L’Angolo de la Wanda – Marzo 2004 – “STORIE DE BESTIE E DE CRISTIANI”
…a cura di Graziano M. Cobelli
gcobelli05@gmail.com
Quatro Ciàcoe: da Verona
STORIE DE BESTIE E DE CRISTIANI
Fin da buteleta ò desiderà de ‘vérghe ‘na bestiolina tuta par mi, un zugàtolo vivo; un can, un gato, ma me mama no’ la mai volù bestie par casa, salvo i canarini che me papà l’arlevava più par passión che par intaresse. Me ricordo la penitensa che i mei i dovéa far quando che nasseva i uselini. Bisognava pareciarghe el nìo col bonbaso, nutrirli a bale de ovo pestà, netarghe la gabia ogni momento e starghe drio piassè che i fusse butini. Pò’, no’ sò come sia stà, n’è morta la fèmena e in quanto al canarìn da rassa, i ne l’ha robà, gabia e tuto, ‘na matina che l’avevimo messo su la finestra (in piano rialsà) a ciapàr aria e me papà el ghe n’à fato ‘na malatia!
Questo, quando che ero pìcola!
‘Pena maridà, quando che m’èro ilusa de podér far finalmente in casa mia quel che voléa, zà dal primo ano è entrà a far parte de la faméia el “Pìpi”; un diamante mandarino dal beco arancione e la voçe de ‘na tronbeta. Zà a le prime luci de la matina el tacava strombetàr che paréa de èssar in ‘na caserma e me marì el ghe faséa el controcanto a òstreghe e rachete! El n’è durà solo 4 ani, pò’ ‘na matina l’ò catà co’ le sate pararia. Emo pianto tuti, parfìn el “parón” al quàl el “Pipi-tronbetiér” no’l gh’èra mai stà sinpatico.
Passà un ano, dopo qualche esperimento coi péssi rossi, bestie insulse soratuto parché i è mute, ‘na dominica són tornà da piassa Erbe con la “Guendalina”; ‘na tartaruga granda più o manco de ‘na scudela. Libera par casa, par el divertimento de me fioi, Mirko e Flavio, no’ se savea mai andò che la fusse ma bastava vèrsar el frigo che se la vedea spuntàr; più che altro se la sentéa rivàr dal sbatimento del sgusso su le matonele. In manco de ‘na setimana l’avea capì andó che tegnéa la salata e le carote!
La só cucia l’èra ‘na casseta da verdura sistemà su la veranda.
L’èra la martire de Flavio che al tenpo l’èra ancora in età da asilo. ‘Na olta l’avea çercà de farla vègnar fora dal sgusso “iutandoghe” con n’ucineto da crossè col bel risultato de massacrarghe el col al punto che, dopo la “riparassión” avegnù a forsa de ceroti, la testa no’ l’avéa più podù tiràrla drento. N’altra olta, al “famigerato” gh’èra vegnù la bela idea de fregàr sul muro un masseto de çento fulminanti. ‘Pena che i s’à impissà, el l’à moladi in tera, solo che in tera gh’èra la casseta dela Guendalina che l’à ciapà fogo. Mi son riussì a trar in salvo la novela “Santa Giovanna D’Arco” curandola po’ con oio de oliva, giasso e no’ me ricordo che altro! Quela òlta la pòra bestia la g’avea rimesso le onge! Un giorno è vegnù a farme visita l’amigo Giani, cronista dela “nera” a l’Arena e possessór de varie bestie tra le quali anca dele tartarughe de varie misure e l’ò pregà de portarse via anca la mia… fin che s’èra in tempo.
Qualche mese dopo el m’à telefonà: “Ma se pol savér parcosa l’avì ciamà Guendalina? L’è un mas-cio e ‘dèsso l’è quà che’l ghe fa un “servissio” a una dele mie che l’è almanco el dopio de lu.
Beh, questo el sucedeva quasi trent’ani fa e el “Guendalino” supermacho, malgrado el col segà e le onge brusà, l’è ancora al mondo!
Mi e me fioi inamorà de tute le bestie, a quei tenpi semo riussì parfìn a far scanpàr diversi giorni un cuciolo de barbastrèl, dàndoghe el late co’ ‘na ponpeta. Pò’ gh’è stà, tra i altri, l’episodio dela tenca lassà sguassàr in vasca da bagno, roba che n’à costreti par più de’n mese a lavarse a rate nel lavandìn.
Un altro ospite de casa Castellani l’è stà pò’ Gandi, overo un porseleto d’India bianco e marón, anca lu crompà in piassa Erbe. ‘Stó qua l’à subito portà pégola in fameia in quanto me marì l’à tacà a dir che’l spussava, malgrado i bagneti giornalieri che ghe faséa e le frequenti sprussade de colonia. Simpatico, anca se a colpo d’ocio inparentà co’ le pantegane, el spassolava anca lu chili de carote e ‘l me vegnéa drio par casa, tacà ai pié, col ris-cio de farme far caoléa scapussandoghe indosso. Ala sera, quando inpissavimo la TV el me saltava in brasso e da li no te’l cavai gnanca a canonade. Dopo qualche mese però, me marì, senpre parvia dela spussa, l’è rivà a dirme “o fora lu o fora mi!” (esagerato!!) A’sto punto l’infermiér che in quei dì el vegnea farme le punture el s’à oferto de portarsela via parché a lu “quele bestie li le ghe piaséa”. Cusì, con tanto de nastrin rosso al col e col seguito de la só casseta coredà de ‘na diesina de carote, la sera de l’ultima puntura, in un clima fameiàr de luto streto, el se l’à portà via. Qualche giorno dopo incontrandolo in borgo g’ò dimandà come che stava el me Gandi. “L’ò magnà!!” Cosa?? “Ma no gh’è l’avea dito che a mi quele bestie li le me piase?”
Quela òlta, par un pel no’ ò divorsià da me marì, colpevole de averme costreta a dar via la pora bestia a quel fiol d’un can de’n canibale.
Qua la storia la finisse.
Par consolarne a la fine e prima de l’avento de quel tesoro dela cagneta Picia, rivà ‘na diesina de ani dopo, emo crompà un orso de pessa che almanco quel no’l m’à mai dà pensieri e gnanca dispiaseri.
Wanda Girardi Castellani
