L’Angolo de la Wanda – Dicembre 1994 – “MESSA IN LATIN”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“MESSA IN LATIN”

A Verona, da qualche tenpo agisse l’Associassion “Una voce” che se bate par la salvaguardia de la liturgia latin-gregoriana. Par intanto i à otegnù che vegna celebrà ‘na Messa in santa Toscana (Porta Vescovo), à le ondese; ‘na Messa che riciama za diversa gente.
Tenpo fa, na domenica, gh’èra anca mi. No’ me la ricordavo quasi più, stà liturgia de quando era buteleta. No’ me la ricordavo più ma man a man che la funsion la ‘ndava ‘vanti, la me ritornava su… da la càneva fonda de la memoria e, più de tuto, dal cor. L’è stà ‘n’emossion revedar I’oficiante (Mons. Piazzi, Diretor de la biblioteca capitolare) a I’altar, ne la posission che’l g’à da ‘verghe el bon pastor; davanti al so grège e revolto al Padre, miga a noiatri, voltàndoghe a Lu la schena. L’è stà ‘n’emossion andar a tor la Comunion, insenocià a la balaustra, diretamente da le man consacrade del Prete (miga ciapàndola, mi, co’ le mie a scudèla) sentendome dir le antiche, splendide parole, ne la lengua de Dio: «corpus Domini nostrum…». l m’è vegnù sui labri propio tuti, al Confiteor… i nomi dei Santi, anca quei che ò senpre slanbrotà a la valà-che-vegno.
Me son però inacorta che la magior parte dei fedeli I’èra fata de “colti” che’l latin i lo savea dir ben, mentre ai me tenpi gh’èra in genere quei, come me sia, che i cantava a tuto buso «et in terra passa I’onnibus», opura, a le litanie, i castronava de «Regina bona co’ i figli» e altre robe da far rìdar anca i Santi tacà ‘torno i muri, con ‘na facia de solito intavanà.
Quanti ani èrelo che no’ cantavo el «T’adorian, Ostia divina», opura el «Tantum Ergo»? Da quanto le orassion se g’à da dirle in italian a mi me par che le abia perso de forsa, basta pensar a la Messa funebre: cosa Volìo che ve diga, no’ riesso più a torla sul serio. ‘Na òlta la g’avea ‘na maestà che tolèa el respiro: «rex tremendae majestatis. Qui salvandos salvas gratis…». Insoma, se sentiva tuto el mistero de la morte, anca quando gh’èra quela de sufragio con tanto de catafalco coèrto de nero e argento e i candeloti ai quatro lati. Beh, par quel che me riguarda, a la messa de le ondese… specie se se pol ascoltar ‘na prèdica come quela fata da un orador de la forsa e de la cultura de Don Piazzi che’l m’à riportà ai tenpi de don Primo Mazzolari, ghe andarò tute le dominiche, sperando che no’ ì la elimina, parché i soliti straronpi i à za tacà a protestar.

Wanda Girardi Castellani