L’Angolo de la Wanda – Novembre 1994 – “El color dei veci mestieri”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“El color dei veci mestieri”

«Strasse… ossi, fero-vecio da vèndare… ooooooooh…!».
Ci podarìa pensarlo, anco, che ‘na ‘òlta se podesse vèndar i ossi, epura l’èra roba da farghe qualche franco, insieme co’ le strasse, che “strasse”, alora, le d’èra veramente. Me papà, prima de la grande guera, durante i laori ne la rotonda (tornacoro ), ex area cimiterial, de la cesa de Sanasar, l’à binà-su da ‘n canton ‘na scariolà de ossi (da morto) e co’ i schèi ciapà dal strassarol l’è andà a cromprarse i fighi. Naturalmente, quando don Santo (co’ el qual l’avea spartì i fruti) l’à savù el fato, el s’à messo le mane nei cavei e gh’è vegnù anca da regatar. Sparì i strassaroi e sparì i caregari; altro mestier “colorido”!
Me ricordo che i se metea a impaiar le careghe in corte e l’èra un spetacolo vedarli laorar. Ma el mestier più poetico (visto da de fora) l’è stà el spassacamin; argomento de poesie e cansonete sbregalàgrime: «… io la mamma non ho, la mia mamma è soltanto la neve…» i cantava i menestrèi, tipo Franzi, prima de i ani vinti e le done, pensando al pòro buteleto infrusinà che ‘l dovea contentarse “de ‘n leto de fioca”, magari, dopo che ‘l gavea netà el camin le ghe scaldava un gosso de brulè.
E ve lo ricordèo el “paste”? Co’ la so sestela sotobrasso, pien de “pèssi-duri” o “ossidamorto” e “pearini”, e scurlando in man el sacheto de le bale, el passava da tute le ostarie ando i clienti par ‘n istante i molava el goto par tentar la sorte. ‘Na ‘òlta me papà el ga vinto tuta la sestela ma vedendo che al “paste” gh’èra spuntà ‘na lagrimeta… el s’à contentà de sèliar du pearini, par mi e me mama, lassàndoghe el resto.
I èra i tenpi de i “masaroi”, quando che, oltre che la legna e ‘l carbon, se ‘ndava a crompar la mesa coloneta de giasso che la matina presto i caretieri i portava in çità da le giassare de la Lessinia. D’istà, frasà drento a la sporta, strada fasendo la te negava i pie e te rivài come un ciuìn!
I èra tenpi dei “molèta” co’ ‘l marchingegno a pedài e picà-via el bussoloto (ex conserva de pomodoro) da ‘ndò sgossinava l’aqua su la mola! E gh’èra i ombrelari co’ ‘l fagoto de marele e de màneghi ligà a bandoliera su ‘na spala… e gh’èra i “spissiài”, quei veri, co’ la spissiarìa fodrà de vasi bianchi e blu da le etichete in gotico, el mortarel de piera e ‘l pestel, senpre in funsion. Le medissine i èra “fate in casa” e ne la me infansia no’ me ricordo de aver visto altro se non: oio de rissin, oio de lin, erbassena, cassia in cana, manite, ecc… L’unica roba confessionà che circolava l’èra el “purgante Aquila”!
Sparì par senpre anca i parolòti che i tasselava paroi e teie. Se g’avea messo anca i soliti sèngali balonari ch’i avea inventà ‘na cola speciale che sostituiva la stagnadura ma a me mama, dopo, quando che l’à messo-sù el stagnà, gh’è ‘n dà sul sòco, co’ ‘l cuI del parol destacà de neto, anca tuta la polenta!
Al vigile, par via del capel, ghe ciamàimo el “cana” e miga l’èra lì solo e senpre par far le multe; mi, come tuti, lo vedea come un angelo protetor; quel che te iutava a traversar la strada, che te la insegnava se te l’avei persa e che, aI massimo, se te fasei ‘ na vacada, el te menava inansi al naso el deo. I oci i èra severi ma soto-soto ghe scapava da ridar!
Gò da èssar propio vecia parche me ri cordo parfin de i “stài”; ghe n’èra uno in vicolo Madonina, con tuti i so veci “Bucefali” le timonele, i baroci e le borossàie e me ricordo la fila de i veturài a risego del Liston, co’ ‘l cavaI incapelà e co’l muso infilà nel saco de la biava.
In corte vegnea i “sonadori”. Fora de porta vegnea i “salti” quatro pòri saItinbanchi, du cani maestrà, ‘na sìmia “dal cuI pelà”… e noialtri mostri se corea co’ i diese schei in man e ‘l cor che ghe dava la polvar anca a Menèa.
Gò sercà de contarghe a me neodi, come ‘na rosària, del “bole” che ‘l vegnèa a simentarne la gola co’ la teia de rame piena de gnacia e ‘l sgabel pieghevole infilà nel brasso. «Diese schei de bole… co’ ‘l pesseto!». La parola “bole” l’èra nata dal riciamo de ‘sto vendidor toscano: «L’è calda… la bolle!». EI “pesseto” l’èra el stricolin che ‘l usava darte de zonta, sora el conto e guai se ‘l se desmentegava!
Gò parlà del caretin bianco a triclico del gelatar, dal coerto sora, da le piture colorade tuto intorno, dai coercioli a piramide, color de argento. Dei bei gelatoni da diese, de le “matonele” da vinti; roba da siori, e i m’à scoltà come che se scolta le robe più fantastiche.
Quanto ai “sarti-barbieri”; un altro mestier del tenpo che fu, ghe ne conosso ancora uno, a Pescantina; el presidente del comitato “la Madonnina”, Bruno Sartori; forsi l’ultimo restà in ‘sto mondo che, persi tuti i colori, l’è deventà de ‘n griso che fa da pianzar! Beh… serémo i oci e co’ ‘l penel de i ricordi tornemolo ancora a impiturar de i mile colori de la fantasìa.

Wanda Girardi Castellani