. 2 Cerro Veronese.

Wanda Girardi Castellani