L’Angolo de la Wanda – Marzo ter 1995 – “Na bela ecession nel mondo de i cìrcoli de poesia “La Panocia” de Schio”

…a cura di Graziano M. Cobelli

gcobelli05@gmail.com

Quatro Ciàcoe: da Verona

“Na bela ecession nel mondo de i cìrcoli de poesia “La Panocia” de Schio”

Tra i omagi ricevù a la fine del ’94, el più gradito l’è stà l’antologia stanpà da “La Panocia” de Schio par el so ventenale. Penso che ‘sto qua el sia l’unico Cìrcolo veneto de poesìa dialetal che l’è stà bon de riunir, par ben 8 volte in vint’ani, e in maniera senpre splendida, le liriche de i so associadi.
Gh’è però da premetar che ‘sti qua, caso unico, i va d’acordo, colaborando tra de lori in amicissia, forsi anca parché i è tuti validi, sia pur ogniuno con un so propio modo de far poesia.
EI Grupo l’èra nato nel 1968 col nome de “La Garninela” (che l’è un pìcolo corso d’aqua che passa par S. Maria in Vale); nome che nel 1974 el g’à lassà el posto a quel de “La Panocia”, quantomài centrà, visto el spirito de corpo che gh’è tra i poeti scledensi e (zonto mi) “l’oro” de i grani tacà a ‘sto robusto mugoloto. I “panociari” i è stadi spesso premiadi nei vari concorsi triveneti e quando che uno più de lori i è in premio o anca solo in segnalassion, a farghe corona quando che i va a ritirar el riconossimento gh’è senpre un s-ciapeto de coleghi. L’atività del Grupo l’è vasta e continua. Recite un poco dapartuto: ciese, biblioteche, teatri, scole, radio e TV. Colaborassion con el coro GES e con la VERLATA e parfin un espatrio a Mulhouse, in Francia, con i “Vesentini nel mondo”. Ne l’85 la Panocia l’à scominçià a organisar el concorso bienal de poesia “La naveta d’oro” e, insoma, la conduse, traverso tute ‘ste inissiative, la so meritoria batalia par la conservassion de la lengua veneta e de le so bele tradissioni. Ne ‘sta ultima antologia, dopo la prefassion de la Presidente Enrica Gorgeri e quele de Pino Sbalchiero e de l’assessor a la cultura Giorgio Dall’Igna, se poI gustarse un sagio de le liriche de: Augusta Busin, Bortolino Cavedon, Bruna Cortese Dalle Carbonare, Danilo Tonini, Enrica Gorgeri, Giorgio Scolaro, Giorgio Zambon, Giovanna Valmorbida Trentin, Giuseppe Baice, Giuseppe Losavio, Laura Faccin, Luigi Breda, Maria O. Stocchero, Mario Meneghini, Nerio Sartori, Orazio Chierico, Piera Rompato, Renato Zanella.
Inoltre, poesie de i soci sconparsi: Gerardo Perandini, Egidio Bisortole, Giovanni Meneghini, Rodolfo Rosponi, Gianmaria Grandesso. I disegni, de ‘na magia unica, i è de Giancarlo Dusi che’l l’à sotolinià con alcuni versi.
Ma, personalmente, su la Panocia podarìa parlàrvene fin a ‘npenir un libro! Par tuti i poeti scledensi g’ò ‘n rispeto e n’amirassion grandi. Penso che par la poesia, Schio, la sia na isola felice, sensa inquinamenti; unica e non solo nel Veneto. Un esenpio de tegner davanti ai oci, come un quadro del Botticelli, andò negarse par ritrovar el fià, ogniqualvolta el vien a mancarne ne la quotidiana constatassion de le infinite miserie umane de le quale a volte no i è refratari gnanca i poeti.

Wanda Girardi Castellani