L’Angolo de la Wanda – Marzo bis 1995 – “LA FAMEIA …L’è “DONA””
…a cura di Graziano M. Cobelli
gcobelli05@gmail.com
Quatro Ciàcoe: da Verona
“LA FAMEIA …L’è “DONA””
Si; e no’ solo parché feminìl l’è el vocabolo, ma pararìa propio che l’invension de la faméia se ghe la deva atribuir a le done! L’è pur vera che fin da la preistoria semo stà’ viste unicamente come strumento de piaser e de procreassion; basta vardar le varie statuete e i grafiti del neolitico, tuti con atributi feminili acentuàdi fin a la caricadura.
Daltronde, ne le taoléte mesopotamiche la dona l’è adiritura indicà con un segno grafico inparentà a quel che se cata de solito nei WC.
Quanto a la so posission social, fa bona fede el patrimonio figurativo egissian dove che se la vede, o raso-tera al marì, lilipussiana rispeto a lu, opura ocupà in pesanti laóri domestici o agricoli, par no’ parlar de l’età classica quando che ne le case patrissie la vivéa in la clausura del gineceo a laorar co’ le schiave. Aristotele el l’à definì: “inferior par natura” mentre Demostene ne la so orassion contro Neera el n’à catalogade cusì: la prostituta par el piaser, la concubina par le cure giornaliere e la moier par la casa e par far i fioi. Oviamente, qualsiasi nostra espression de’n pensier o de ‘n dirito, l’è sempre parsa ‘na roba cusì assurda da èssar al massimo un argomento da teatro. A quei tenpi, gh’èra, si, done in condission de alto prestigio; le sacerdotesse che però le dovéa èssar vergini (salvo quele de Afrodite che le g’avéa l’obligo de prostituirse a profito del tempio). Se le sgarava i le sepeliva vive con a coredo el magnar par un solo giorno. E parlemo un pochetin de Roma. Qua l’è sintomatico lésar le iscrissioni funerarie che esalta le virtù e i doveri de le brave spose: “conservatrix” (l’à ben custodì la casa), “pudìca e univìra” (l’è stà casta e l’à conossù un omo solo). Tanto meio se l’è stà anca religiosa, onorando con le oferte de rito i lari e i penati ma, “sine superstitione”. Eco alora la formula più usà: “domi mansit domum servavit, lanan fecit” (l’è restà in casa, preservandola, e l’à filà la lana). Più o manco quel che se dise in Veneto: “che la piasa, che la tasa e che la staga in casa”. Quando che la se sposava, el marì el la spetava su la porta par consegnarghe aqua e fogo, mentre le bone amighe le ghe regalava el fuso e la canòcia. L’è da quel tenpo e quel lógo che l’omo el porta in casa la sposéta nova in brasso, parché se la g’avesse da strabucar el sarìa un bruto presagio. Sempre parlando de Roma; par ripudiar la so dona l’omo el g’avéa tre bele scuse: i corni, se l’avea tentà de abordir co’ le arte magiche o se la s’avéa fato far la ciave de la càneva, parché el vin, acusà de provocar morbini erotici, el gh’era severamente proibì.
Se pol quindi tirar la soma che la dona, fin dal fondo più fondo dei tenpi, l’è stà parchegià al fogolar domestico.
Fisiologicamente più debole, imobilisà da ‘na carga de maternità, l’à dovù lassarghe a l’omo l’incombensa de la cacia e quela de inventar i vari atressi. A ela, al massimo, podéa servirghe un baston par raspar-su le radise; quel stesso baston che par l’omo l’èra un’arma, par ela l’è deventà un utensil. Contadina, vasaia, conservatrice de la roba da magnar, custode del fógo, oltre che mama e compagna; da che gh’è mondo, l’è stà’ éla el perno e ‘l motor de la faméia, anca se senpre tegnù in poca considerassion !
Ma, tirando i remi in barca, come s’ala formada ‘sta faméia ?
Mi penso che a un dato momento, la dona che, fin alora, come tute le altre femene in natura, la s’avéa acopià indifarentemente con tuti i mas-ci, blocada da le maternità, ocupà a provédar a ‘na prole particolare che, a difarensa dei altri cucioli, par almanco 5 ani no’ l’èra in grado a ‘rangiarse, l’abia sentì la necessità de ‘vérghe un compagno arènte che’l provedesse a tuti i fabisogni ma ‘sta façenda l’avarìa comportà, oviamente, l’impegno de ‘na conquista e quelo de far i fioi co’ ‘n omo solo. Eco quindi el scominçio de un’èra che vede la dona adornarse par atirar el presèlto. Forsi propio da alora è scominçià l’amor; quando l’omo che fin a quel momento l’avéa ciapà la femena da drio, come tuti i altri mas-ci in natura, el taca a ‘copiàrseghe facia a facia.
Se la móre, propio parché gh’èra un sentimento d’amor, el la sepelisse par scóndarghela ai predadori e magari el ghe mete ‘rènte i so ornamenti o dei fiori, come l’è stà’ par “Lucy”, el più antico corpo feminil ritrovado, (Hadar, Etiopia, 1974) risalente a 3/4 milioni de ani fa. Par contro, la dona (dal neolitico) la taca a coèrsarse co’ ‘na còtola, forsi a garansia de esclusività par el marì che pò’ el ghe restituisse el piaser inventando el perisoma. A la dona, dunque, l’è probabile che se ghe deva atribuir l’invension, oltre che la preservassion, de la faméia. Gh’è da métar a zonta che l’è dovù a la necessità dei fioi de l’omo de confrontarse co’i altri buteleti, passandose le diverse esperiense, la formassion del villaggio, avo de la çità. Quanto a l’atual crisi de le nostre faméie, a me parer le cause i è dovù: al tipo de organisassion sociale, al tipo de impostassion cultural, a l’alontanamento dai valori morali e religiosi, ma soratùto al trionfo de l’egoismo; l’egoismo individual ma, prima de tuto, quel più grave del Stato che da la faméia de continuo el tól sensa po’ darghe in cambio el minimo sostegno.
Wanda Girardi Castellani
